សមុទ្ទចិនខាងត្បូង ៖ ចិនពង្រាយមីស៊ីល ពេលអាមេរិកនិងអាស៊ានចង់ចាត់វិធានការជាក់ស្តែង
ជំនួបកំពូលអាស៊ាន អាមេរិក បានបិទបញ្ជប់ ជាមួយការអំពាវនាវរបស់លោកអូបាម៉ា ឱ្យប្រទេសថៃ វិលត្រលប់ទៅបង្កើតរដ្ឋាភិបាលស៊ីវិល និងជាពិសេសបានប្រកាសចង់ចាត់វិធានការ ជាក់ស្តែង ដើម្បីកាត់បន្ថយសម្ពាធតានតឹងនៅសមុទ្ទចិនខាងត្បូង។ ប៉ុន្តែ ក្នុងពេលដែល អាមេរិកនិងអាស៊ាន ចង់ដោះស្រាយជម្លោះ ដោយសន្តិវិធី គេបានទទួលព័ត៌មានមកថា ចិនទំនងជាកំពុងពង្រាយមីស៊ីលនៅសមុទ្ទចិនខាងត្បូង។
ចុះផ្សាយនៅថ្ងៃ៖
ស្តាប់ - ០៦:១១
ជំនួបកំពូលនេះ បានបិទបញ្ចប់ទៅ ដោយមានសេចក្តីថ្លែងការណ៍រួម សន្យាសហការកាន់តែស្អិតល្មួត លើគ្រប់វិស័យ ចំនួន១៧ចំណុច សំខាន់ៗ ដូចជា ការគោរពគ្នាទៅវិញទៅមកលើផ្នែកអធិបតេយ្យភាព បូរណភាពដែនដី សមភាព និងឯករាជភាពនយោបាយ ច្បាប់អន្តរជាតិ ការប្រយុទ្ធប្រឆាំងនឹងអាកាសធាតុ ការរក្សាសន្តិភាព សន្តិសុខ ស្ថិរភាព នៅតំបន់ នៅលើពិភពលោក ក្នុងដែនទឹក តាមបណ្តាញអ៊ីនធ័រនែត និងពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម។
អាស៊ានដៃគូយុទ្ធសាស្ត្រនិងជានិរន្តរបស់អាមេរិក
លោកប្រធានាធិបតីអាមេរិក បានប្រកាសនៅល្ងាចមិញ អំពីវិធានការមួយចង្កោមសម្រាប់ជំរុញសេដ្ឋកិច្ចតំបន់អាស៊ីអាគ្នេយ៍ ដែលមានសេដ្ឋកិច្ចក្មេងខ្ចី មានកំណើនលឿន អាចក្លាយជាដៃគូពាណិជ្ជកម្មកាន់តែសំខាន់ឡើងៗសម្រាប់អាមេរិក និងពិភពលោក។ ដើម្បីសម្រេចបំណងនេះ ការិយាល័យសេដ្ឋកិច្ចបីនឹងត្រូវបើកនៅ ក្រុងហ្សាការតា បាងកក និងសិង្ហបុរី ដើម្បីសម្របសម្រួលសកម្មភាពសេដ្ឋកិច្ចរវាងសហគ្រិន វិនិយោគិន ក្រុមហ៊ុននិងអ្នកផ្សេង។
លោកអូបាម៉ាក៏បានសន្យា ជាលក្ខណៈដាច់ដោយឡែកពីអាស៊ាន ជាមួយបណ្តាប្រទេសជាសមាជិកមួយចំនួនទៀត ថាអាមេរិកនឹងគាំទ្រដោយឥតងាករេ សមាជិកអាស៊ានណា ដែលដឹកនាំប្រទេសល្អ មានការទទួលខុសត្រូវ គោរពច្បាប់ គោរពសិទ្ធិមនុស្ស ដោយបានបញ្ជាក់ពីការគាំទ្រជាពិសេសដល់ពលរដ្ឋភូមាក្នុងដំណើរស្វែងរកប្រធានាធិបតីថ្មិ ការផ្សះផ្សាជាតិ មិនបិទបញ្ចប់ការប្រយុទ្ធគ្នាជាមួយពួកឧទ្ទាមប្រដាប់អាវុធ និងបានអំពាវនាវឱ្យថៃវិលត្រលប់មកកាន់របបប្រជាធិបតេយ្យ មានរដ្ឋាភិបាលជាស៊ីវិល។
វិធានការជាក់ស្តែង ក្នុងវិបត្តិសមុទ្ទចិនខាងត្បូង
ថ្វីបើជំនួបនេះ សម្រេចបាននូវកិច្ចព្រមព្រៀងគ្នាពង្រឹងពង្រីកភាពជាដៃគូគ្នារវាងអាស៊ាននិងអាមេរិកមែន ក៏ប៉ុន្តែគោលគំនិតសំខាន់ៗរបស់លោកអូបាម៉ា គឺការអោបក្រសោបអាស៊ាន ដើម្បីទប់មហិច្ឆតាចិន និងដើម្បីបន្ធូរបន្ថយសម្ពាធ ដែលបង្កឡើងដោយជម្លោះនៅសមុទ្ទចិនខាងត្បូង។ សមុទ្ទចិនខាងត្បូង ដែលជាផ្លូវចរាចរណ៍អន្តរជាតិដ៏សំខាន់ តំណាងឱ្យ៤០%នៃសកម្មភាពផ្លូវសមុទ្ទពិភពលោក។
តាំងពីជំនួបកំពូលមិនទាន់បើកទ្វារម្ល៉េះ ដែលអាមេរិកបដិសេធដាច់ខាត ថាមិនមែនហៅអាស៊ានមកជួបដើម្បីផ្តុំកម្លាំងប្រឆាំងនឹងចិនទេ ព្រោះអាមេរិកមិនត្រូវការប្រឈមមុខនឹងចិន ដោយត្រង់ៗ នាំឱ្យខូចប្រយោជន៍ធំឡើយ តែចង់ដើរតួជាទីពំនាក់របស់ប្រទេសតូចៗ ឬប្រើប្រទេសតូចៗឱ្យជួយទប់ឥទ្ធិពលគូប្រជែង។ ហើយដើម្បីលើកទឹកចិត្តអាស៊ាន អាមេរិកបានសន្យាថានឹងបន្តហោះហើរ បណ្តែតខ្លួន និងបង្ហាញវត្តមាននៅគ្រប់ទិសទី ដែលមានច្បាប់អន្តរជាតិអនុញ្ញាត ដើម្បីការពារនិងគាំទ្រសិទ្ធិរបស់ប្រទេសនីមួយៗ។
លោកអូបាម៉ា បានប្រើភាសាការទូតច្រើន ណែនាំសមាជិកអាស៊ាន ដើម្បីជាសារវាយប្រហារសំដៅលើចិ អំពាវនាវឱ្យមានវិធានការជាក់ស្តែង ដោះស្រាយវិបត្តិដោយសន្តិវិធី។ វិធានការនោះគឺ បញ្ឈប់ការរៀបចំថ្មី សាងសង់ថ្មី បញ្ចប់ការបំពាក់អាវុធនៅតំបន់ជាប់ជម្លោះ។
ចិនពង្រាយប្រព័ន្ធមីស៊ីលនៅប្រជុំកោះប៉ារ៉ាសែល
ប្រព័ន្ធឃោសនាព័ត៌មានអាមេរិក FoxNews បានជូនដំណឹងដំបូងគេ អំពីការដាក់ពង្រាយមីស៊ីល នៅលើកោះ យ៉ុងស៊ីង Yongxing ឬកោះព្រៃនៃប្រជុំកោះប៉ារ៉ាសែល ក្នុងសមុទ្ទចិនខាងត្បូង។ បន្ទាប់មកទើបមន្ទីរប៉ង់តាហ្កោននិងក្រសួងការពារជាតិតៃវ៉ាន់បញ្ជាក់តាមក្រោយ។ បើតាមប្រភពអាមេរិក មីស៊ីលពីរគ្រឿង មានកាណុងបាញ់៨ ប្រភេទ HQ-9 ជាប្រព័ន្ធមីស៊ីលការពារអាកាសបាញ់ពីដី បានចម្ងាយ២០០គីឡូម៉ែត្រ ត្រូវបានទៅដាក់ពង្រាយលើកោះ យ៉ុងស៊ីង ក្នុងតំបន់ប្រជុំកោះប៉ារ៉ាសែល នៃសមុទ្ទចិនខាងត្បូង នៅពេលមួយសប្តាហ៍កន្លងទៅនេះ។ ប៉ុន្តែ ក្រុងប៉េកាំងច្រានចោលដាច់ខាត ព័ត៌មាននេះ និងបានបន្ទោសសារព័ត៌មានបស្ចឹមប្រទេសថាចេះតែបង្កើតរឿង។
តៃវ៉ាន់បានខឹងសម្បារខ្លាំងណាស់ ប៉ុន្តែបើតាមអ្នកវិភាគនិងអ្នកឯកទេស នេះមិនមែនជាលើកទីមួយទេ ដែលចិនបានចាត់វិធានការដាក់ពង្រាយមីស៊ីលនៅប្រជុំកោះប៉ារ៉ាសែល ដែលចិនគ្រប់គ្រងតាំងពីឆ្នាំ១៩៧៤មក។
ត្រឹមមីស៊ីលបាញ់ពីដី ទំនងជាគ្មានការគំរាមកំហែងអ្វីខ្លាំងទេ។ ក្នុងពេលដែលសមាជិកអាស៊ាន មានជាប់ជម្លោះដែនដីជាមួយចិន ស្វែងរកការគាំទ្រពីអាមេរិក នៅអាមេរិក ចិនក៏ទំនងជាត្រូវការបញ្ចេញចម្លើយតបវិញ តាមរយៈការដាក់ពង្រាយមីស៊ីល ដើម្បីបញ្ជាក់ពីសេរីភាព និងភាពជាអ្នកគ្រប់គ្រងតែម្នាក់ឯងលើតំបន់សមុទ្ទចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ