លោកពូទីនអន់ចិត្ត ដោយមិនឃើញឈ្មោះគាត់ក្នុងបញ្ជីអ្នកដែលអាចជាប់ទណ្ឌកម្មក្រុងវ៉ាស៊ីនតោន
រសៀលថ្ងៃអង្គារម្សិលមិញលោកប្រធានាធិបតីរុស្ស៊ី វ៉្លាឌីមៀរ ពូទីន បាននិយាយដោយ សំដី ផ្លែផ្កាថា គាត់” អន់ចិត្ត “ ដោយមិនឃើញឈ្មោះគាត់ នៅក្នុ្ងងបញ្ជីឥស្សរជនរុស្ស៊ី ទើបចេញផ្សាយដោយ សេតវិមាន ថាអាចជាប់ក្នុងទណ្ឌកម្មក្រុងវ៉ាស៊ីនតោន។ គាត់ចាត់ទុកការចេញផ្សាយបញ្ជីបែបនេះ ថាជា “ទង្វើអមិត្ត” ដោយព្រមជាមួយនេះ គាត់បានឲ្យដឹងថា ភាគីរុស្ស៊ី មិន ចាត់វិធានការបកវិញឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
” ប្រាកដណាស់ នេះជាទង្វើអមិត្ត ដែលនាំឲ្យស្មុគស្មាញដល់ទំនាក់ទំនងរវាង រុស្ស៊ី និង សរអា - ទំនាក់ទំនង ដែលស្ថិតក្នុងភាពយ៉ាប់យ៉ឹនស្រាប់ទៅហើយ មិនតែប៉ុណ្ណោះ វា នាំឲ្យខូចជាទូទៅ ដល់ ទំនាក់ ទំនងអន្តរជាតិ “- សេចក្តីនេះ ថ្លែងនារសៀលថ្ងៃ អង្គារ ៣០មករា ដោយលោកពូទីន ក្នុងសម័យប្រជុំ ជួបជាមួយ ឥស្សរជន ៤៦១ នាក់ ជាមនុស្សទុកចិត្តរបស់គាត់ នៅឯ អគ្គសេនាធិការគាត់ ក្នុងបរិបទ នៃ យុទ្ធនាការ សម្រាប់ការបោះឆ្នោតប្រធានាធិបតីរុស្ស៊ី ខែមិនាខាងមុខ។ លោកពូទីន ក៏ថ្លែងថា គាត់មិន” ភ្លើ” ទៅបន្ទាបទំនាក់ទំនងនោះលុះរហូតដល់សូន្យឡើយ ម៉្លោះហើយ បានជាគាត់ មិនចង់ឆ្លើយបកវិញ ដ្បិតវា រឹតតែនាំឲ្យ”ស្ថានការណ៍ដុនដាប”ទៅទៀត។
តាមអំណះអំណាងលោកពូទីន ៖ ម៉ូស្គូ បានរង់ចាំការលេចចេញមកនៃបញ្ជីនោះ ទាំងត្រៀមចាត់វិធានការ សងសឹកវិញយ៉ាងមធ្យ័ត ដែលមុខជាបន្ទាប់ទំនាក់ទំនងយើងដល់បាតតែម្តង។ ប៉ុន្តែ ក្នុងដំណាក់ឥឡូវ យើងទប់ខ្លួន មិនចាត់វិធានការនេះទេ។
តាមយោបល់លោកប្រមុខរដ្ឋរុស្ស៊ី ពូទីន បញ្ជីឈ្មោះអ្នកនយោបាយនិងពួកអ្នកជំនួញរុស្ស៊ីគ្រាក់ៗ សរុបទៅ ២១០ នាក់ ដែលថាជំនិតនឹងរូបគាត់ ចេញផ្សាយដោយ ក្រសួងហិរញ្ញវត្ថុអាមេរិកាំង តាមពិត គឺធ្វើឡើង ក្នុង ក្របខ័ណ្ឌនៃនយោបាយផ្ទៃក្នុង សរអា ទេតើ ដើម្បីវាយប្រហារលោក ដូណាល់ ត្រាំ ដែលថា ឈ្នះឆ្នោត ជា ប្រធានាធិបតី ក្នុងឆ្នាំ ២០១៦ គឺ ដោយសារមានការគាំទ្រស្អីណា ពីខាងម៉ូស្គូ។
មេដឹកនាំរុស្ស៊ី ក៏ចោទសួរខ្លួនឯង តើក្រុងវ៉ាស៊ីនតោន មានឆន្ទៈសហការជាមួយម៉ូស្គូ ឬទេ ក្នុងការប្រយុទ្ធ ទល់នឹង ភេរវនិយម។ តាមសំដីគាត់ ៖ បើវ៉ាស៊ីនតោនមិនចង់សហការ នោះម៉ូស្គូ ក៏មិនត្រូវការគេឡើយ។
គួរនិយាយថា ក្នុងបញ្ជីឈ្មោះ ២១០ នាក់នោះ ក៏មានទាំងឈ្មោះ លោករដ្ឋមន្ត្រីការបរទេស ស៊ែរហ្គៃ ឡាវ្រ៉ូវ លោកនាយករដ្ឋមន្ត្រី ឌ្មីទ្រី មេដវេដេវ និងពួកអ្នកទទួលខុសត្រូវថ្នាក់លើៗ នៃ ទីភ្នាក់ងារឈ្លបការណ៍សម្ងាត់ រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ