ឡាវបើកអង្កេតការជួញដូរកីឡាករបាល់ទាត់ក្មេងស្បែកខ្មៅ
សហព័ន្ធបាល់ទាត់ឡាវ បានប្រកាសនៅថ្ងៃអង្គារទី ២១ កក្កដានេះ បើកការស៊ើបអង្កេតមួយ ទាក់ទងនឹងរឿងអាស្រូវ ឡាវចុះហត្ថលេខាជ្រើសរើសយកកីឡាករបាល់ទាត់អាហ្វ្រិក មិនទាន់គ្រប់អាយុ មកធ្វើការក្នុងក្លឹបកីឡារបស់ខ្លួន ព្រមទាំងផ្តល់ប្រាក់ខែមិនសមរម្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ដើមហេតុដែលនាំឱ្យអាជ្ញាធរកុម្មុយនិស្តឡាវ ចាប់ផ្តើមបើកអង្កេតរឿងអាស្រូវជ្រើសរើសកីឡាករបាល់ទាត់ឡាវ គឺបន្ទាប់ពីទូរទស្សន៍BBC បានផ្សព្វផ្សាយទម្លាយថាមានក្មេងជំទង់អាហ្វ្រិកជាច្រើននាក់ កំពុងហ្វឹកហាត់នៅក្លឹបកីឡាបាល់ទាត់ ចម្បារសាក់យូណាធីត នាខេត្តប៉ាក់សេ ភាគខាងត្បូងប្រទេសឡាវ។
ខ្លះ១៥ឆ្នាំ ខ្លះទៀត ដូចករណី កេសេលី កាម៉ារ៉ា ជាតិនីហ្សេរីយ៉ាទើបតែ១៤ឆ្នាំ មានសរុបប្រមាណ២៣នាក់ បានបរិហារអំពីលក្ខខណ្ឌ ទទួលឱ្យហាត់រៀននិងរស់នៅយ៉ាប់យឺន ក្នុងបន្ទប់ដេកតូចចង្អៀត ៣០នាក់ក្នុងមួយបន្ទប់ ហើយខ្លះត្រូវក្រាលដេកផ្ទាល់ដីផង។
បើតាមទូរទស្សន៍នេះដដែល កីឡាករអាហ្វ្រិកប្រមាណ១៧នាក់ ទើបបានចាកចេញពីក្លឹបឡាវ កាលពីបីខែមុន បន្ទាប់ពីសហព័ន្ធកីឡាបាល់ទាត់អន្តរជាតិ FIFA បានរកឃើញរឿងអាស្រូវជួញដូរកីឡាករជំទង់នេះ ប៉ុន្តែ៦នាក់ផ្សេងទៀតបានជ្រើសរើសបន្តលេងឱ្យក្លឹបឡាវដដែល។
ឆ្លើយនឹងសំណួររបស់ភ្នាក់ងារសារព័ត៌មានបារាំង អ្នកទទួលខុសត្រូវក្លឹប បានច្រានចោលថាមិនបានប្រើប្រាស់ប្រាក់ខែដើម្បីទាក់ទាញកីឡាករអាហ្វ្រិកក្មេងៗទេ។ ក្លឹបបាល់ទាត់ចម្បារសាក់យូណាយធីត បានបើកកម្មវិធីជ្រើសរើសកីឡាករ ពីអាយុ១៧ទៅ២០ឆ្នាំ ដោយផ្តល់ការសិក្សា និងការហ្វឹកហាត់ ពីគ្រូបង្ហាត់បរទេស។ ជាមួយកិច្ចសន្យានេះ កីឡាករម្នាក់ៗនឹងបានទទួលមកវិញ នូវទីជម្រកស្នាក់នៅ ហូបចុក និងប្រាក់ខែ១០០ដុល្លារក្នុងមួយថ្ងៃ។
ដើម្បីលើកកម្ពស់សមត្ថភាពក្រុម ក្លឹបកីឡានៅអាស៊ីអាគ្នេយ៍ បានទាក់ទាញយកកីឡាករអាហ្វ្រិកកាន់តែច្រើនឡើងៗ ព្រោះតម្លៃកីឡាករថោក។ កីឡាករអាហ្វ្រិកទាំងនេះខ្លះក៏បានក្លាយជាជនរងគ្រោះ ព្រោះទឹកលុយកខ្វក់ ឬនៅពេលកិច្ចសន្យាការងារត្រូវផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ