ព្រះសង្ឃភូមាបើកជំនួបប្រជុំដោះស្រាយវិបត្តិហិង្សាសហគមន៍
ព្រះសង្ឃពុទ្ធសាសនាភូមា មកពីគ្រប់ជ្រុងនៃប្រទេស បានមកជុំគ្នានៅថ្ងៃព្រហស្បតិ៍ នេះនៅជាយទីក្រុង រ៉ង់ហ្គូន ដើម្បីជជែកពិភាក្សាគ្នា ស្តីអំពីវិបត្តិហិង្សាសហគមន៍ដែលភូមាបានជួបប្រទះក្នុងពេលកន្លងមក។ អំពើហិង្សាសហគមន៍ដែលសម្រាប់ក្រសែភ្នែកអន្តរជាតិ គឺបណ្តាលមកព្រះសង្ឃពុទ្ធសាសនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១២
តំណាងព្រះសង្ឃជាងពីររយអង្គ ត្រូវបានអញ្ជើញឱ្យមកចូលប្រជុំ នៅថ្ងៃនេះ ដើម្បីពិភាក្សាគ្នារកដំណោះស្រាយរួម និងជួយរដ្ឋាភិបាល ឈានដល់ការបិទបញ្ចប់អំពើហិង្សាសាសនា។ សង្ឃដែលល្បីខាងធ្វើឃោសនាប្រើពាក្យវាយប្រហារស្អប់ខ្ពើបអ្នកកាន់សាសនាអ៊ីស្លាម ក៏មានវត្តមានក្នុងអង្គប្រជុំសង្ឃនេះដែរ។
ការរើសអើងសាសនា នៅភូមាមិនមែនជារឿងថ្មីថ្មោងទេ ហេតុការណ៍នេះតែងត្រូវបានបំបិទជិត អស់ជាងកន្លះសតវត្សមកហើយដោយរបបសឹក។ អំពើហិង្សាសហគមន៍ បានផ្ទុះឡើងស្ទើរពេញផ្ទៃប្រទេស សម្លាប់ជីវិតមនុស្សអស់ប្រមាន២០០នាក់ ក្នុងពេលមួយឆ្នាំកន្លងទៅ និងជាង១៤ម៉ឺននាក់ភៀសខ្លួន ហើយជនរងគ្រោះភាគច្រើនជាជនជាតិភាគតិចកាន់សាសនាអ៊ីស្លាម។ ព្រះសង្ឃពុទ្ធសាសនា ដែលជាបេះដូងនៃការប្រយុទ្ធដើម្បីលទ្ធិប្រជាធិបតេយ្យ ត្រូវបានសហគមន៍អន្តរជាតិចង្អុលមុខថា ជាបុព្វហេតុ នាំឱ្យមានការប្រឈមមុខដាក់គ្នា។
ពុំឃើញមានប្រតិកម្មអ្វីពីខាងរដ្ឋាភិបាលទេ ប៉ុន្តែតំណាងសហគមន៍សាសនាអ៊ីស្លាម បាន ស្វាគមន៍ចំពោះគំនិតផ្តួចផ្តើមរកដំណោះស្រាយឱ្យវិបត្តិហិង្សានេះ និងសង្ឃឹមលើព្រះសង្ឃពុទ្ធសាសនា ក្នុងការជួយពន្យល់ដល់បណ្តាជនទូទៅឱ្យឈប់មានគំនិតស្អប់ខ្ពើម និងមើលអ៊ីស្លាមក្នុងផ្លូវអាក្រក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ