កូរ៉េខាងត្បូង៖លោកស្រីអតីតប្រធានាធិបតីប៉ាក់ គុនហេប្រឈមនឹងការចាប់ខ្លួន?
នៅកូរ៉េខាងត្បូង រដ្ឋអាជ្ញាបានស្នើឲ្យមានការចាប់ខ្លួនលោកស្រីអតីតប្រធានាធិបតីប៉ាក់ គុនហេ។ សំណើនេះបានធ្វើឡើង ប៉ុន្មានថ្ងៃបន្ទាប់ពីចៅក្រមបានធ្វើការចោទសួរលោកស្រីក្នុងសំណុំរឿងពុករលួយ និងការរំលោភអំណាច។ គឺជាសំណុំរឿងដែលបានធ្វើឲ្យលោកស្រីខ្ទាតចេញពីតំណែងជាស្ថាពរកាលពីដើមខែមីនាកន្លងទៅ។ គេនៅមិនទាន់ដឹងថា តើតុលាការក្រុងសេអ៊ូលនឹងសម្រេចចិត្តយ៉ាងណាទេចំពោះសំណើរបស់រដ្ឋអាជ្ញា តែបើតុលាការយល់ស្រប នោះលោកស្រីប៉ាក់ គុនហេនឹងក្លាយជាអតីតប្រធានាធិបតីកូរ៉េខាងត្បូងទី៣ ដែលត្រូវចាប់ខ្លួនក្នុងបទពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
មានអាយុ ៦៥ឆ្នាំ និងបានខ្ទាតពីតំណែងប្រធានាធិបតីជាស្ថាពរមែន តែលោកស្រីប៉ាក់ គុនហេនៅមិនទាន់រួចខ្លួនពីសំណាញ់តុលាការនៅឡើយទេ។ តាមរយៈសេចក្តីប្រកាសព័ត៌មានមួយរបស់រដ្ឋអាជ្ញានាថ្ងៃចន្ទ ទី២៧ មីនា រដ្ឋអាជ្ញាបានទាមទារឲ្យមានការចាប់ខ្លួនលោកស្រីដោយលើកយកហេតុផលទៅពន្យល់ថា លោកស្រីបានប្រព្រឹត្តកំហុសឆ្គងធ្ងន់ធ្ងរជាច្រើនក្នុងពេលកាន់អំណាចដែលមិនអាចអត់ឱនឲ្យបានទេ។ កំហុសឆ្គងទាំងនោះរួមមាន ការរំលោភអំណាច ការប្រើសិទ្ធិប្រធានាធិបតីដើម្បីទទួលសំណូកពីក្រុមហ៊ុន រោងចក្រសហគ្រាស ឬមួយការទម្លាយព័ត៌មានសម្ងាត់ និងសំខាន់ៗទាក់ទងនឹងកិច្ចការរបស់ប្រទេសជាតិជាដើម។
នៅក្នុងសេចក្តីប្រកាសព័ត៌មានដដែល រដ្ឋអាជ្ញាបានលើកយកហេតុផលទៅសំអាងដើម្បីបញ្ជាក់ពីសំណើចាប់ខ្លួនលោកស្រីប៉ាក់ គុនហេ នោះគឺ មានភស្តុតាងចោទប្រកាន់ជាច្រើនត្រូវបានចងក្រងឡើង តែជនជាប់ចោទបានច្រានចោល ហើយអាចនឹងមានការប៉ុនប៉ងកម្ទេចភស្តុតាងទាំងនោះចោលទៀតផង។ សូមរម្លឹកជូនឡើងវិញថា រឿងអាស្រូវពុករលួយ និងការរំលោភអំណាចរបស់លោកស្រីប៉ាក់ គុនហេបានជាប់ពាក់ព័ន្ធផ្ទាល់នឹងលោកស្រីចយ ស៊ុនស៊ីលដែលជាមិត្តជិតដិតរបស់លោកស្រី និងដែលកំពុងជាប់ឃុំឃាំង។
ក្រុមអ្នកស៊ើបអង្កេតបានយល់ឃើញថា បើឃុំខ្លួនលោកស្រីចយ ស៊ុនស៊ីលក៏ត្រូវឃុំខ្លួនលោកស្រីប៉ាក់ គុនហេដែរ បើពុំនោះសោតទេ វាពិតជាផ្ទុយនឹងគោលការណ៍សមធម៌។ យ៉ាងណាក៏ដោយ គេនៅមិនទាន់ដឹងថា តើតុលាការក្រុងសេអ៊ូលនឹងសម្រេចចិត្តយ៉ាងណាទេចំពោះសំណើចាប់ខ្លួនលោកស្រីប៉ាក់ គុនហេរបស់រដ្ឋអាជ្ញា តែបើតុលាការយល់ស្រប នោះលោកស្រីប៉ាក់ គុនហេនឹងក្លាយជាអតីតប្រធានាធិបតីកូរ៉េខាងត្បូងទី៣ ដែលត្រូវចាប់ខ្លួនក្នុងបទពុករលួយ និងរំលោភអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ