លោក Yoshihiko Noda ជានាយករដ្ឋមន្ត្រីថ្មី
បន្ទាប់ពីការលាឈប់ពីមុខតំណែងនាពេលថ្មីៗរបស់លោកនាយករដ្ឋមន្ត្រី Naoto Kan មកគណបក្ស កាន់រដ្ឋអំណាច គឺគណបក្ស ប្រជាធិបតេយ្យ ទើបនឹងរកឃើញ អ្នកត្រូវជំនួសគាត់ គឺ គ្មាននរណា ក្រៅពីបច្ចុប្បន្នរដ្ឋមន្រ្តីក្រសួងហិរញ្ញវត្ថុ លោក Yoshihiko Noda។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣១
អាយុ ៥៤ឆ្នាំ លោក Yoshihiko Noda ជាបច្ចុប្បន្នរដ្ឋមន្ត្រីក្រសួងហិរញ្ញវត្ថុ ប្រាកដជានាយករដ្ឋមន្ត្រី ស្តីទីមួយរូប និងរ៉ាប់រងអវសាននៃអាណត្តិរបស់លោក Naoto Kan។ ការបោះឆ្នោតថ្មីជ្រើសរើសប្រធានគណបក្សប្រជាធិបតេយ្យនឹងប្រព្រឹត្តទៅក្នុងចន្លោះពេលមួយឆ្នាំទៀត។
ចាប់ពីឥឡូវនេះ ទៅដល់ពេលនោះ លោក Yoshihiko Noda នឹងអនុវត្តតាមឥតល្អៀង នយោបាយនៃក្រសួងហិរញ្ញវត្ថុ។ គាត់នឹងសាកល្បង ដំឡើងពន្ធដារជាពិសេស ពន្ធអាករលើតម្លៃបន្ថែម TVA ដែលមិនលើសពី៥% ទេ ដើម្បីធ្វើហិរញ្ញប្បទានឲ្យការសាងសង់ឡើងវិញមណ្ឌលបំផ្លិចបំផ្លាញដោយការរញ្ជួយដី និងរលកយក្សស៊ូណាមីកាលពីថ្ងៃ ១១ មីនា។ លោក Yoshihiko Noda ត្រូវតែកាត់បន្ថយ បំណុលសាធារណៈដែលនៅចុងឆ្នាំ ២០១១នេះ នឹងមានចំនួន ២៣០ % នៃផលិតផលសរុបក្នុងប្រទេសជប៉ុន។
ដើម្បីកាត់បន្ថយបំណុលនេះ គេត្រូវបង្កើន ពន្ធអាករលើតម្លៃបន្ថែម TVA ជាបីដងគឺពី១៥ទៅ១៧%-ស្របតាមមូលនិធិរូបិយវត្ថុអន្តរជាតិ FMI។ ប៉ុន្តែ ដើម្បីធ្វើការនេះ លោក Yoshihiko Noda ក៏ត្រូវចាត់វិធានការផ្តល់សន្ទុះថ្មីឲ្យកំណើនសេដ្ឋកិច្ចផងដែរ។ កំណើនសេដ្ឋកិច្ចដែលនៅងាប់ស្តូកមួយកន្លែងតាំងពីជាច្រើនឆ្នាំមកហើយ។
គាត់ត្រូវប្រយុទ្ធទល់នឹងការស្ទុះហក់ឡើងថ្លៃនៃប្រាក់យេន។ សហគ្រាសជប៉ុនប្រើប្រាក់យេនថ្លៃ ដើម្បីរើផលិតកម្មខ្លួនទៅធ្វើ នៅទីដទៃ និងទិញលោះយកសហគ្រាសនៅបរទេស ដែលជាហេតុបណ្តាលឲ្យកើតមានក្តីព្រួយបារម្ភ ច្រើននៅប្រទេសជប៉ុន។
ការឡើងកាន់រដ្ឋអំណាចរបស់ពួកអ្នកប្រជាធិបតេយ្យនៅឆ្នាំ ២០០៩ ជាជំនួសពួកអ្នកមុនខ្លួន ដែលបានក្តាប់រដ្ឋអំណាចជាងកន្លះសតវត្ស ពុំបានកែបំបាត់ការផុងលុងខ្លួនខាងនយោបាយនិងសេដ្ឋកិច្ចនៃប្រទេសជប៉ុនទេ។ ស្របតាមអ្នកធ្វើអត្ថាធិប្បាយ Koichi Ichiyama « ប្រជាជនជប៉ុនមិនអើពើទេ.គេមិនរង់ចំាអ្វីឬក៏ស្ទើរតែអ្វីសោះ ពីអនាគតនាយករដ្ឋមន្ត្រី ពីព្រោះប្រមុខរដ្ឋាភិបាលលាឈប់ពីមុខតំណែង Naoto Kan គ្មានសមត្ថភាពនឹងប្រឈមមុខទល់នឹងគ្រោះធម្មជាតិទេ ជាពិសេសទៅទៀតទល់នឹងគ្រោះថ្នាក់ nucléaire គាត់បានវ័ណ្ឌជើងខ្លួនឯង ជាហេតុធ្វើឲ្យសភាពការណ៍រឹតតែធ្ងន់ធ្ងរ ហើយប្រជាជនជប៉ុនជិនណាយនឹងគណបក្សកណ្តាលនិយម លំអៀងទៅខាងឆ្វេងដែលកាន់រដ្ឋអំណាច ហេតុនេះហើយបាន ជាគេមិនអើពើ»។
គណបក្សកណ្តាលនិយមលំអៀង ទៅខាងឆ្វេងគ្មានសមត្ថភាពនឹងខ័ណ្ឌបញ្ចប់ការឃុបឃិតគ្នារវាងរដ្ឋនិងវិស័យឯកជន ដែលត្រូវបានឆ្លុះបញ្ចាំងឲ្យឃើញដោយគ្រោះថ្នាក់នៅរោងចក្រ Fukushimaជាទីដែល ក្រុមហ៊ុន Tepco នៅតែ បន្តប្រព្រឹត្តតាមទំនើងចិត្តខ្លួន ដោយមានការគាំពារពីខាងរដ្ឋការដ៏ខ្លាំងក្លាដែលបដិសេធពុំព្រមសហការជាមួយ គណបក្សប្រជាធិបតេយ្យកាន់រដ្ឋអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ