ការផ្សះផ្សាជាតិមួយកំពុងរៀបចំនៅឥណ្ឌូណេស៊ី រវាងអតីតភេរវជននិងអ្នករងគ្រោះនៃអំពើភេរវនិយម
នៅឥណ្ឌូណេស៊ី អាជ្ញាធរ បានរៀបចំឲ្យមានជំនួបប្រាស្រ័យគ្នាមួយរវាងពួកអតីតឧក្រឹដ្ឋជននិងក្រុមជនរងគ្រោះនៃអំពើភេរវកម្ម ជាមួយនឹងក្រុមគ្រួសាររបស់គេ។ គឺជាការជួបប្រាស្រ័យគ្នាមួយដែលមានរយៈពេល៣ថ្ងៃ និង ក៏ជាលើកទីដំបូងបង្អស់ដែរនៅក្នុងប្រទេសឥណ្ឌូណេស៊ី ដើម្បី ការផ្សះផ្សាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ព្រឹត្តិការណ៍ជំនួបប្រាស្រ័យរវាងក្រុមអតីតឧក្រឹដ្ឋជននិងជនរងគ្រោះក្នុងអំពើភេរវកម្ម ជាមួយក្រុមគ្រួសារនោះ បានចាប់ផ្តើមឡើងតាំងពីថ្ងៃចន្ទម្សិលមិញ នៅក្នុងសណ្ឋាគារមួយក្នុងរដ្ឋធានី Jakarta ក្នុងរយៈពេលចំនួន៣ថ្ងៃ។
គោលដៅនៃជំនួបប្រាស្រ័យនេះ គឺដើម្បីផ្សព្វផ្សាយនូវសារសន្តិភាពផងនិងក៏ដើម្បីអនុញ្ញាតឲ្យបណ្តាជនរងគ្រោះទាំងអស់បានជម្រះចោលអោយអស់កំហឹងរបស់ពួកគេ នៅចំពោះមុខក្រុមអតីតភេរវជន ដោយធ្វើយ៉ាងណាដើម្បីអាចអោយអតីតក្រុមឧក្រឹដ្ឋជនទាំងនោះ អាចសម្របខ្លួនចូលទៅក្នុងសង្គមឥណ្ឌូណេស៊ីបានដោយគ្មានការរើសអើង។ នេះជាការពន្យល់របស់ទីភ្នាក់ងារជាតិប្រឆាំងនឹងអំពើភេរវនិយម ដែលជាប្រភពនៃគំនិតផ្តួចផ្តើមខាងលើនេះ។
ក្រុមអតីតអ្នកទោសចំនួន១២០នាក់ បានចូលរួមសហការណ៍នៅក្នុងជំនួបប្រាស្រ័យគ្នានេះដែលគ្រោងធ្វើជាមួយជនរងគ្រោះក្នុងអំពើភេរវកម្មចំនួន៧០នាក់នៅថ្ងៃពុធខាងមុខនេះ។
នៅឱកាសនោះដែរ បណ្តារដ្ឋមន្ត្រីឥណ្ឌូណេស៊ីយ៉ាងតិចក៏ចំនួន៧នាក់ដែរ ដែលនឹងត្រូវចូលរួមក្នុងជំនួបប្រាស្រ័យដើម្បីការផ្សះផ្សាជាតិនេះ ដោយមានការចាក់ផ្សាយនូវសារនានាពាក់ព័ន្ធ នឹងតម្លៃប្រទេសឥណ្ឌូណេស៊ី និងការអធ្យាស្រ័យអត់អោនឲ្យគ្នា។
គួរបញ្ចាក់ថា ថ្ងៃចន្ទនិងអង្គារ៍ស្អែក គឺ ជាថ្ងៃឧទ្ទិស សម្រាប់ការប្រុងប្រៀបរៀបចំជំនួបនេះតែបិទទ្វារដោយពុំមានវត្តមានអ្នកកាសែតចូលរូមឡើយ។
នៅក្នុងជំនួបប្រាស្រ័យនេះ អតីតពួកអ្នកទោសទាំងនោះនឹងមានឱកាសមួយដើម្បីសម្តែងការសុំទោសរបស់ខ្លួននៅចំពោះមុខជនរងគ្រោះដែលនៅរស់រានមានជីវិត។
នៅក្នុងចំណោមអ្នកចូលរួមក្នុងព្រឹត្តិការណ៍នេះ ក៏មានអតីតអ្នកទោសដែលធ្លាប់បានបង្កភេរវកម្មនៅកោះបាលីក្នុងឆ្នាំ ២០០២។ អំពើភេរវកមម្ម កាលណោះ បានសម្លាប់ជីវិតមនុស្ស ២០២នាក់ ក្នុងនោះ ភាគច្រើនជាជនបរទេស។
គួររំលឹកថា បន្ទាប់ពីមានអំពើភេរវនិយមនៅកោះបាលីមក អាជ្ញាធរឥណ្ឌូណេស៊ី បានចាប់ផ្តើមធ្វើសង្គ្រាមជាបន្ទាន់ប្រឆាំងទល់នឹងពួកអ៊ីស្លាមជ្រុលនិយមដោយបានបើកការវាយលុកយ៉ាងធំធេងមួយប្រឆាំងនឹងពួកអ៊ីស្លាមជ្រុលនិយម និងប្រតិបត្តិការតាមកំចាត់បំផ្លាញបណ្តាញភេរវនិយមដ៏គ្រោះថ្នាក់ខ្លាំងជាងគេអោយធ្លាក់ចុះទន់ខ្សោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ