អាហ្វហ្កានីស្ថាន ៖ ទាហានអូតង់បីនាក់ស្លាប់ក្នុងភេរវកម្មអត្តឃាតរបស់ពួកតាលីបង់
ទាហានអូតង់បីនាក់ស្លាប់ បីនាក់ទៀតរងរបួស នៅក្នុងភេរវកម្មអត្តឃាត នៅថ្ងៃអាទិត្យទី៥សីហានេះ។ ហេតុការណ៍បានកើតឡើង នៅក្បែរមូលដ្ឋានទ័ពអូតង់ ដ៏ធំជាងបង្អស់មួយ ប្រចាំអាហ្វហា្កនីស្ថាន។ ជាភេរវកម្ម ដែលបង្កឡើងដោយអត្តឃាតជនថ្មើរជើងម្នាក់ ប្រឆាំងនឹងកងទ័ពអូតង់ ដែលកំពុងដើរល្បាត ជាមួយកងទ័ពអាហ្វហ្កានីស្ថាន នៅភាគខាងជើងក្រុងកាប៊ូល។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍ មេបញ្ជាការកងទ័ពអូតង់ បានបញ្ជាក់ថាមានទាហានរងរបួសម្នាក់ជាជនជាតិអាមេរិក ពីរនាក់ទៀត ជាជនជាតិអាហ្វហ្កានីស្ថាន និងស្លាប់បីនាក់នៅក្នុងភេរវកម្មអត្តឃាត។ ប៉ុន្តែដូចទម្លាប់អូតង់មិនបានបញ្ជាក់ទេអំពីសញ្ជាតិរបស់ទាហានបាត់បង់ជីវិត។ បន្តិចក្រោយមកទើបគេឃើញមានសេចក្តីបញ្ជាក់ព័ត៌មានថា ទាហានអូតង់ដែលស្លាប់ ដោយរងរបួសធ្ងន់ពេកក្នុងភេរវកម្មអត្តឃាតនោះ មានសញ្ជាតិឆែក ទាំងបីនាក់ ! ជាការបញ្ជាក់របស់យោធាឆែក ដោយអះអាងទៀតថា អត្តឃាតជន បានដឹកនាំធ្វើភេរវកម្មអត្តឃាត ប្រឆាំងនឹងក្បួនទ័ពអូតង់ដែលកំពុងដើរល្បាត នៅមិនឆ្ងាយប៉ុន្មានពីលេនដ្ឋានBagram។ បាហ្ក្រាមជាមូលដ្ឋានទ័ពអូតង់ដ៏ធំជាងគេ នៅចម្ងាយប្រមាណតែ៥០គីឡូម៉ែត្រពីទីក្រុងកាប៊ូល។
តាលីបង់បានចេញសារទ្វីតភ្លាមដែរ ទទួលស្គាល់ភេរវកម្មនេះថាជាស្នាដៃរបស់ពួកគេប្រឆាំងនឹងកងកម្លាំងអាមេរិកឈ្លានពាន។
សូមបញ្ជាក់ថា បច្ចុប្បន្ននេះ មានទាហានអូតង់ចំនួន១៦០០០នាក់ ត្រូវជា៤១សញ្ជាតិ កំពុងបំពេញការងារនៅលើទឹកដីអាហ្វហ្កានីស្ថាន ក្នុងបេសកកម្មជាកងទ័ពជំនួយនិងគ្រូបំពាក់បំប៉នទាហានអាហ្វហ្កានីស្ថាន។ ប៉ុន្តែភាគច្រើន ១៣០០០នាក់ជាទាហានអាមេរិក ហើយក្នុងនោះ២០០០នាក់ជាទាហានប្រយុទ្ធក្នុងក្របខ័ណ្ឌប្រឆាំងនឹងភេរវកម្ម។
គិតមកទល់នឹងខែសីហានេះ មានទាហានអាមេរិកចំនួន៤នាក់បានបាត់បង់ជីវិត ទល់១១នាក់ស្លាប់កាលពីឆ្នាំ២០១៧។ ចំណែកឆែកវិញបានរកខាតបង់ជីវិតទាហានច្រើនជាងគេ នៅឆ្នាំ២០១៨នេះ ដោយរាប់ឃើញមានស្លាប់នៅ អាហ្វហ្កានីស្ថានទៅ ១៣នាក់។
ក្នុងរយៈពេលប៉ុន្មានខែនេះ សកម្មភាពយោធារបស់ពួកតាលីបង់ប្រឆាំងនឹងកងទ័ពអាហ្វហ្កានីស្ថាន-អាមេរិកហាក់ឡើងតានតឹងខ្លាំង មិនថានៅភាគខាងកើតប្រទេស ក្នុងខេត្តជាប់ព្រំប្រទល់ជាមួយប៉ាគីស្ថាន ឬខាងភាគពាយ័ព្យប្រទេស ក្នុងខេត្តជាប់ព្រំប្រទល់អ៊ីរ៉ង់ទេ។ ទន្ទឹមពេលជាមួយគ្នានេះទៀត ពួកអង្គការរដ្ឋអ៊ីស្លាមក៏បង្កើនសកម្មភាពភេរវកម្មប្រឆាំងនឹងទីតាំងជាច្រើននៅតាមក្រុងធំៗ ដូចជានៅកាប៊ូល ឬនៅហ្សាឡាឡាបាត។ ជាក់ស្តែងកាលពីថ្ងៃសុក្រ អង្គការរដ្ឋអ៊ីស្លាមបានប្រកាសថាជាអ្នកធ្វើភេរវកម្មអត្តឃាតប្រឆាំងនឹងវិហារអ៊ីស្លាមនៅភាគខាងកើតប្រទេសបង្កឱ្យស្លាប់៣៥នាក់និងរបួសជាង៩០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ