លោកដូណាល់ត្រាំ៖ ថ្ងៃ និងទីកន្លែង ជួបលោកគីម ជុងអ៊ុនត្រូវបានកំណត់រួចហើយ
ប្រធានាធិបតីអាមេរិក លោកដូណាល់ ត្រាំ នៅថ្ងៃសុក្រទី៤ឧសភា បានប្រកាសថា កាលបរិច្ឆេទ និងទីកន្លែងរៀបចំ ជំនួបកំពូលរវាងលោក ហើយនិងមេដឹកនាំកូរ៉េខាងជើង ត្រូវបានជ្រើសរើស រួចរាល់ អស់ហើយ។ សេតវិមានវិញ បានបញ្ជាក់ថា ជំនួបកំពូលអាមេរិក និងកូរ៉េខាងជើង នឹងរៀបចំឡើង នៅក្រោយជំនួប រវាងលោកដូណាល់ ត្រាំ ហើយនិងប្រធានាធិបតីកូរ៉េខាងត្បូង លោកមូន ចៃអ៊ីន ដែលនឹងប្រព្រឹត្តទៅនៅថ្ងៃទី ២២ឧសភា ខាងមុខ។
ចុះផ្សាយនៅថ្ងៃ៖
ស្តាប់ - ០២:១៩
លោកដូណាល់ ត្រាំ មិនបានបញ្ជាក់ពីឈ្មោះ ទីកន្លែង និងពេលវេលាពិតប្រាកដដែលលោកត្រូវជួបមេដឹកនាំកូរ៉េខាងជើងនោះទេ។ តាមលោកដូណាល់ ត្រាំ ព័ត៌មានទាក់ទងនឹងទីកន្លែង និងពេលវេលាដែល គេបានជ្រើសរើសរួចរាល់ហើយនោះ នឹងត្រូវប្រកាសជាសាធារណៈ នៅក្នុងពេលឆាប់ៗខាងមុខ។ នៅក្នុងវេទិកាប្រចាំឆ្នាំរបស់សមាគមអាវុធជាតិអាមេរិក នៅទីក្រុងដាឡាស នៅថ្ងៃសុក្រម្សិលមិញ លោកប្រធានាធិបតីអាមេរិក នៅបានសន្យាដែរថា នឹងលែងប្រើទៀតហើយ សង្រ្គាមពាក្យសំដី ដាក់មេដឹកនាំកូរ៉េខាងជើង លោកគីម ជុងអ៊ុន ដែលលោកធ្លាប់បានចាត់ទុកជាបុរសមីស៊ីល នៅក្នុងសុន្ទរកថា នៅអង្គការសហប្រជាជាតិ។
នៅសប្តាហ៍នេះ លោកដូណាល់ ត្រាំ ធ្លាប់បានលើកឡើងពីចំណាប់អារម្មណ៍ របស់លោកទៅលើតំបន់គ្មានកងទ័ព នៅចន្លោះ ព្រំដែនកូរ៉េទាំងពីរ ឬប្រទេសសិង្ហបុរី សម្រាប់រៀបចំជំនួបកំពូល ជាមួយមេដឹកនាំកូរ៉េខាងជើង។ ផ្ទះសន្តិភាព នៅក្នុងតំបន់គ្មានកងទ័ព ធ្លាប់ជាកន្លែងបើកជំនួបកំពូលប្រមុខដឹកនាំកូរ៉េទាំងពីរ កាលពីថ្ងៃទី ២៧មេសាកន្លងទៅ ដែលនៅក្នុងនោះ មេដឹកនាំកូរ៉េទាំងពីរបានសន្យា ប្តេជ្ញាចិត្តក្នុងការឈានទៅចុះកិច្ចព្រមព្រៀង សន្តិភាព ហើយនិងលុបបំបាត់ចោល ទាំងស្រុងអាវុធនុយក្លេអ៊ែរ នៅឧបទ្វីបកូរ៉េ។
សូមអាន៖ប្រតិកម្មអាមេរិកក្រោយជំនួបរវាងកូរ៉េខាងជើងនិងខាងត្បូង
នៅក្នុងសេចក្តីថ្លែងការណ៍នៅថ្ងៃម្សិលមិញ សេតវិមានបានសរសេរថា ជំនួបកំពូលអាមេរិក កូរ៉េខាងជើង ជាសំណុំរឿង ដែលលោកដូណាល់ ត្រាំ ត្រូវលើកយកទៅពិភាក្សាជាមួយ លោកមូន ចៃអ៊ីន ប្រធានាធិបតីកូរ៉េខាងត្បូង ដែលត្រូវធ្វើទស្សនកិច្ចនៅទីក្រុងវ៉ាស៊ីនតោន នៅថ្ងៃទី ២២ឧសភាខាងមុខ។ ទោះបានការសន្យាចុះកិច្ចព្រមព្រៀងសន្តិភាពជាមួយកូរ៉េខងជើង កូរ៉េខាងត្បូង កំពុងបារម្ភផងដែរពីលទ្ធភាពដកកងទ័ពអាមេរិកចេញពីទឹកដីកូរ៉េខាងត្បូង។ សម្រាប់ទីប្រឹក្សាសន្តិសុខជាតិកូរ៉េខាងត្បូង ដែលកំពុងធ្វើទស្សនកិច្ចនៅសហរដ្ឋអាមេរិក ការលើកនិយាយពីការដកកងទ័ពអាមេរិកចេញពីកូរ៉េខាងត្បូង គឺជារឿងដែលមិនអាចទទួលយកបានឡើយ។ តាមកាសែតអាមេរិក New York Times ចុះផ្សាយនៅថ្ងៃសុក្រ លោកដូណាល់ ត្រាំ បានបញ្ជាឲ្យក្រសួងការពារជាតិអាមេរិកសិក្សា ពីលទ្ធភាពកាត់បន្ថយចំនួនកងទ័ពអាមេរិក នៅទឹកដីកូរ៉េខាងត្បូង។
លោកដូណាល់ ត្រាំ ដែលបានបដិសេធ ទាត់ចោល ព័ត៌មានចុះផ្សាយរបស់កាសែត បានអះអាងនៅថ្ងៃសុក្រ ម្សិលមិញ នៅនៅទីក្រុងដាឡាស ក្នុងរដ្ឋតិចសាស់ ថា ទៅថ្ងៃអនាគត លោកពិតជាចង់កាត់បន្ថយការចំណាយសម្រាប់កូរ៉េខាងត្បូង ប៉ុន្តែ សំណុំរឿងកាត់បន្ថយចំនួនទ័ពអាមេរិក នៅកូរ៉េខាងត្បូង គ្មានទេ នៅលើតុរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ