របាយការណ៍៖ ព្រៃត្រូពិកទំហំស្មើប្រទេសអង់គ្លេសត្រូវបានបំផ្លាញ នៅឆ្នាំ ២០១៨
នៅឆ្នាំ ២០១៨ ពិភពលោកបានបាត់បង់ព្រៃត្រូពិក ប្រមាណ ១២លានហិចតា ឬស្មើនឹងទំហំផ្ទៃដីប្រទេសអង់គ្លេស។ របាយការណ៍របស់វិទ្យាស្ថានតាមដានព្រៃក្នុងពិភពលោក ចេញផ្សាយនៅថ្ងៃព្រហស្បតិ៍នេះ បានបង្ហាញដែរថា នៅក្នុងចំណោមព្រៃត្រូពិកដែលបាត់បង់កាលពីឆ្នាំ ២០១៨ មានព្រៃត្រូពិក ជាង៣លានហិចតា ដែលដើរតួនាទីសំខាន់ សម្រាប់អាកាសធាតុ ហើយនិងជីវិតរបស់ជីវចម្រុះ នៅលើផែនដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
របាយការណ៍របស់វិទ្យាសា្ថនតាមដានព្រៃឈើសកល Global Forest Watch បានចាត់ទុកឆ្នាំ ២០១៨ ជាឆ្នាំអាក្រក់លើកទី៤ នេះបើគេមើលតួលេខ ដ៏គួរឲ្យភ្ញាក់ផ្អើលនៃទំហំព្រៃត្រូពិកដែលត្រូវបំផ្លាញ នៅឆ្នាំ ២០១៨។ តាមវិទ្យាស្ថានតាមដានព្រៃឈើ ដែលមានទីតាំង នៅសកលវិទ្យាល័យ Maryland សហរដ្ឋអាមេរិក ជារៀងរាល់ថ្ងៃ ព្រៃត្រូពិក ដែលមានទំហំស្មើនឹងតារាងបាល់ទាត់ ចំនួន ៣០ ត្រូវបានបំផ្លាញ នៅរៀងរាល់មួយនាទី ឬអាចថា ក្នុងមួយឆ្នាំ២០១៨ ព្រៃត្រូពិក ប្រមាណ ១២លានហិចតា បានរលាយបាត់មុខពីលើផែនដី។
តាមប្រធានក្រុមអ្នកស្រាវជ្រាវរបស់វិទ្យាស្ថានព្រៃឈើសកល ទិន្នន័យផ្កាយរណប ដែលត្រូវបានដាក់ឲ្យប្រើប្រាស់តាំងពីឆ្នាំ ២០០១ បានបង្ហាញ ថា ព្រៃត្រូពិកដែលត្រូវគេកាប់ដុតបំផ្លាញ កាលពីឆ្នាំ ២០១៨ មានសំបូរទៅដោយដើមឈើ ដែលមានចំណាស់ រាប់រយ ឬរាប់ពាន់ឆ្នាំ។
ក្រៅតែពីបាតុភូតធម្មជាតិ El Nino ដែលបានបំផ្លាញព្រៃត្រូពិកយ៉ាងធ្ងន់ធ្ងរកាលពីឆ្នាំ ២០១៦ ការបាត់បង់ព្រៃឈើ ត្រូពិកនៅឆ្នាំ ២០១៨ កើតឡើងភាគច្រើន ដោយសារស្នាដៃបំផ្លាញរបស់មនុស្ស។ មនុស្សកាប់ដុតព្រៃត្រូពិក ដើម្បី ការពង្រីកឧស្សាហកម្មចិញ្ចឹមសត្វ ពង្រីកដីកសិកម្ម ដើម្បី ដាំដូងប្រេង ដូចជានៅអាស៊ី ឬនៅអាហ្វ្រិក និងដីកសិកម្មដាំសណ្តែក និងដំណាំសម្រាប់យកប្រេង នៅតំបន់អាមេរិកភាគខាងត្បូង។
ព្រៃត្រូពិកមានសារៈសំខាន់ សម្រាប់ទាំងអាកាសធាតុ ហើយនិងជីវចម្រុះ ជីវិតសត្វព្រៃ។ កាប់ដុតបំផ្លាញព្រៃត្រូពិក មិនត្រឹមតែបញ្ចេញ ឧស្ម័ន កាបូនិកតែប៉ុណ្ណោះទេ ប៉ុន្តែ វាបំផ្លាញផងដែរ អេប៉ុង ដែលមានតួនាទី សំខាន់ក្នុងការស្រូបយកឧស្ម័នកាបូនិក។
អ្នកជំនាញបានវាយតម្លៃថា ព្រៃឈើ នៅលើផែនដី ស្រូបយក៣០ភាគរយនៃឧស្ម័ន កាបូនិក ដែលមនុស្សជាអ្នកបង្កឡើង ពោល គឺ ប្រមាណ ១១ពាន់លានតោន នៅក្នុងមួយឆ្នាំៗ។ ចំណែកទឹកសមុទ្រ វិញ ស្រូបស្តុកទុក ឧស្ម័នកាបូនិកបានតែ២៣ភាគរយប៉ុណ្ណោះ។
ប្រេស៊ីល ដែលគ្របដណ្តប់ដោយព្រៃត្រូពិកសំខាន់ ជាពិសេសតំបន់អាម៉ាហ្សូន ស្ថិតនៅចំណាត់ថ្នាក់ទី១ ខាងបាត់បង់ព្រៃត្រូពិក បន្ទាប់មក គឺ ឥណ្ឌូណេស៊ី សាធារណរដ្ឋប្រជាធិបតេយ្យ កុងហ្គោ កូឡុំប៊ី និងបូលីវី។ តាមអ្នកស្រាវជ្រាវរបស់វិទ្យាស្ថានតាមដានព្រៃក្នុងពិភពលោក នៅពេលស្ថានភាព ការបាត់បង់ព្រៃត្រូពិក ហាក់ថយចុះ នៅឥណ្ឌូណេស៊ី ដោយមកពីមានវិធានការទប់ស្កាត់របស់រដ្ឋាភិបាល ហើយការធ្លាក់ចុះនៃចំនួនភ្លើងឆេះព្រៃ ស្ថានភាព បំផ្លាញ ព្រៃឈើ នៅតែធ្លាក់ធ្ងន់ធ្ងរ នៅ ប្រេស៊ីល ជាទី ដែលប្រធានាធិបតីថ្មី លោក Bolsonaro បានសន្យាលុបបំបាត់ចោលច្បាប់ហាមឃាត់កាប់ព្រៃឈើមួយចំនួន ដើម្បីជំរុញ ការធ្វើអាជីវកម្ម ទៅលើតំបន់ព្រៃ ដូចជាបើកផ្លូវឲ្យមានជំនួញ កសិដ្ឋាន ហើយនិងជីកយករ៉ែ នៅក្នុងតំបន់ព្រៃអាម៉ាហ្សូនជាដើម៕
សូមអាន៖ ឥណ្ឌូណេស៊ី ផ្អាកបណ្តោះអាសន្ន មិនឲ្យមានចំការដូងប្រេងថ្មី
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ