របាយការណ៍អាមេរិក៖ កងទ័ពអាហ្វហ្កានីស្ថានជាគ្រោះថ្នាក់ សម្រាប់សន្តិសុខជាតិ
នៅក្នុងរបាយការណ៍ចេញផ្សាយនៅថ្ងៃព្រហស្បតិ៍ម្សិលមិញ អាមេរិកបានព្រមានពីគ្រោះថ្នាក់របស់កងទ័ពអាហ្វហ្កានីស្ថាន សម្រាប់សន្តិសុខប្រទេស នៅក្នុងករណីមានកិច្ចព្រមព្រៀងសន្តិភាពជាមួយក្រុមឧទ្ទាមតាលីបង់។ កងទ័ពមានតួនាទីការពារ ប្រទេសជាតិ ប៉ុន្តែ ហេតុអ្វី បានជាកងទ័ពអាហ្វហ្កានីស្ថាន បែរទៅជាគ្រោះថ្នាក់គំរាមកំហែងដល់សន្តិសុខជាតិទៅវិញ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
អាហ្វហ្កានីស្ថានបច្ចុប្បន្ន មានទាហានសរុប ៣សែននាក់ ដែលភាគច្រើនមានបំពាក់អាវុធគ្រប់ដៃ។ ប្រាក់ខែ របស់ពួកគេ បានមកពីជំនួយហិរញ្ញវត្ថុអន្តរជាតិ ជាពិសេសពីសហរដ្ឋអាមេរិកផ្ទាល់។ ដូច្នេះ បើសិនជំនួយហិរញ្ញវត្ថុ ឈានដល់ទីបញ្ចប់ ក្នុងករណីមានកិច្ចព្រមព្រៀងសន្តិភាពជាមួយ ក្រុមឧទ្ទាមតាលីបង់ នោះគឺទាហានអាហ្វហ្កានីស្ថានខ្លួនឯង ដែលនឹងក្លាយគ្រោះថ្នាក់ គំរាមកំហែងដល់សន្តិសុខជាតិរបស់អាហ្វហ្កានីស្ថានវិញម្តង។ នេះជាការព្រមានរបស់មន្រ្តីអាមេរិក ដែលទទួលបន្ទុក លើគម្រោងការស្រោចស្រង់ស្តារឡើងវិញប្រទេសអាហ្វហ្កានីស្ថាន។
រដ្ឋបាលលោកដូណាល់ ត្រាំ ដែលចង់កាត់បន្ថយចំណាយថវិកាធ្វើសង្រ្គាមនៅអាហ្វហ្កានីស្ថាន បានចាប់ផ្តើមចរចាស្វែងរកសន្តិភាពជាមួយតាលីបង់ តាំងពីពាក់កណ្តាលឆ្នាំមុន នៅប្រទេសកាតា។ នៅបទបង្ហាញរបាយការណ៍របស់លោក នៅទីក្រុងវ៉ាស៊ីនតោន លោកJohn Sopko បានសំដែងការគាំទ្រដល់ដំណើរការចរចាសន្តិភាព អាហ្វហ្កានីស្ថាន ជាមួយ ក្រុមតាលីបង់ ប៉ុន្តែ ជាមួយគ្នានោះ លោកក៏ទាញសញ្ញាអាសន្នផងដែរ ពីក្តីអស់សង្ឃឹម របស់រដ្ឋាភិបាល ហើយនិងកងទ័ពអាហ្វហ្កានីស្ថាន នៅពេលគ្មានជំនួយហិរញ្ញវត្ថុរបស់អាមេរិក។ គ្មានជំនួយបរទេស ដែលជាទីពំនឹងរហូតមក កងទ័ពប្រដាប់អាវុធអាហ្វហ្កានីស្ថាន អាចក្លាយខ្លួនជាគ្រោះថ្នាក់គំរាមកំហែងទៅវិញ សម្រាប់សន្តិសុខអាហ្វហ្កានីស្ថាន។
សូមបញ្ជាក់ថា នៅក្នុងសង្រ្គាម ១៧ឆ្នាំ នៅអាហ្វហ្កានីស្ថាន អាមេរិក បានចំណាយទឹកប្រាក់ប្រមាណ ៧៨០ពាន់លានដុល្លារ ដែលនៅក្នុងនោះ ១៥ភាគរយ ត្រូវបានប្រើប្រាស់សម្រាប់ការកសាង អាហ្វហ្កានីស្ថានឡើងវិញ។ នៅក្នុងទឹកប្រាក់សម្រាប់ស្តារប្រទេសឡើងវិញ ទៀតសោត ៦៣ភាគរយ ត្រូវចាយទៅលើការបើកប្រាក់ខែរបស់កងទ័ព កងកម្លាំងរក្សាសន្តិសុខ ហើយនិងជាពិសេសទៅលើការបណ្តុះបណ្តាលប៉ូលិស និងទាហានអាហ្វហ្កានីស្ថាន ដែលត្រូវធានារក្សា សន្តិសុខ នៅក្រោយ កងទ័ពបរទេសដកចេញទាំងស្រុងពីអាហ្វហា្កនីស្ថាន។
មួយវិញ ទៀត ក្នុងករណីគេរកឃើញកិច្ចព្រមព្រៀងសន្តិភាពនៅអាហ្វហ្កានីស្ថាន ទាហានតាលីបង់ ប្រមាណ ៦ម៉ឺននាក់ នឹងត្រូវធ្វើសមាហរណកម្ម ឲ្យត្រលប់ទៅរស់នៅក្នុងសង្គមអាហ្វហ្កានីស្ថានឡើងវិញ។ បើសិនក្រុមតាលីបង់យល់ថា ខ្លួនមិនបានទទួលប្រយោជន៍ សេដ្ឋកិច្ចពីកិច្ចព្រមព្រៀងសន្តិភាពជាមួយអាមេរិកទេ នោះ ពួកគេអាចនឹងត្រលប់ទៅប្រព្រឹត្តអំពើហិង្សា សាជាថ្មី បានយ៉ាងឆាប់បំផុត។ សម្រាប់អធិការកិច្ចអាមេរិក ទទួលបន្ទុកស្តារកសាងអាហ្វហ្កានីស្ថាន វាសំខាន់ណាស់ដែលប្រទេសម្ចាស់ជំនួយ គិតគូរល្អិតល្អន់ពី អនាគតរបស់អាហ្វហ្កានីស្ថាន ទោះបីជាគេរកបានកិច្ចព្រមព្រៀងសន្តិភាពជាមួយ ពួកឧទ្ទាមតាលីបង់ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ