ថវិកាការពារជាតិរបស់ទីក្រុងប៉េកាំងកើនឡើងយ៉ាងខ្លាំង
ទីក្រុងប៉េកាំងបានប្រកាសឲ្យដឹងនៅថ្ងៃអាទិត្យនេះថា ថវិកាការពារជាតិរបស់ប្រទេសចិននៅឆ្នាំ២០១២បានកើនឡើងខ្លាំង។ ទាំងនេះ ពិតជានឹងនាំឲ្យកើតមានក្តីបារម្ភនៅក្នុងប្រទេសជិតខាងនៃតំបន់អាស៊ី-ប៉ាស៊ីហ្វិក។ តំបន់អាស៊ី-ប៉ាស៊ីហ្វិកដែលសហរដ្ឋអាមេរិកបានពង្រឹងវត្តមានរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ថវិកាការពារជាតិរបស់ទីក្រុងប៉េកាំងនៅឆ្នាំ២០១២នេះនឹងមានកំណើនប្រមាណ១១,២%ឬត្រូវកើនឡើងដល់៦៧០,២៧ពាន់លានយ័ន ឬត្រូវជា ៨០,៦ពាន់លានអឺរ៉ូ។ នេះជាការប្រកាសឲ្យដឹងដោយអ្នកនាំពាក្យនៃសភាប្រជាមានិតចិន។
អត្រាកំណើននៃថវិកាការពារជាតិរបស់ទីក្រុងប៉េកាំងនៅឆ្នាំ២០១២ដែលមាន១១,២%គឺមានលើសពីអត្រានៃកំណើនសេដ្ឋកិច្ចចិននៅឆ្នាំ២០១១ដែលមានត្រឹមតែ+៩,២%។ ដូច្នេះ ទាំងនេះបញ្ជាក់បង្ហាញឲ្យឃើញថា ទីក្រុងប៉េកាំងកំពុងតែខិតខំពន្លឿនការអភិវឌ្ឍន៍កម្មវិធីយោធារបស់ខ្លួន ដើម្បីដេញឲ្យទាន់សហរដ្ឋអាមេរិកនិងប្រទេសរុស្ស៊ី។
ចំណែកឯលោកអតីតរដ្ឋមន្ត្រីក្រសួងការបរទេសចិនវិញ បានខិតខំថ្លែងពន្យល់ថា “ថវិកាយោធានៃប្រទេសចិនតំណាងតែ១,២៨%នៃផលិតផលដុលសរុបរបស់ប្រទេសចិនប៉ុណ្ណោះ ឃើញថានៅមានតិចទាបជាងបរិមាណនៃថវិកាយោធារបស់សហរដ្ឋអាមេរិកឬប្រទេសអង់គ្លេសដែលមានដល់ទៅជាង២%នៃផលិតផលដុលក្នុងប្រទេស”។
ជាផ្លូវការ អត្រានៃកំណើនថវិកាយោធារបស់ប្រទេសចិននៅឆ្នាំ២០១១មាន១២,៧% នៅឆ្នាំ២០១០មាន៧,៥% ឃើញថាមានប្រមាណជាង១០%លើសពីថវិកាយោធានៃរយៈកាលម្ភៃឆ្នាំចុងក្រោយនេះ។ ដូច្នេះសន្ទុះកំណើននៃថវិកាយោធាចិននេះច្បាស់ជាបង្កបង្កើតឲ្យមានភាពតានតឹងនៅក្នុងតំបន់មហាសាគរប៉ាស៊ីហ្វិកប៉ែកខាងលិចដែលទីក្រុងប៉េកាំងកំពុងបង្ហាញឲ្យឃើញពីមហិច្ឆតារបស់ខ្លួន ជាពិសេសនៅក្នុងតំបន់ទីប្រជុំកោះដែលកំពុតតែឈ្លោះដណ្តើមគ្នារវាងប្រទេសចិន ប្រទេសជប៉ុន ប្រទេសវៀតណាម និងប្រទេសហ្វីលីពីន។
គួរបញ្ជាក់ថា ក្រសួងការពារជាតិអាមេរិកាំងបានឲ្យសារៈសំខាន់យ៉ាងខ្លាំងទៅលើតំបន់អាស៊ី-ប៉ាស៊ីហ្វិកដែលសហរដ្ឋអាមេរិកបារម្ភពីការស្ទុះកើនឡើងខ្លាំងនៃអានុភាពយោធារបស់ប្រទេសចិន។
ហើយនៅខែវិច្ឆិកាកន្លងទៅ លោកប្រធានាធិបតីអាមេរិកបារ៉ាក់អូបាម៉ាបានប្រកាសឲ្យដឹងថា សហរដ្ឋអាមេរិកនឹងធ្វើការពង្រឹងវត្តមានយោធារបស់ខ្លួននៅប្រទេសអូស្ត្រាលី។ ទាំងនេះបាននាំឲ្យទីក្រុងប៉េកាំងស្រែកថា “អាមេរិកកំពុងងាកទៅរកសម័យសង្គ្រាមត្រជាក់”។ រីឯទីក្រុងវ៉ាស៊ីនតោនក៏គ្រោងផងទៀតពង្រឹងវត្តមានយោធារបស់ខ្លួននៅសិង្ហបុរី នៅប្រទេសហ្វីលីពីននិងនៅប្រទេសថៃ។
បើយោងតាមវិជ្ជាស្ថានស្រាវជ្រាវអាមេរិកាំង ថវិកាយោធាចិននឹងស្គាល់ការគុណទ្វេចាប់ពីនេះទៅទល់ឆ្នាំ២០១៥ ហើយបរិមាណនៃការចំណាយទៅលើវិស័យយោធារបស់ប្រទេសចិននឹងមានលើសពីថវិកាយោធារបស់ប្រទេសសំខាន់ៗក្នុងតំបន់អាស៊ី-ប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ