ចិន៖អតីតមេធាវីជាំង ធៀនយុងជាប់ចោទពីបទទម្លាយរឿងសម្ងាត់របស់រដ្ឋឲ្យបរទេស
នៅក្នុងប្រទេសចិន ក្រុមគ្រួសាររបស់លោកជាំង ធៀនយុងទើបបានទទួលដំណឹងពីលោកជាំង ធៀនយុង បន្ទាប់ពីបានបាត់ដំណឹងសូន្យឈឹងតាំងពីខែវិច្ឆិកាមក។ គឺជាដំណឹងមិនល្អទាល់តែសោះ ព្រោះសកម្មជនសិទ្ធិមនុស្ស និងជាអតីតមេធាវីរូបនេះត្រូវបានប៉ូលិសចោទប្រកាន់ពីបទផ្សព្វផ្សាយរឿងសម្ងាត់របស់រដ្ឋទៅបរទេស។ ការចោទប្រកាន់នេះបានធ្លាក់មក ប៉ុន្មានថ្ងៃក្រោយពីឧត្តមស្នងការសិទ្ធិមនុស្សអន្តរជាតិសម្តែងក្តីបារម្ភចំពោះការបាត់ខ្លួនលោកជាំង ធៀនយុង។
ចុះផ្សាយនៅថ្ងៃ៖
ស្តាប់ - ០២:២១
អស់រយៈពេល ២៥ថ្ងៃគត់ដែលក្រុមគ្រួសាររបស់លោកជាំង ធៀនយុងបានបាត់ដំណឹងសូន្យឈឹងពីលោកយុង។ ដំណឹងចុងក្រោយដែលសកម្មជនសិទ្ធិមនុស្ស និងអតីតមេធាវីរូបនេះបានជួបក្រុមគ្រួសារតាមទូរស័ព្ទ គឺនៅពេលដែលលោកត្រៀមឡើងជិះរថភ្លើងពីស្ថានីយ៍ចាងសាទៅកាន់ទីក្រុងប៉េកាំងក្នុងថ្ងៃទី២១ វិច្ឆិកា។ តែនៅពេលធ្វើដំណើរដល់ទីក្រុងប៉េកាំងក្នុងថ្ងៃដដែល លោកជាំង ធៀនយុងមិនបានផ្តល់ដំណឹងឲ្យគ្រួសារ ហើយគ្រួសារក៏មិនបានទទួលដំណឹងអ្វីបន្តិចសោះពីលោកជាំង ធៀនយុង។
សូមជម្រាបជូនថាក្នុងនាមជាមេធាវីម្នាក់ លោកជាំង ធៀនយុងច្រើនចេញមុខការពារសំណុំរឿងរសើបៗ ដូចយ៉ាងការពារជនរងគ្រោះដោយម្សៅទឹកដោះគោមានជាតិពុលក្នុងឆ្នាំ ២០០៨ ឬមួយការពារសកម្មជនសិទ្ធិមនុស្សដ៏ល្បីល្បាញដែលខ្វាក់ភ្នែកលោក Chen Guangcheng ដែលភៀសខ្លួនទៅរស់នៅអាមេរិកជាដើម។ តាមអង្គការ Amnesty International ឲ្យដឹងថា អាជ្ញាធរចិនបានដក់ហូតអាជ្ញាបណ្ណមេធាវីពីលោកជាំង ធៀនយុងក្នុងឆ្នាំ ២០០៩ ដោយសារតែសកម្មភាពសិទ្ធិមនុស្សរបស់លោក។ ថ្មីៗមុនពេលបាត់ដំណឹង លោកជាំង ធៀនយុងបានទៅសួរសុខទុក្ខក្រុមគ្រួសារលោកស៊ី យ៉ាងដែលជាមេធាវីសិទ្ធិមនុស្សម្នាក់ទៀតកំពុងជាប់ក្នុងគុក។
យ៉ាងណាក៏ដោយ ភរិយាលោកជាំង ធៀនយុងគឺលោកស្រីជីង បៀនលីងបានប្រាប់ឲ្យដឹងថា ការចោទស្វាមីលោកស្រីពីបទរំលោភបំពានលើកិច្ចការសម្ងាត់របស់រដ្ឋជារឿងមិនពិត និងគ្មានមូលដ្ឋានច្បាស់លាស់។ លោកស្រីលីងបានបន្ថែមថា ប្រសិនបើស្វាមីរបស់លោកស្រីបានប្រព្រឹត្តិបទឧក្រិដ្ឋកម្មអ្វីមួយនោះ គេគួរតែផ្តល់ព័ត៌មានឲ្យក្រុមគ្រួសារបានដឹងមុនផង ពោលមិនមែនលាក់តាំងពីជិត ១ខែដូចនេះទេ។ បើតាមមនុស្សជំនិតរបស់លោកជាំង ធៀនយុងឲ្យដឹងថា រដ្ឋអំណាចចិនមិនសប្បាយចិត្តនឹងជំនួបរវាងលោកជាំង ធៀនយុង និងក្រុមអ្នកជំនាញសហប្រជាជាតិក្នុងក្រុងប៉េកាំងកាលពីខែសីហា។
កាលពីប៉ុន្មានថ្ងៃកន្លងទៅ ឧត្តមស្នងការសិទ្ធិមនុស្សអន្តរជាតិបានទាមទារឲ្យអាជ្ញាធរចិនបើកការសើបអង្កេតជុំវិញការបាត់ខ្លួនលោកជាំង ធៀនយុង។ លោកយុងក៏ដូចជាអ្នករួមអាជីពផ្សេងទៀតបានទទួលរងគំនាបពីអាជ្ញាធរជាច្រើនខែកន្លងមកក្នុងការបំពេញការងាររបស់ខ្លួនឲ្យបានពេញលេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ