ស្រ្តីសកម្មជនទាមទារដីធ្លីម្នាក់ត្រូវផ្តន្ទាទោសពីបទធ្វើបាតុកម្មដោយគ្មានការអនុញ្ញាតិពីអាជ្ញាធរ
ស្រ្តីភូមាម្នាក់ ដែលបានចូលរួមក្នុងបាតុកម្មប្រឆាំងអាជីវកម្មរបស់ក្រុមហ៊ុនចិន ទៅលើអណ្តូងរ៉ែនៅភូមា ត្រូវបានតុលាការកាត់ទោសឲ្យជាប់គុកពីឆ្នាំ ក្នុងបទបង្កចលាចល ធ្វើឲ្យប៉ះពាល់ដល់សណ្តាប់ធ្នាប់សាធារណៈ។ នេះបើតាមប្រភពពីមេធាវីរបស់ស្រ្តីសកម្មជន កាលពីថ្ងៃសុក្រទី ៣០ សីហា។ លោកRobert San Aung មេធាវីរបស់លោកស្រី Naw Ohn Hla បាននិយាយរួចហើយថា លោកនឹងប្តឹងទៅសាលាឧទ្ធរណ៍។
ចុះផ្សាយនៅថ្ងៃ៖
ស្តាប់ - ០១:៤៣
ក្នុងសំណុំរឿងនេះ ចំណាត់ការរបស់តុលាការបានប្រព្រឹត្តទៅលឿនដូចផ្លេកបន្ទោរ។ លោកស្រី Naw Ohn Hla ត្រូវបានតុលាការឃាត់ខ្លួន កាលពីថ្ងៃទី ១៣ សីហា នៅពេលគាត់កំពុងត្រៀមចូលរួមធ្វើបាតុកម្មជាមួយស្ត្រីភូមាដទៃ ប្រឆាំងនឹងគម្រោងដ៏ចម្រូងចម្រាសទាក់ទងនឹងការធ្វើអាជីវកម្មអណ្តូងរ៉ែរបស់ក្រុមហ៊ុនចិន។ ពីរសប្តាហ៍ក្រោយមក គឺនៅថ្ងៃព្រហស្បតិ៍ ទី ២៩ សីហា តុលាការភូមាបានចោទប្រកាន់គាត់ពីបទបានស្រែកប្រកាស ឬបង្កើតពាក្យចចាម អារ៉ាម ដែលអាចបង្កជាក្តីព្រួយបារម្ភសម្រាប់រដ្ឋាភិបាល…
នេះមិនមែនជាលើកទីមួយទេ ដែលលោកស្រីOhn Hla ត្រូវអាជ្ញាធរភូមាចាប់ដាក់ពន្ធនាគារ។ ក្នុងអតីតកាល គាត់ត្រូវបានអាជ្ញាធរ ក្នុងរបបសឹកភូមាចាប់ឃាត់ខ្លួន និងដាក់គុកជាច្រើនដង។ គាត់ទើបតែត្រូវបានគេដោះលែង នៅក្នុងអំឡុងគោលនយោបាយលើកលែងទោសរបស់រដ្ឋាភិបាលភូមាថ្មី កាលពីឆ្នាំ ២០១២។
នៅឆ្នាំ២០១២ លោកស្រី Ohn Hlaបានចូលរួមជាមួយបាតុករផ្សេងទៀត ដើម្បីប្រឆាំងគម្រោងធ្វើអាជីវកម្មរបស់ក្រុមហ៊ុនចិន ដែលមានចូលហ៊ុនវិនិយោគពីក្រុមហ៊ុនឯកជនគ្រប់គ្រងដោយពួកកងទ័ព។ ប៉ុន្តែ ក្រុមបាតុករត្រូវបានអាជ្ញាធរវាយបំបែក យ៉ាងហិង្សា រហូតធ្វើឲ្យមនុស្សរងរបួស ដែលក្នុងនោះ មានព្រះសង្ឃ១០អង្គ។ រហូតមកដល់ពេលនេះ ប្រជាជននៅបន្តធ្វើបាតុកម្ម ម្កងម្កាល ប្រឆាំងនឹងគម្រោងអាជីវកម្ម ដើម្បីទាមទារសិទ្ធិទទួលសំណងសមរម្យ ពីរដ្ឋាភិបាលដែលបានរឹបអូសដីធ្លីរបស់ពួកគេ យកទៅធ្វើអាជីវកម្មអណ្តូងរ៉ែ ជាមួយក្រុមហ៊ុនចិន។
ការដាក់ទោសលើសកម្មជនទាមទារដីធ្លី ត្រូវបានគេមើលថា ជាចំណាត់ការផ្ទុយនឹងនយោបាយរបស់រដ្ឋាភិបាលភូមាថ្មី ដែលធ្លាប់បានសន្យាធ្វើកំណែទម្រង់ និងដោះលែងអ្នកទោសនយោបាយ ទៅតាមការទាមទាររបស់សហគមន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ