ប៉េកាំងធ្វើអន្តរាគមន៍ជាថ្មីដើម្បីទ្រទ្រង់ទីផ្សារភាគហ៊ុនចិនកុំដាំក្បាល
ទីផ្សារមូលបត្រសៀងហៃបានបើកទ្វារវិញហើយនៅថ្ងៃអង្គារ ជាមួយនឹងការធ្លាក់ថ្លៃបន្តិចបន្តួចប៉ុណ្ណោះ បើប្រៀបទៅនឹងថ្ងៃម្សិលមិញ។ នេះគឺជាលទ្ធផលនៃអន្តរាគមន៍របស់អាជ្ញាធរ។ បើតាមសេចក្តីថ្លែងការណ៍ ធនាគារប្រជាជនចិន (ធនាគារកណ្តាល) បានចាក់បញ្ចូលសាច់លុយ ១៣០ពាន់លានយ័ន នៅថ្ងៃអង្គារទៅក្នុងទីផ្សារភាគហ៊ុន ដើម្បីទប់ស្កាត់កុំឱ្យទីផ្សារមូលបត្រដាំក្បាលខ្លាំងពេក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ធនាគារជាតិចិនបង្ខំចិត្តចាក់សាច់លុយបញ្ចូល ធ្វើដើម្បីទប់ទីផ្សារមូលបត្រកុំឱ្យដាំក្បាលចុះខ្លាំងពេក។ មិនតែប៉ុណ្ណោះ ធនាគារប្រជាជនចិន បានថែមទាំងចាប់ផ្តើមទិញភាគហ៊ុន ដូចអ្វីដែលអាជ្ញាធរចិនធ្លាប់បានធ្វើកាលពីរដូវក្តៅឆ្នាំ២០១៥ ពេលទីផ្សារភាគហ៊ុនចិនបានស្គាល់ភាពវឹកវរខ្លាំង។
សូមបញ្ជាក់ថា នៅថ្ងៃចន្ទទី ៤ មករា ម្សិលមិញ ទីផ្សារភាគហ៊ុនចិន បានដាំក្បាលចុះជាថ្មីទៀត អស់៧% ហើយទីផ្សារមូលបត្រក៏ត្រូវបានបិទទ្វារ ដោយស្វ័យប្រវត្តិ ទាំងកណ្តាលថ្ងៃ បន្ទាប់តម្លៃភាគហ៊ុនបានធ្លាក់ចុះអស់៥% ស្របតាមវិធានការថ្មីរបស់រដ្ឋាភិបាល ទើបចូលជាធរមានដំបូងភ្លាម។
ក្រោយភាពវឹកវរហិរញ្ញវត្ថុ កាលពីខែកក្កដា២០១៥មក រដ្ឋាភិបាលប៉េកាំង បានប្រកាសកាលពីថ្ងៃទី៤ធ្នូ ចាត់វិធានការបិទទ្វារទីផ្សារភាគហ៊ុន ដោយស្វ័យប្រវត្តិប្រសិនបើឃើញមានការធ្លាក់ថ្លៃដល់៥%។ ដើម្បីធានារ៉ាប់រងដល់អ្នកវិនិយោគ គណៈកម្មាការចាត់ចែងទីផ្សារហិរញ្ញវត្ថុចិន ទំនងជាបានប្រកាសស្នើសុំមិនឱ្យក្រុមហ៊ុនធំៗ មានភាគហ៊ុនចាប់ពី៥%ទៅហ៊ុនរបស់ខ្លួនទេ។ ការហាមឃាត់នេះត្រូវអស់សុពលភាពនៅថ្ងៃទី ៨មករា ប៉ុន្តែអាជ្ញាធរចិនទំនងជាពន្យារពេលបន្តទៀត។
គណៈកម្មាការចាត់ចែងទីផ្សារហិរញ្ញវត្ថុ មិនបានបញ្ជាក់ព័ត៌មាននេះទេ ប៉ុន្តែបានអះអាងនៅព្រឹកថ្ងៃអង្គារនេះថាកំពុងរៀបចំបញ្ចប់វិធាននៃការលក់ហ៊ុនរបស់អ្នកមានភាគហ៊ុនធំៗ។ វិធានការថ្មីនឹងត្រូវបង្ហាញជាសាធារណៈក្នុងពេលឆាប់ៗនេះ។
ការលូកដៃរបស់រដ្ឋាភិបាល កំពុងចោទសំណួរយ៉ាងខ្លាំងអំពីតួនាទីរបស់ទីផ្សារហិរញ្ញវត្ថុ ដែលប៉េកាំងធ្លាប់សន្យាតាំងពីយូរមកហើយផង និងការព្រួយបារម្ភចំពោះសុខភាពសេដ្ឋកិច្ចប្រទេសផង។ កំណើនសេដ្ឋកិច្ចចិនដែលម៉ាស៊ីនអូសទាញពិភពលោក បានបន្ថយល្បឿនខ្លាំង នៅត្រីមាសទីបីឆ្នាំ២០១៥ និងទាបមិនធ្លាប់មានទេក្នុងរយៈពេល២៥ឆ្នាំចុងក្រោយនេះ។ អត្រាកំណើនសេដ្ឋកិច្ចប្រចាំឆ្នាំ២០១៥នឹងត្រូវផ្សព្វផ្សាយនៅថ្ងៃទី១៩មករា ២០១៦ សប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ