ថៃរងភេរវកម្មបំផ្ទុះគ្រាប់បែកកណ្តាលក្រុងបាងកក
មានស្លាប់យ៉ាងហោចណាស់ ១២នាក់ និងរបួសជាច្រើននាក់ (តុល្យការបណ្តោះអាសន្ន) នៅក្នុងគ្រោះថ្នាក់ ផ្ទុះគ្រាប់បែកមួយ នាល្ងាចថ្ងៃចន្ទនេះ វេលាម៉ោងជិត ៧ល្ងាច ម៉ោងនៅក្នុងស្រុក មុខបរិវេណ ទីសក្ការៈ ព្រះភូមិ ប្រាក់ព្រហ្ម និងមជ្ឈមណ្ឌលពាណិជ្ជកម្មដ៏ធំមួយកណ្តាលក្រុងបាងកក។ នេះបើតាមប្រភពភ្នាក់ងារសារព័ត៌មានបារាំង AFP។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
“គឺជាគ្រាប់បែក ផ្សំពីម្សៅ TNT ដែលធ្វើឡើងដោយក្នុងបំណងវាយប្រហារលើជនបរទេស បំផ្លាញវិស័យទេសចរណ៍ និងសេដ្ឋកិច្ចជាតិ" ! នេះជាសេចក្តីថ្លែងការណ៍របស់រដ្ឋមន្ត្រីក្រសួងការពារជាតិ លោក ប្រាវិត វង្សស៊ុវង្ស Prawit Wongsuwong។
ក្រោយហេតុការណ៍បំផ្ទុះម៉ូតូភ្លាម សាកសពជាច្រើនបានខ្ទាតដាច់រាយប៉ាយ នៅកន្លែងកើតហេតុ មុខទីព្រះភូមិ អេរ៉ាវ៉ាន់ កណ្តាលក្រុងបាងកក និងព័ទ្ធជុំវិញ ដោយមជ្ឈមណ្ឌលពាណិជ្ជកម្ម ព្រមទាំងអាគារខ្ពស់ៗ កប់ពពក។ នេះបើតាមប្រភពរបស់ភ្នាក់ងារសារព័ត៌មានបារាំង នៅផ្ទាល់នឹងកន្លែង។
លោក ចាក់ថីព ជីចិន្តា Chakthip Chijinda មេប៉ូលិសក្រុងបាងកក បានអះអាង ក្នុងទូរទស្សន៍ប៉ុស្តិ៍លេខ៩ថា បើតាមការសង្កេតបឋម “មានមនុស្សស្លាប់យ៉ាងហោចណាស់ ១០នាក់ និងរបួសជាច្រើននាក់”! ហើយគ្រាប់បែកទំនងជាត្រូវបានយកមកបង្កៃនៅក្នុងទីលានអារាម។ ប៉ុន្តែ សម្រាប់ពេលភ្លាមៗដូច្នេះ គេពុំទាន់អាចបញ្ជាក់ព័ត៌មាន និងអំពីចំនួនមនុស្សស្លាប់ពិតប្រាកដនៅឡើយទេ គឺបានត្រឹមប្រកាសថាពិតជាមានគ្រាប់បែកផ្ទុះមួយគ្រាប់ ដែលប៉ូលិសថៃកំពុងត្រួតពិនិត្យនិងអង្កេត។
ប៉ូលិស និងក្រុមសង្គ្រោះជាច្រើននាក់បានរួសរាន់មកដល់កន្លែងកើតហេតុ និងដោយមានជំនួយពីយោធាផង ព្រោះសូមបញ្ជាក់ ក្រោយស្នូរផ្ទុះ ប៉ូលិសថៃបានរកឃើញគ្រាប់បែកមួយគ្រាប់ទៀត បង្កៃនៅជិតកន្លែងផ្ទុះទីមួយ។
ពុំទាន់មានក្រុម ឬជនណាប្រកាសទទួលសកម្មភាពភេរវកម្មបំផ្ទុះគ្រាប់បែកទេ ប៉ុន្តែ កន្លងមក ថៃតែងបានជួបនិងស្គាល់នូវសកម្មភាពភេរវកម្មបំផ្ទុះគ្រាប់បែក ពីសំណាក់ក្រុមអ៊ីស្លាមជ្រុលនិយម បះបោរចង់ផ្តាច់ទឹកដីកំរិតមធ្យម នៅភាគខាងត្បូងបំផុតនៃប្រទេស។
តែថ្ងៃចន្ទនេះ គ្រាប់បែកបានផ្ទុះនៅមុខទីសក្ការៈអេរ៉ាវ៉ាន់ ជាទីអារាមបែបព្រហ្មសាសនា តែជាទីពេញនិយម ទទួលស្វាគមន៍អ្នកកាន់ព្រះពុទ្ធសាសនា និងទេសចររាប់ពាន់នាក់ចូលទស្សនាជារៀងរាល់ថ្ងៃ។ អារាមនេះមានទីតាំងនៅតាមបណ្តោយរុក្ខវិថីដ៏ធំមួយរបស់ក្រុងបាងកក ដែលជាបណ្តុំសណ្ឋាគារល្អប្រណិតៗ ជាទីដ៏ពេញនិយមសម្រាប់ក្រុមទេសចរបរទេស ពិសេសទេសចរមកពីអាស៊ីខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ