កិច្ចពិភាក្សារវាងរុស្សីនិងជប៉ុននៅតូក្យូនៅលើបញ្ហាសន្តិសុខ កូរ៉េខាងជើងនិង បញ្ហាកោះគួរីល
នៅប្រទេសជប៉ុននាថ្ងៃចន្ទទី២០មីនានេះ រដ្ឋមន្ត្រីការបរទេសនិងការពារជាតិជប៉ុន ជាមួយសមភាគីរុស្ស៊ី បានធ្វើការពិភាក្សារួមគ្នានៅក្នុងទីក្រុងតូក្យូដោយផ្តោតទៅលើបញ្ហាសន្តិសុខនៅក្នុងតំបន់អាស៊ីប៉ាស៊ីហ្វីក បញ្ហាកូរ៉េខាងជើងនិងបញ្ហាជម្លោះកោះគួរីល។
ចុះផ្សាយនៅថ្ងៃ៖ កែប្រែថ្ងៃទី៖
នៅមុខអ្នកសាព័តមានមុនពេលជួបពិភាក្សាជាមួយសមភាគីរុស្ស៊ី លោក Sergueï Lavrov នាថ្ងៃចន្ទ២០មីនានេះ ក្នុងទីក្រុងតួក្យូ រដ្ឋមន្ត្រីការបរទេសជប៉ុនលោក Fumio Kishida បានថ្លែងបញ្ជាក់ប្រាប់ថា ជប៉ុននិងរុស្ស៊ី ពិភាក្សាជាមួយគ្នានៅលើបញ្ហាសន្តិសុខនៅក្នុងតំបន់អាស៊ីប៉ាស៊ីហ្វីក បញ្ហានុយក្លេអ៊ែរនិងមីស៊ីលបាលីស្ទីកកូរ៉េខាងជើងក៏ព្រមទាំងបញ្ហាជម្លោះកោះគូរីល។
នៅលើបញ្ហាកូរ៉េខាងជើ់ង ទីក្រុងតូក្យូ សម្តែងការព្រួយបារម្ភពីព្រោះរបបព្យុងយ៉ាង បានអភិវឌ្ឈន៍មីស៊ីលកាន់តែច្រើនឡើងៗ។ ទន្ទឹមនេះ មីស៊ីលខ្លះៗ ត្រូវបានកូរ៉េខាងជើង បាញ់ធ្លាក់នៅក្បែរទីឆ្នេរសមុទ្រជប៉ុនចាប់តាំងពីឆ្នាំមុន។
កាលពី២សប្តាហ៍មុននេះដែរ កូរ៉េខាងជើង បានបាញ់ផ្លោងគ្រាប់មីស៊ីលជាច្រើនគ្រាប់សំដៅទៅលើទីប្រជុំកោះជប៉ុន។ ក្នុងចំណោមនោះ មីស៊ីល៣គ្រាប់ បានធ្លាក់នៅកណ្តាលសមុទ្រត្រង់ទីក្រុងមួយស្ថិតនៅភាគខាងជើងប្រទេសជប៉ុនជាទីដែលមានប្រជាជនរស់នៅចំនួន ២ ម៉ឺន៩០០០នាក់។
ចំណែកប្រមុខការទូតរុស្ស៊ី ដោយមិនពោលចំឈ្មោះកូរ៉េខាងជើង បានលើកឡើងអំពីបញ្ហាមួយចំនួនពាក់ព័ន្ធនឹងបញ្ហាសន្តិសុខពិភពលោកនិងបញ្ហាតំបន់។ បញ្ហាទាំងនេះ ដែលប្រមុខការទូតរុស្ស៊ី អះអាងថា មានចំនួនកាន់តែច្រើន ក៏ជាប្រធានបទដ៏ក្តៅគគុកនាបច្ចុប្បន្ននេះនៅក្នុងកិច្ចពិភាក្សារវាងជប៉ុននិងរុស្ស៊ី។
បន្ទាប់មក រដ្ឋមន្ត្រីការពារជាតិជប៉ុននិងរុស្ស៊ី បានចូលរួមកិច្ចពិភាក្សាជាមួយរដ្ឋមន្ត្រីការបរទេសជប៉ុននិងរុស្ស៊ីនៅក្នុងកិច្ចពិភាក្សានាឈុតទីពីរ។ កិច្ចពិភាក្សាបែបនេះ ធ្លាប់ត្រូវបានធ្វើឡើងតាំងពីឆ្នាំ២០១៣មកម្ល៉េះ។
ម្យ៉ាងទៀតនៅក្នុងរបៀបវាវៈនៃកិច្ចពិភាក្សារវាងរុស្ស៊ីនិងជប៉ុន ក៏មានបញ្ហាជម្លោះដែនកោះគួរីលដែរ។ តំបន់កោះគូរីលខាងត្បូងដែលជប៉ុនហៅឈ្មោះថា”ដែនដីខាងជើង” ជាជម្លោះដ៏យូរលង់មកហើយរវាងទីក្រុងមូស្គូនិងតូក្យូចាប់តាំងពីចប់សង្គ្រាមលោកលើកទី២មកម្ល៉េះ ពោលគឺតាំងពី៧០ឆ្នាំកន្លងមកហើយ។
នៅក្នុងជម្លោះកោះគួរីល លោកស្រី Inada រដ្ឋមន្ត្រីការពារជាតិជប៉ុន បន្ទាប់ពីបានជួបពិភាក្សាជាមួយរដ្ឋមន្ត្រីការពាររុស្ស៊ីលោក Choïgu បានគូសបញ្ជាក់ថា"ភាគីជប៉ុននិងរុស្ស៊ី"បានប្តោះប្តូរគ្នា នូវ ការយល់ឃើញដែលប្រកបទៅដោយភាពស្មោះត្រង់និងសុចរិតនៅលើប្រធានបទដែលទាក់ទងនឹងបញ្ហានយោបាយការពារជាតិនិងតំបន់ដែលនាបច្ចុប្បន្នកាលកំពុងតែគ្របដណ្តប់ដោយស្ថានការណ៍កូរ៉េខាងជើង។
យោងតាមទីភ្នាក់ងារសាព័ត៌មានជប៉ុន Kyodo រដ្ឋមន្ត្រីការពារជាតិជប៉ុន បានសម្តែងការព្រួយបារម្ភចំពោះវត្តមានយោធារុស្ស៊ីដែលមានចំនួនកាន់តែច្រើនឡើងៗនៅក្នុងប្រជុំកោះជាប់ជម្លោះជាមួយរុស្ស៊ីនេះ។ រដ្ឋមន្ត្រីការពារជាតិជប៉ុន បានអះអាងថា ដែនកោះគូរីលនេះ គឺជាដែនដីរបស់ជប៉ុនដោយបានសម្តែងសេចក្តីសោកស្តាយ ពីព្រោះយោងតាមយោបល់របស់លោកស្រីរដ្ឋមន្ត្រីការពារជាតិជប៉ុន វត្តមានយោធារបស់រុស្សីនៅលើកោះគួរីលនេះ គឺជាជំហរប្រឆាំងមួយរបស់រុស្ស៊ីទល់នឹងជប៉ុន។
នៅលើបញ្ហាកោះគូរីលនេះដែរ ក្រសួងការបរទេសរុស្ស៊ីវិញ កាលពីចុងខែឧសភាកន្លងទៅ បានជូនដំណឹងប្រាប់ថា រុស្ស៊ីបានចាត់វិធានការណ៍ពុំធ្លាប់មានឡើយដើម្បីធ្វើការពង្រឹងមួលដ្ឋានយោធារបស់ខ្លួននៅក្នុងតំបន់ Arctique និងនៅលើកោះគូរីលផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ