ដើម្បីប្រឆាំងនឹងការរំលោភផ្លួវភេទ ឥណ្ឌាកំណត់កូតាថ្មីជ្រើសរើសប៉ូលិសភេទស្ត្រី
ប្រឈមមុននឹងអំពើហិង្សាផ្លូវភេទ ចាប់រំលោភស្ត្រី កើនឡើងឥតឈប់ឈរនៅក្នុងប្រទេស រដ្ឋាភិបាលបានសម្រេចនៅថ្ងៃនេះ ដាក់កំរិតឱ្យមានការជ្រើសរើសប៉ូលិសជាស្ត្រីភេទ។ មួយភាគបី នៃភ្នាក់ងារប៉ូលិសជ្រើសរើសថ្មី គឺជាស្ត្រី។
ចុះផ្សាយនៅថ្ងៃ៖
សេចក្តីសម្រេច ដែលក្រុមប្រឹក្សានាយករដ្ឋមន្ត្រីទើបប្រជុំអនុម័តនេះ ជាចំណែកមួយនៃវិធានការពង្រឹងច្បាប់សន្តិសុខសុវត្ថិភាពប្រឆាំងនឹងការរំលោភបំពានផ្លូវភេទលើស្ត្រី និងមានកម្មវត្ថុបញ្ជ្រាបក្នុងជួរប៉ូលិសអំពីអំពើហិង្សាលើស្ត្រី។ ចាប់ពីពេលនេះតទៅ ក្នុងចំណោមភ្នាក់ងារប៉ូលិសជ្រើសរើសថ្មីបីនាក់ មានយ៉ាងហោចណាស់ម្នាក់ជាស្ត្រី។ កូតា បុគ្គលិកប៉ូលិសដោយផ្អែកលើភេទ នឹងត្រូវអនុវត្តក្នុងក្របខ័ណ្ឌ ជ្រើសរើសបុគ្គលិកថា្នក់ភ្នាក់ងារប៉ូលិសដល់ថ្នាក់អធិការរងនៅទូទាំងប្រទេស រាប់ទាំងរដ្ឋធានីញូវដាលីផង។
សូមបញ្ជាក់ថាមកសព្វថ្ងៃនេះ ស្ត្រីតំណាងឱ្យតែ៨%ប៉ុណ្ណោះនៅក្នុងជួរប៉ូលិស នៅឥណ្ឌា។ ជាមួយនឹងកូតាថ្មីនេះ មានស្រ្តីយ៉ាងតិច១០០០នាក់ ក្នុងមួយឆ្នាំៗ នឹងបានទទួលសក្តិយសនិងការងារជាប៉ូលិស។ ថ្វីបើជាចំនួនតិចតួចនៅឡើយមែន ប៉ុន្តែឥណ្ឌាអាចរត់តាមពិភពលោកជាបណ្តើរៗ ដោយអាចបង្កើនចំនួនស្ត្រីនៅក្នុងសេវាប៉ូលិសបាន១% ជារៀងរាល់ឆ្នាំ។
តាមរយៈវិធានការនេះ រដ្ឋាភិបាលឥណ្ឌាសង្ឃឹមថា ស្ត្រីឥណ្ឌានឹងមានទំនុកចិត្តច្រើនជាងមុន មិនខ្លាចនឹងស្វះស្វែងរកអន្តរាគមន៍ពីប៉ូលិស នៅពេលចាំបាច់។ ជាច្រើនឆ្នាំមកដែលរដ្ឋាភិបាលឥណ្ឌាបានខិតខំបញ្ជ្រាបប៉ូលិស (ជាពិសេសនៅរដ្ឋធានី ដែលមិនស្ថិតនៅក្រោមរដ្ឋបាលខ្លួនទាំងស្រុង) ឱ្យយកចិត្តទុកដាក់ស្តាប់និងទទួលពាក្យបណ្តឹងពលរដ្ឋដែលរងការចាប់រំលោភ តែជាទូទៅ និងភាគច្រើន ប៉ូលិសបែរជាបង្ខំឱ្យជនរងគ្រោះបិទមាត់សំងំស្ងៀម ឬខ្លះរងការចោទប្រកាន់តបវិញ ថាជាអ្នកធ្វើឱ្យគេទ្រាំមិនបាន។
ក្រោយហេតុការណ៍ចាប់រំលោភជាក្រុមលើនិស្សិតស្រី កាលពីចុងឆ្នាំ២០១២ មានសេវាពិសេស នៅប៉ុស្តិ៍ប៉ូលិស ចាំទទួលរាល់បណ្តឹងចាប់រំលោភ។ ក្រុមការងារនេះ មានប៉ូលិសតែម្នាក់ជាស្រី។ ដូច្នេះ មានខ្វះប៉ូលិសស្ត្រីខ្លាំងណាស់ក្នុងបំពេញបេសកកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ