អាមេរិកបានបរិហារចិនយ៉ាងចាស់ដៃពីបទធ្វើទុក្ខបុកម្នេញលើជនជាតិភាគតិចអ៊ុយហ្គួរ
ទំនាក់ទំនងរវាងអាមេរិក និងចិនហាក់កំពុងឡើងតានតឹងកាន់តែខ្លាំង។ បន្ទាប់ពីសំណុំរឿងពាណិជ្ជកម្មតាមរយៈការដំឡើងពន្ធលើទំនិញចិននាំចូលអាមេរិក និងការប្រកាសដាក់ទ័ណ្ឌកម្មលើអង្គភាពកងចិនក្នុងរឿងទិញអាវុធរុស្ស៊ីមក រដ្ឋបាលអាមេរិកតាមរយៈប្រមុខការទូតលោក Mike Pompeo បានបរិហារចិនក្នុងសំណុំរឿងជនជាតិភាគតិចអ៊ុយហ្គួរ។ នៅក្នុងសុន្ទកថាស្តីពីសេរីភាពសាសនានាថ្ងៃសុក្រ ទី២១ កញ្ញា លោក Pompeo បានបញ្ជាក់ថា មានជនជាតិអ៊ុយហ្គួរជាច្រើនពាន់ លាននាក់ត្រូវបានរដ្ឋអំណាចចិនឃុំនៅក្នុងជំរំ ហើយជំនឿសាសនារបស់ពួកគេក៏ត្រូវបានបំផ្លាញវិនាសសាបសូន្យ។
ចុះផ្សាយនៅថ្ងៃ៖
ស្តាប់ - ០១:១៣
« មានជនជាតិភាគតិចអ៊ុយហ្គួរជាច្រើនរយ ពាន់នាក់ និងអាចមានដល់លាននាក់កំពុងជាប់ឃុំឃាំងនៅក្នុងជំរំដែលគេឲ្យឈ្មោះថា ជំរំទទួលការអប់រំ។ ទង្វើមួយនេះជាការប្រឆាំងនឹងសុឆន្ទៈរបស់ពលរដ្ឋអ៊ុយហ្គួរ ព្រោះនៅក្នុងជំរំឃុំឃាំង ជនជាតិភាគតិចអ្នកកាន់សាសនាអ៊ីស្លាមក្នុងប្រទេសចិនមួយនេះ មានអ្នកខ្លះត្រូវបានគេចាប់បង្ខំឲ្យរៀនសូត្រនយោបាយតឹងតែង ហើយមានខ្លះទៀតបានទទួលរងទារុណកម្មយ៉ាងព្រៃផ្សៃជាទីបំផុត។
ជំនឿសាសនារបស់ពួកគេត្រូវបានបំផ្លាញសាបសូន្យ។ ក្រៅពីក្តីបារម្ភចំពោះជោគវាសនារបស់ជនជាតិភាគតិចអ៊ុយហ្គួរ យើងក៏កំពុងព្រួយបារម្ភផងដែរពីការតាមធ្វើទុក្ខបុកម្នេញលើក្រុមអ្នកកាន់សាសនាគ្រិស្តពីសំណាក់រដ្ឋអំណាចចិន។ រូបភាពនៃការដាក់គំនាបលើសហគមន៍អ្នកកាន់សាសនាគ្រិស្តពីរដ្ឋអំណាចចិនរួមមាន ការបិទវិហារកាតូលិក ការដុតគុម្ពីរគ្រិស្តសាសនា និងការចាប់បង្ខំគ្រិស្តសាសនិកជនឲ្យចុះហត្ថលេខាលើកិច្ចសន្យាបោះបង់ចោលជំនឿសាសនារបស់ពួកគេជាដើម »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ