មូលនិធិរូបិយវត្ថុអន្តរជាតិប្រមើលឃើញសេដ្ឋកិច្ចពិភពលោកអាប់អួរ
សេដ្ឋកិច្ចពិភពលោកអាចនឹងធ្លាក់ចុះ ខុសពីការរំពឹងទុក ដោយហេតុតែវិបត្តិបោកបក់នៃទីផ្សារមូលប័ត្រ និងបើគ្មានការចាត់ចែងអន្តរកាលសេដ្ឋកិច្ចឱ្យបានត្រឹមត្រូវទេនោះ! អង្គការមូលនិធិរូបិយវត្ថុបានផ្សព្វផ្សាយការព្យាករ នៅថ្ងៃអង្គារនេះបញ្ចុះកំណើនសេដ្ឋកិច្ច និងបានចេញសេចក្តីព្រមាន ក្រោយឃើញចិនបន្ថយល្បឿនសេដ្ឋកិច្ច និងភាពមិនច្បាស់លាស់របស់បណ្តាប្រទេសមានសេដ្ឋកិច្ចកំពុងលូតលាស់ផ្សេងទៀត។
ចុះផ្សាយនៅថ្ងៃ៖
មូលនិធិរូបិយវត្ថុអន្តរជាតិហាក់មានទុទ្ទិដ្ឋនិយមខ្លាំង ! អង្គការបានបញ្ចុះកំណើនសេដ្ឋកិច្ចពិភពលោកឆ្នាំ២០១៦ មកត្រឹម៣,៤% និង៣,៦%នៅឆ្នាំ២០១៧។ មិនតែប៉ុណ្ណោះ អង្គការប្រមើលមើលឃើញថា ពិភពលោកអាចនឹងដើរលើគន្លងសេដ្ឋកិច្ចដ៏រអាក់រអួល ជាពិសេសសម្រាប់ក្រុមប្រទេសកំពុងអភិឌ្ឍន៍មានសេដ្ឋកិច្ចលូតលាស់ខ្លាំង។ ក្រុមប្រទេសដែលតំណាងឱ្យដល់ទៅ៧០%នៃកំណើនសេដ្ឋកិច្ចពិភពលោកទាំងមូល មានកំណើនសេដ្ឋកិច្ចបន្ថយល្បឿន ជាទូទៅ។
ដំបូងគេបង្អង់គឺចិន ! ចិនកំពុងឆ្លងអន្តរកាលឆ្ពោះទៅរកគំរូសេដ្ឋកិច្ច ដែលពឹងលើការចំណាយក្នុងស្រុក។ ការនេះបានធ្វើឱ្យទីផ្សារពិភពលោករង្គោះរង្គើ និងបានផ្តល់ផលវិបាកយ៉ាងខ្លាំងដល់ប្រទេសកំពុងអភិវឌ្ឍផ្សេងទៀត ព្រោះតម្លៃវត្ថុធាតុដើមដាំដូង តម្លៃប្រេងឆៅធ្លាក់ថ្លៃក្រោម៣០ដុល្លារក្នុងធុង តម្លៃផលិតផលក្នុងវិស័យជាច្រើនក៏ត្រូវធ្លាក់ចុះ (អ្នកទិញសប្បាយ តែអ្នកធ្វើយំមិនចេញ)។ ថ្វីដ្បិតតែមូលនិធិរូបិយវត្ថុមិនបញ្ចុះការព្យាករកំណើនសេដ្ឋកិច្ចចិនឆ្នាំ២០១៦ (៦,៣%)មែន ប៉ុន្តែបានព្រមានថាការបន្ថយល្បឿនមានលក្ខណៈខ្លាំងជាងការគិត។
បន្ថែមពីការជាប់ទណ្ឌកម្ម រុស្ស៊ី ក៏ដូចជាប្រេស៊ីល ដែលមានសេដ្ឋកិច្ចដើរថយក្រោយហើយ ត្រូវប្រឈមនឹងភាពមិនជាក់លាក់នយោបាយទៀត។ មហាយក្សនៅអាហ្វ្រិកឡាទីន ប្រេស៊ីល គ្មានកំណើនសេដ្ឋកិច្ចបានអូសទាញប្រទេសក្នុងតំបន់ឱ្យដើរថយក្រោយជាមួយដែរ។ មានតំបន់អាហ្វ្រិកមួយប៉ុណ្ណោះ ដែលមានទិដ្ឋភាពសេដ្ឋកិច្ចស្រស់ថ្លាជាងគេ ជាមួយនឹងកំណើន ៤%នៅឆ្នាំ២០១៦។
ចំណែកខាងប្រទេសឧស្សាហកម្មវិញ អាមេរិកនៅតែនាំមុខគេខ្លាំង ជាមួយនឹងកំណើនសេដ្ឋកិច្ចធ្លាក់ចុះតិចតួច។ រីឯតំបន់អឺរ៉ូរបស់អឺរ៉ុប ផ្តើមងើបឡើងវិញបន្តិចម្តងៗហើយ។ តែលំហូរអន្តោប្រវេសន៍កំពុងក្លាយជាបន្ទុកធ្ងន់ ជាពិសេសលើទីផ្សារការងារ បូកផ្សំនឹងវិបត្តិភេរវកម្ម និងអស្ថិរភាពនៅតំបន់ដើមបូព៌ាទៀត មូលនិធិរូបិយវត្ថុពិតមានហេតុផលគ្រប់គ្រាន់ ត្រូវខ្វល់ខ្លាចភាពតានតឹងពាក់ព័ន្ធនឹងភូមិសាស្ត្រនយោបាយ រាលដាលទៅប៉ះពាល់ដល់ទំនុកចិត្តនិងដល់ពាណិជ្ជកម្មពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ