សហរដ្ឋអាមេរិកដាក់ចិនក្នុងបញ្ជីខ្មៅប្រទេសជួញដូរមនុស្ស
ថ្វីបើអាមេរិករបស់លោកត្រាំ ហាក់ដូចជាបានបង្ហាញភាពស្និទ្ធស្នាលខិតរកក្រុងប៉េកាំងបន្តិចមែន ប៉ុន្តែអាមេរិកមិនខ្លាចនឹងចង្អុលមុខចិនឡើយ ក្នុងរឿងជួញដូរមនុស្ស។ នៅថ្ងៃម្សិលមិញនេះ សហរដ្ឋអាមេរិកបានប្រកាស ចុះឈ្មោះប្រទេសចិន ទៅក្នុងបញ្ជីខ្មៅ ប្រទេសជួញដូរមនុស្ស ក្នុងកំរិតទន្ទឹមនឹងប្រទេសស៊ីរី វេណេស៊ុយអេឡា និងកូរ៉េខាងជើងតែម្តង។
ចុះផ្សាយនៅថ្ងៃ៖
នៅក្នុងរបាយការណ៍ប្រចាំឆ្នាំ ស្តីពីការជួញដូរមនុស្ស ចេញផ្សាយ នៅថ្ងៃអង្គារម្សិលមិញ រដ្ឋបាលលោក ដូណាល់ ត្រាំ បានផ្តល់ចំណាត់ថ្នាក់ដ៏អាក្រក់បំផុតដល់ចិន ថាស្ថិតនៅក្នុងចំណោមប្រទេសចំនួន២៣នៅលើពិភពលោក ដែលគ្មានប្រឹងប្រែងធ្វើអ្វីសោះ ក្នុងការប្រយុទ្ធប្រឆាំងនឹងការជួញដូរមនុស្ស។
ចិនមិនបានចាត់វិធានការហ្មត់ចត់ដើម្បីបញ្ចប់ជំនួញរត់ពន្ធមនុស្ស ដោយព្រមទទួល ពលករកូរ៉េខាងជើងមកធ្វើដោយបង្ខំនៅចិន។ បញ្ជូនពលករធ្វើការដោយបង្ខំ នៅចិន និងនៅរុស្ស៊ី នាំចំណូលឱ្យកូរ៉េខាងជើងបានដល់ទៅរាប់រយលានដុល្លារក្នុងឆ្នាំៗ។ នេះបើតាមការពន្យល់របស់លោក Rex Tillerson រដ្ឋមន្ត្រីក្រសួងការបរទេសអាមេរិក ដែលបានព្រមានថា ទង្វើទទួលពលករកូរ៉េខាងជើងឱ្យធ្វើការដោយបង្ខំមិនអាចបន្តបានទៀតទេ ហើយទង្វើនេះអាចនឹងធ្វើឱ្យប៉ះពាល់ដល់ទំនាក់ទំនងពាណិជ្ជកម្មរវាងចិននិងអាមេរិក។ ពលរដ្ឋអាមេរិកត្រូវធានាឱ្យបានថាទំនិញអ្វីមួយដែលគេទិញ គ្មានពាក់ព័ន្ធនឹងការជួញដូរកម្លាំងមនុស្សទេ។
នៅក្នុងរបាយការណ៍ អាមេរិកក៏បានបន្ទោសចិនរឿងចាប់ជនជាតិភាគតិចអ៊ុយហ្គួរឱ្យធ្វើការជាដោយបង្ខំដែរ។ ចំណែករុស្ស៊ី ដែលប្រធានាធិបតីត្រាំ ចង់រឹតចំណងការទូត ក៏ស្ថិតនៅក្នុងបញ្ជីខ្មៅ ជាប្រទេសជួញដូរមនុស្ស ជាលើកទី៥ឆ្នាំជាប់គ្នាតែម្តង។
បិទបញ្ចប់ការជួញដូរមនុស្ស ជាអាទិភាពចំបងមួយនៃនយោបាយការបរទេសរបស់រដ្ឋបាលលោកត្រាំ។ នេះបើតាមសំដីរបស់លោកស្រី អ៊ីវ៉ាន់កា ត្រាំ ជាកូនស្រី នាឱកាសបង្ហាញរបាយការណ៍ប្រចាំឆ្នាំ ដោយបញ្ជាក់បន្ថែមទៀតថា ប្រទេសណាដែលជាប់ក្នុងបញ្ជីខ្មៅ អាចនឹងទទួលទណ្ឌកម្មពីអាមេរិក ពីការបន្ថយជំនួយ ទៅដល់ការផ្តាច់ទាំងស្រុងការផ្តោះប្តូរវប្បធម៌ និងអប់រំ។
ប្រទេសក្នុងទ្វីបអាហ្វ្រិកចំនួនបី សាធារណរដ្ឋកុងហ្កោ ប្រទេសកុងហ្កោប្រាហ្សាវីល និងម៉ាលី បានជាប់ក្នុងបញ្ជីខ្មៅអាមេរិកដែរនៅឆ្នាំនេះ ព្រោះតែសកម្មភាពធូររលុងបណ្តោយឱ្យអាជ្ញាធរតំបន់ចាប់កុមារមកធ្វើទាហាន។
ផ្ទុយទៅវិញ ប្រទេសភូមា ដែលរងការរិះគន់ខ្លាំង កាលពីឆ្នាំកន្លងទៅ ចំពោះទង្វើយកក្មេងទៅបំរើកងទ័ព ក៏បានឡើងចំណាត់មួយកំរិត ព្រោះប្រទេសនេះ លែងចាប់ក្មេងទៅធ្វើទាហានទៀតហើយ។ តែអង្គការក្រៅរដ្ឋាភិបាល យល់ថា ការដកភូមានិងអ៊ីរ៉ាក់ចេញពីបញ្ជីខ្មៅ ថាការភូតភរ ស្ថានភាពក្នុងប្រទេសទាំងពីរនេះមិនប្រសើរដូចការអះអាងរបស់ក្រសួងការបរទេសអាមេរិកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ