ឥណ្ឌា-អង់គ្លេស៖លោកស្រី Theresa May បំពេញទស្សនកិច្ចនៅឥណ្ឌាដើម្បីរៀបចំនៅក្រោយ Brexit
នៅថ្ងៃចន្ទ ទី៧ វិច្ឆិកានេះ លោកស្រីនាយករដ្ឋមន្រ្តីអង់គ្លេស Theresa May ផ្តើមទស្សនកិច្ចរយៈពេល ៣ថ្ងៃក្នុងប្រទេសឥណ្ឌា។ គឺជាទស្សនកិច្ចលើកទី១ របស់លោកស្រីនៅក្រៅទឹកដីអឺរ៉ុប និងចំពេលដែលអង់គ្លេសកំពុងរៀបចំខ្លួនចាកចេញពីសមាជិកសហភាពអឺរ៉ុប។ គោលដៅអាទិភាពរបស់លោកស្រី Theresa May នៅក្នុងប្រទេសឥណ្ឌា គឺចរចាស្វែងរកកិច្ចព្រមព្រៀងពាណិជ្ជកម្មជាមួយឥណ្ឌា។
ចុះផ្សាយនៅថ្ងៃ៖
ស្តាប់ - ០២:១៦
តាំងពីឡើងកាន់តំណែងនាយករដ្ឋមន្រ្តីអង់គ្លេសក្នុងខែកក្កដា នេះជាលើកទី១ ដែលលោកស្រី Theresa May បានដាក់ជើងជាន់ប្រទេសមួយដែលមិនមែនជាទឹកដីអឺរ៉ុប។ តែលោកស្រីបានសន្យាថា អង់គ្លេសនឹងមិនបែរខ្នងដាក់អឺរ៉ុបទេ នៅពេលដែលអង់គ្លេសបានលែងលះពីអឺរ៉ុបជាផ្លូវការនោះ។ “យើងចង់ឲ្យអង់គ្លេសក្លាយជាប្រទេសចូលរួមយ៉ាងសកម្មនៅក្នុងការដោះដូរពាណិជ្ជកម្មក្នុងលោក” នេះជាការថ្លែងរបស់លោកស្រី Theresa May ក្នុងទីក្រុងញូដែលីនាថ្ងៃចន្ទ ទី៧ វិច្ឆិកានេះ។
លោកស្រី Theresa May បានបន្ថែមថា ការដោះដូរពាណិជ្ជកម្មនឹងជួយបង្កើតការងារ បង្កើនការវិនិយោគ និងបង្កើនផលិតកម្ម ហើយដែលទាំងអស់នេះនឹងជួយបង្កើនជីវភាព និងគុណភាពជិវិតរស់នៅរបស់ប្រជារាស្រ្តអង់គ្លសេ។ គេសង្កេតឃើញថា លោកស្រី Theresa May បាននាំទៅជាមួយនូវប្រធានក្រុមហ៊ុន និងរោងចក្រសហគ្រាសអង់គ្លេស រួមទាំងអ្នកជំនួញអង់គ្លេសគ្រាក់ៗនាដំណើរទស្សនកិច្ចក្នុងប្រទេសឥណ្ឌាពេលនេះ។
សូមជម្រាបជូនថា ដរាបណាអង់គ្លេសមិនទាន់ចាកចេញពីសហភាពអឺរ៉ុបជាផ្លូវការ ដរាបនោះអង់គ្លេសមិនអាចចុះហត្ថលេខាលើកិច្ចព្រមព្រៀងពាណិជ្ជកម្មជាលក្ខណៈទ្វេភាគីជាមួយប្រទេសបានឡើយ។ តែទោះជាយ៉ាងនេះក្តី ទស្សនកិច្ចរបស់លោកស្រី Theresa May នៅក្រៅទឹកដីអឺរ៉ុបពេលនេះជាសក្ខីកម្មមួយដែលបញ្ជាក់ថា លោកស្រីបាន និងកំពុងផ្តើមរៀបចំផែនការជាបណ្តើរៗដើម្បីភាពម្ចាស់ការរបស់ប្រទេសអង់គ្លេស។
នៅខាងឥណ្ឌាវិញ លោកនាយករដ្ឋមន្រ្តីណារ៉េនដ្រា ម៉ូឌីបានថ្លែងថា វាពិតជារឿងសំខាន់ខ្លាំងណាស់ដែលឥណ្ឌា និងអង់គ្លេសត្រូវធ្វើការរួមគ្នាដើម្បីសេដ្ឋកិច្ចចំណេះដឹងសម្រាប់សតវត្សទី២១។ ក្នុងនាមជាអតីតម្ចាស់អាណានិគមលើឥណ្ឌា អង់គ្លេសជាប្រទេសវិនិយោគលំដាប់ទី៣ នៅឥណ្ឌា ហើយឥណ្ឌាក៏ជាប្រទេសវិនិយោគលំដាប់ទី៣ នៅអង់គ្លេសដែរ។ តែគេកត់សម្គាល់ឃើញថា ការចរចាដើម្បីទទួលបានកិច្ចព្រមព្រៀងពាណិជ្ជកម្មណាមួយពីឥណ្ឌាមិនមែនជារឿងងាយស្រួលទេ។
ជាក់ស្តែងជាមួយសហភាពអឺរ៉ុប ឥណ្ឌា និងអឺរ៉ុបបានចរចាគ្នាអស់រយៈពេលជិត ១០ឆ្នាំដើម្បីអនុម័តលើកិច្ចព្រមព្រៀងដោះដូរពាណិជ្ជកម្មរវាងគ្នា តែនៅមិនទាន់បានសម្រេចនៅឡើយទេមកទល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ