ប៉ូលីសម្នាក់ត្រូវស្លាប់និងម្នាក់ទៀតរងរបួសធ្ងន់នៅម្តុំអណ្តូងរ៉ែមាសមួយរបស់អាមេរិក
ជនប្រដាប់អាវុធមួយក្រុម បានបាញ់រះទៅលើប៉ូលីសដែលកំពុងដើរយាមល្បាតនៅក្នុងតំបន់ប៉ាពូអាស៊ី ភាគខាងកើតឥណ្ឌូណេស៊ីនៅថ្ងៃពុធម្សិលមិញ ។ ឧប្បត្តិហេតុនេះ បានបណ្តាលឲ្យប៉ូលីសម្នាក់ស្លាប់និងម្នាក់ទៀតរងរបួសធ្ងន់។ ហេតុការណ៍នេះ បានកើតឡើងនៅជិតអណ្តូងរ៉ែមាសមួយរបស់ក្រុមហ៊ុនពហុជាតិអាមេរិកនៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ឧប្បត្តិហេតុនេះ បានកើតឡើងនៅពេលដែលមានការប្រឈមមុខគ្នាមួយរវាងក្រុមរក្សាសណ្តាប់ធ្នាប់និងពួកទាមទារឯករាជ្យ នៅជាប់គាំងនៅមិនឆ្ងាយប៉ុន្មានពីអណ្តូងរ៉ែមាសនិងស្ពាន់ដ៏ធំជាងគេបំផុតមួយនៅលើលោកដែលជាកម្មសិទ្ធិរបស់ពហុជាតិអាមេរិកឈ្មោះ Freeport-McMoRan នៅ Grasberg នៅ ខេត្ត Papouasie ប្រទេសឥណ្ឌូណេស៊ី។
ក្រុមជនមិនស្គាល់មុខ បានបាញ់រះទៅលើក្រុមប៉ូលីសនៅម្តុំអណ្តូងរ៉ែមាស តាំងពីព្រលឹមថ្ងៃពុធម្សិលមិញនៅមុនពេលថ្ងៃរះ។ ក្រុមឧទ្ទាមនេះ បាញ់ប្រហារពីខាងក្រោយប៉ូលីសដែលកំពុងប្រតិបត្តិការដើរយាមល្បាតនៅក្នុងតំបន់។
អ្នកនាំពាក្យម្នាក់របស់ក្រុមប៉ូលីសប៉ាពូអាស៊ី បានប្រាប់ដល់ទីភ្នាក់ងារព័ត៌មានបារាំង AFP ថា”ពួកគាត់ មើលមុខពួកអ្នកបាញ់ពុំស្គាល់ទេដោយសារតែនៅយប់ងងឹតពេក។ តែ ប៉ូលីស មានការមន្ទិលសង្ស័យថា”ក្រុមអ្នកបាញ់ ពិតជាស្ថិតនៅក្នុងចំណោមក្រុមអ្នកទាមទារផ្តាច់ទឹកដីនិយមនិងក្រុមដែលបានឃាត់ខ្លួនប្រជាជនភូមិទុកប្រមាណជា ១៣០០នាក់នាពេលកន្លងមក"។
តែអ្នកនាំពាក្យរបស់កងទ័ពរំដោះជាតិប៉ាពូអាស៊ីខាងលិច បានអះអាងថាគឺក្រុមខ្លួនទេដែលជាអ្នកនៅពីក្រោយនៃការបាញ់ប្រហារនាថ្ងៃពុធម្សិលមិញ ក៏ព្រមទាំងការបាញ់កាំភ្លើងតទល់គ្នាផ្សេងៗទៀតនាពេលថ្មីៗកន្លងទៅនេះដែរ។
គួរបញ្ជាក់ថា ខេត្តប៉ាពូអាស៊ី កំពុងប្រឈមមុខនឹងពួកបះបោរប្រដាប់អាវុធដែលទាមទារឯករាជ្យនៅក្នុងខេត្តនេះ។ តំបន់នេះសោតទៀត ក៏ជាប្រភពប្រាក់ចំណូលដ៏ក្រាស់ក្រែលបំផុតដែរដែលបានមកពីធនធានធម្មជាតិដ៏ហូរហៀរនៅក្នុងតំបន់។
ម្យ៉ាងទៀត ចលនាប៉ាពូអាស៊ីសេរី ថែមទាំងចោទប្រកាន់អាជ្ញាធរនៅក្នុងតំបន់ដែរថា បានរំលោភលើសិទិ្ធមនុស្សយ៉ាងធ្ងន់ធ្ងរ ប្រឆាំងប្រជាជនស៊ីវិលប៉ាពួនិងបានប្រព្រឹត្តអំពើពុករលួយដ៏ធ្ងន់ធ្ងរពាក់ព័ន្ធទៅនឹងធនធានធម្មជាតិដ៏សំខាន់នៅក្នុងតំបន់ដែលសម្បូរទៅដោយធនធានរ៉ែនេះ៕.
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ