ឥណ្ឌូណេស៊ីកាត់ទោសដាក់ពន្ធនាគារជនជាតិអ៊ុយហ្គួរបីនាក់ពីបទភេរវនិយម
ជនជាតិចិន ដើមកំណើតអ៊ុយហ្គួរ បី នាក់ ត្រូវបានតុលាការឥណ្ឌូណេស៊ី កាត់ទោសនៅថ្ងៃចន្ទនេះ ឱ្យជាប់ពន្ធនាគារ៦ឆ្នាំ ពីបទភេរវនិយម បន្ទាប់ពីប៉ុនប៉ងស្វែងរកជួបក្រុមអ៊ីស្លាមជ្រុលនិយម ដែលមានមេខ្លោងប្រកាសភ្ជាប់ខ្លួនទៅអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០១:៥៥
ចាប់ខ្លួនបានកាលពីខែកញ្ញា ឆ្នាំ២០១៤កន្លងទៅ នៅកោះស៊ូឡាវេស៊ី ភាគខាងកើតប្រទេស ពេលដែលជនទាំងបីនាក់ កំពុងសាកល្បងស្វែងរកជួបសកម្មជនអ៊ីស្លាមជ្រុលនិយម ស៊ីយៃ អាប៊ូ វ៉ារដះ សន់តូហ្សូ (Syaihk Abu Wardah Santoso) ប្រមុខចលនាអ៊ីស្លាមជ្រុលនិយមនៅឥណ្ឌូណេស៊ីខាងកើត ម៉ូចាហ៊ីឌីន (Moudjahidines)។
សន់តូហ្សូ ជាមនុស្សដែលឥណ្ឌូណេស៊ីតាមស្វែងបំផុត។ ចលនាអ៊ីស្លាមជ្រុលនិយមនេះ មានសំងំលាក់ខ្លួននៅក្នុងព្រៃប៉ូហ្សូ- សេឡែប និងត្រូវបានចាត់ទុកជាក្រុមជ្រុលនិយមដ៏គ្រោះថ្នាក់បំផុតសម្រាប់ឥណ្ឌូណេស៊ី។ ក្រុមនេះបានធ្វើការវាយប្រហារផ្តាច់ជីវិតជាញយលើកងកម្លាំងប៉ូលិស។
ហេតុដូច្នេះហើយបានជាប្រធានតុលាការស្រុកស៊ូមាត្រា បានសម្រេចប្រកាសដាក់ទោសជនអ៊ុយហ្គួរទាំងបី ថាបានរំលោភច្បាប់ប្រឆាំងភេរវនិយម និងត្រូវជាប់ទោសពីបទបានទាក់ទងនឹងពួកអាក្រក់ មានសកម្មភាពជាភេរវជន។ មិនតែប៉ុណ្ណោះ ជនអ៊ុយហ្គូរទាំងបី បានថែមទាំងរំលោភច្បាប់អន្តោប្រវេសន៍ ដោយហ៊ានប្រើលិខិតឆ្លងដែនក្លែងក្លាយ តាំងខ្លួនជាជនជាតិតួកគី សុំទិដ្ឋាការចូលឥណ្ឌូណេស៊ី។ ដំណើរមកកាន់ឥណ្ឌូណេស៊ី ដែលមានកម្មវត្ថុតែមួយគត់ គឺដើម្បីចូលក្នុងចលនាអ៊ីស្លាមជ្រុលនិយម ម៉ូចាហ៊ីឌីន និងដើម្បីធ្វើភេរវកម្ម។ ជាលទ្ធផល ជនទាំងបី ត្រូវជាប់ទោសក្នុងពន្ធនាគារ ម្នាក់៦ឆ្នាំ និងពិន័យជាប្រាក់ ៦៧៥០អឺរ៉ូ។
អ៊ុយហ្គួរ ជនជាតិភាគតិចកាន់សាសនាអ៊ីស្លាម ដែលមានរស់នៅច្រើនក្នុងខេត្តស៊ីនជាំងប្រទេសចិន ត្រូវរងសង្កត់យ៉ាងខ្លាំង ពីសំណាក់ក្រុងប៉េកាំង និងតែងត្រូវបានអាជ្ញាធរចិន ចង្អុលមុខថាជាភេរវជន។ ឥណ្ឌូណេស៊ី ប្រទេសកាន់សាសនាអ៊ីស្លាមដ៏ច្រើនជាងគេនៅលើពិភពលោក ថ្វីបើបានស្ងប់ស្ងាត់តាំងពីឆ្នាំ២០០៩ក្តី ក៏មាននយោបាយប្រយុទ្ធប្រឆាំងនឹងអំពើភេរវកម្មតឹងរ៉ឹងខ្លាំង ព្រោះការគំរាមកំហែងភេរកម្មនៅតែមានច្រើន ប្រឆាំងនឹងឥណ្ឌូណេស៊ីផ្ទាល់ ជាពិសេសប្រឆាំងនឹងប៉ូលិស និងទេសចរបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ