ផ្ទុះភ្នំភ្លើង សម្លាប់មនុស្សពីរនាក់ នៅឥណ្ឌូណេស៊ី
នៅកោះជ្វាប្រទេសឥណ្ឌូណេស៊ី ភ្នំភ្លើងកេលុដបានផ្ទុះ កាលពីយប់ថ្ងៃព្រហស្បតិ៍ទី ១៣ កុម្ភៈ ដោយបានសម្លាប់មនុស្សវ័យចាស់ពីរនាក់។ អាជ្ញាធរបានបញ្ជារឲ្យប្រជាជនជាង ២សែននាក់ដែលរស់នៅក្នុងរយៈចម្ងាយ១០គីឡូម៉ែត្រពីមាត់ភ្នំភ្លើង ចាកចេញពីលំនៅឋាន។ ចរាចរណ៍តាមផ្លូវអាកាស របស់យន្តហោះដែលសំដៅ និងចេញពីឥណ្ឌូណេស៊ីក៏ត្រូវបានប្រកាសផ្អាកមួយរយៈ ដោយសារកំសួលផ្សែងពុល ដែលព្រួសចេញពីឡាវភ្នំភ្លើងកេលុដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នៅយប់ថ្ងៃព្រហស្បតិ៍ ភ្នំភ្លើងកេលុដបានចាប់ផ្តើមសកម្មភាព ព្រួសផ្សែង និងថ្មចេញពីល្អាង ទៅលើភូមិដែលសំបូរដោយមនុស្សរស់នៅ បំផុត នៅលើកោះជ្វា។ តាម អ្នកយកព័ត៌មានរបស់ទីភ្នាក់ងារបារាំង AFP ដែលស្ថិតនៅកន្លែងផ្ទាល់ ប្រជាជន ភ័យស្លន់ស្លោរ បានចាកចេញពីផ្ទះសម្បែង យ៉ាងប្រញាប់ប្រញាល់បំផុត ជាមួយនឹងម៉ូតូ ឬរថយន្ត។
រហូតមកដល់ព្រឹកថ្ងៃសុក្រ អាជ្ញាធរបានប្រកាសមរណភាពរបស់បុរសស្រ្តីវ័យចំណាស់ពីរនាក់ ដែលបានស្លាប់នៅក្នុងផ្ទះ ដែលបាក់សង្កត់ដោយដុំថ្ម ព្រួសចេញពីភ្នំភ្លើងកេលុដ។ យោងតាមអាជ្ញាធរគ្រប់គ្រងគ្រោះមហន្តរាយ មនុស្សជាង ២សែននាក់ ដែលរស់នៅក្នុងភូមិ ចំនួន ៣៦ត្រូវបានគេជម្លៀសចេញពីផ្ទះសម្បែង ដែលស្ថិតនៅក្នុងបរិវេណ ចម្ងាយ ១០គីឡូម៉ែត្រពីមាត់ភ្នំភ្លើង។
នៅថ្ងៃនេះ ក្រសួងដឹកជញ្ជូនឥណ្ឌូណេស៊ី បានប្រកាសបិទព្រលានយន្តហោះបី នៅកោះជ្វា។ គ្រប់ជើងហោះហើរ ដែលមកពីអូស្ត្រាលី និងឥណ្ឌូណេស៊ីត្រូវបានលុបចោល ឬប្តូរខ្សែគោចរ។ ចរាចរណ៍ពីអូស្រ្តាលី សំដៅឥណ្ឌូណេស៊ី និងប្រទេសថៃ ត្រូវបានប៉ះពាល់យ៉ាងខ្លាំង។ តាមអាជ្ញាធរ ក្នុងស្ថានភាពបច្ចុប្បន្ននេះ វាគ្រោះថ្នាក់ខ្លាំងណាស់ បើគេហោះនៅក្បែរផ្សែងភ្លើង។
ភ្នំភ្លើងកេលុដព្រួសផ្សែង ដីខ្សាច់ និងដុំថ្ម ដែលអាចធ្លាក់ក្នុងបរិវេណ ១៥គីឡូម៉ែត្រ។ តាមអាជ្ញាធរ នៅក្នុងភូមិដែលស្ថិតនៅមិនឆ្ងាយប៉ុន្មានពីមាត់ភ្នំភ្លើង ផ្ទះរបស់ប្រជាជនគ្របដណ្តប់ដោយផេះរបស់ផ្សែងភ្នំភ្លើង ដែលមានកម្រាស់៥សង់ទីម៉ែត្រ។
នេះមិនមែនជាលើកទីមួយទេដែលភ្នំភ្លើងកេលុដចាប់មានសកម្មភាព។ តាំងពីសតវត្សរ៍ ទី ១៦ ភ្នំភ្លើងកេលុដផ្ទុះ ព្រួសភ្លើង និងសម្លាប់មនុស្សសរុប ១៥ ០០០នាក់ ដែលនៅក្នុងនោះ ១០ ០០០នាក់ស្លាប់នៅឆ្នាំ ១៥៦៨។ កាលពីដើមខែកុម្ភៈ ភ្នំភ្លើងនៅស៊ីណាប៊ុង បានផ្ទុះ និងសម្លាប់មនុស្ស១៦នាក់។ ការរញ្ជួយដី និងផ្ទុះភ្នំភ្លើងជាបាតុភូតគ្រោះថ្នាក់ធម្មជាតិ ដែលឥណ្ឌូណេស៊ី ឧស្សាហ៍ជួបជាញឹកញយបំផុត។ ប្រទេសនេះដែលផ្តុំដោយប្រជុំកោះ ដែលស្ថិតនៅលើខ្សែបន្ទាត់ភ្នំភ្លើង នៅក្នុងមហាសមុទ្រប៉ាស៊ីហ្វិក កំពុងមានភ្នំភ្លើងដែលនៅមានសកម្មភាព ចំនួន ប្រមាណ ១៣០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ