សមុទ្ទចិនខាងត្បូង៖ ហ្វីលីពីននិងចិនបើកកិច្ចចរចាទ្វេភាគី
ចិននិងហ្វីលីពីន នឹងជួបប្រជុំគ្នា ជាលើកដំបូង នៅខែឧសភា ខាងមុខ ដើម្បីពិភាក្សាគ្នាអំពីយន្តការបើកកិច្ចចរចាទ្វេភាគី ទាក់ទងនឹងជម្លោះនៅសមុទ្ទចិនខាងត្បូង។ នេះបើតាមការជូនដំណឹងរបស់អ្នកនាំពាក្យក្រសួងការបរទេសចិន និងរបស់មន្ត្រីហ្វីលីពីន។ ហ្វីលីពីន ដែលពីមុនមក ក៏ដូចជាបណ្តាប្រទេសក្នុងតំបន់អាស៊ានផ្សេងទៀត តែងតែទាមទារចរចាជាមួយចិនក្នុងក្របខ័ណ្ឌពហុភាគី ជាជាងទ្វេភាគី។
ចុះផ្សាយនៅថ្ងៃ៖
ស្តាប់ - ០២:០៨
កាលពីឆ្នាំទៅ តុលាការអន្តរជាតិក្រុងឡាអេ បានកាត់ក្តីឱ្យហ្វីលីពីនឈ្នះ ចិនជាអ្នកខុស ដែលចង់គ្រប់គ្រងតំបន់ដែនសមុទ្ទចិនខាងត្បូងតែម្នាក់ឯង។ តែក្រោយពីលោក ឌុយទែរតេ បានឡើងកាន់អំណាច ក្រុងម៉ានីល មិនខ្វល់នឹងសាលក្រមអន្តរជាតិមួយនេះទេ និងបានខិតរុលទៅរកក្រុងប៉េកាំង ដើម្បីចំណេញពាណិជ្ជកម្មនិងវិនិយោគ។
ការក្រឡាស់ប្តូរទិសនយោបាយទៅអោបចិន បានផ្តល់លទ្ធផលថ្មីមួយទៀតនៅថ្ងៃនេះ។ នោះគឺសំណើជួបពិភាក្សាទ្វេភាគីរវាង នៅខែឧសភាខាងមុខ ដោយគ្មានលក្ខខណ្ឌ។ ចិននិងហ្វីលីពីន បានសម្រេចចិត្តរក្សាកិច្ចចរចាមិត្តភាព ស្តីអំពីជម្លោះនៅក្នុងសមុទ្ទចិនខាងត្បូង ! នេះជាសំដីរបស់អ្នកនាំពាក្យក្រសួងការបរទេសចិន ទៅកាន់អ្នកសារព័ត៌មាន។
ក្នុងពេលពិគ្រោះពិភាក្សាការទូតជាលើកទី២០ កាលពីខែមករា ប្រទេសទាំងពីរបានព្រមព្រៀងបង្កើតយន្តការពិគ្រោះទ្វេភាគី ស្តីពីវិបត្តិនៅសមុទ្ទចិនខាងត្បូង ដែលជាឈ្នាន់ឆ្ពោះទៅសម្រេចការជជែកអំពីផលប្រយោជន៍រួម និងការពង្រឹងបន្ថែមកិច្ចសហប្រតិបត្តិការផង សន្តិសុខដែនទឹកផង។
បើតាមអ្នកនាំពាក្យចិន ប៉េកាំងមានឆន្ទៈចង់ពង្រឹងកិច្ចចរចាជាមួយហ្វីលីពីន ដើម្បីដោះស្រាយជម្លោះឱ្យបានសមស្រប និងបង្កើតបរិយាកាសល្អសម្រួលដល់កិច្ចសហប្រតិបត្តិការទ្វេភាគី និងការអភិវឌ្ឍន៍ មានលំនឹង។ ចិនក៏បានអញ្ជើញឆ្មាំសមុទ្ទហ្វីលីពីន ឱ្យទៅបំពេញទស្សនកិច្ចប្រទេសចិនក្នុងពេលឆាប់ៗនេះ។ ឆ្នាំសមុទ្ទប្រទេសទាំងពីរ ដែលបានសម្រេចធ្វើកិច្ចសហប្រតិបត្តិការមួយជម្លៀសធំ នៅឆ្នាំ២០១៧ ដើម្បីបង្កើនទំនុកចិត្តនិងមិត្តភាពចិន-ហ្វីលីពីនឱ្យកាន់រឹងមាំ។
សូមបញ្ជាក់ថា ជានិច្ចជាកាលចិនប្រាថ្នាចង់បានណាស់ ការចរចាទ្វេភាគី ! តែពីមុនមក បណ្តាប្រទេសជិតខាងជាប់ជម្លោះជាមួយចិន ក្នុងបញ្ហាសមុទ្ទចិនខាងត្បូង រាប់ទាំងហ្វីលីពីនផ្ទាល់ តែងជ្រើសរើសការចរចាពហុភាគី ដើម្បីឱ្យមានទម្ងន់ខ្លាំងសម្រាប់ដាក់សម្ពាធលើចិន។ ពេលខ្លះ ដោយហេតុបញ្ហាសមុទ្ទចិនខាងត្បូងនេះ ជំនួបកំពូលអាស៊ានត្រូវបរាជ័យដោយមិនអាចចេញសេចក្តីថ្លែងការណ៍រួមបាន។ ប៉ុន្តែថ្ងៃហ្វីលីពីន ក្រោមការដឹកនាំរបស់លោក ឌុយទែរតេ បានជ្រើសរើសអោបចិន ព្រោះយល់ថាហ្វលីពីនមិនចង់ធ្វើសង្គ្រាមជាមួយចិន។ សង្គ្រាមដែលចិននឹងជាអ្នកឈ្នះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ