Airbus រងការវាយប្រហារអ៊ីនធ័រនែតមួយខ្សែមកពីចិន តែប៉េកាំងបដិសេធ
ក្រុមហ៊ុនផលិតយន្តហោះអឺរ៉ុប Airbus រងការប្រហារព័ត៌មានវិទ្យាមួយខ្សែ ក្នុងរយៈពេលប៉ុន្មានខែចុងក្រោយនេះ។ ជាការវាយប្រហារតាមរយៈក្រុមហ៊ុនម៉ៅការបន្ត។ ភ្នាក់ងារសន្តិសុខជាច្រើន សង្ស័យថាការវាយប្រហារអ៊ីនធ័រនែតនេះជាប្រតិបត្តិការចារកិច្ចឧស្សាហកម្មដែលបញ្ជាមកពីប្រទេសចិន។ ការចោទប្រកាន់នេះត្រូវបានក្រសួងការបរទេសចិន ច្រានចោលយ៉ាងស្រុង។
ចុះផ្សាយនៅថ្ងៃ៖
ស្តាប់ - ០២:០២
ក្នុងរយៈពេល១២ខែចុងក្រោយនេះ ក្រុមហ៊ុនAirbus រងការវាយប្រហារអ៊ីនធ័រនែតទ្រង់ទ្រាយធំ ចំនួនបួនករណី ! សញ្ញាវាយលុកលើសាខាអង់គ្លេស និងនៅសាខាជំនាញខាងផលិតម៉ាស៊ីន Rolls Royce អនុញ្ញាតឱ្យអ្នកជំនាញយល់ពីការវាយប្រហារពីរមុនលើសាខាផ្សេងទៀតរបស់ក្រុមហ៊ុន ដូចការវាយប្រហារលើសាខាបារាំងផ្នែកបច្ចេកវិទ្យាExpleo កាលពីចុងឆ្នាំ២០១៨មក និងក្រុមហ៊ុនម៉ៅការបន្តពីរនៅបារាំង ដែលភ្នាក់ងារព័ត៌មានបារាំងមិនដឹងឈ្មោះ។
ក្រុមចោរបានប្រើវិធីសាស្ត្រ បែបចាស់គំរិលមួយ តែប្រកបដោយមធ្យោបាយទំនើបខ្លាំងបំផុត ដៅការវាយប្រហារលើបណ្តាញឯកជន VPN (Virtual Private Network) របស់ក្រុមហ៊ុនដែលម៉ៅការបន្ត ដើម្បីជាឈ្នាន់សម្រាប់ចូលទៅក្រុមហ៊ុនមេ។ តាមក្បួន បើគេអាចជ្រៀតចូលដល់បណ្តាញឯកជនVPN ដែលមានលេខកូដសម្រាប់ឱ្យសាខានីមួយៗទាក់ទងគ្នាប្រកបដោយសុវត្ថិភាពហើយ នោះក្រុមចោរព័ត៌មានវិទ្យាពិតជាអាចចូលបានគ្រប់ផ្នែកនៃប្រព័ន្ធរបស់ក្រុមហ៊ុនមេទាំងមូល។
សម្រាប់ភ្នាក់ងារសុវត្ថិភាពព័ត៌មានវិទ្យាបារាំង នេះជាប្រតិបត្តិការវាយប្រហារដ៏ធ្ងន់ធ្ងរខ្លាំងបំផុត ដែលមានមូលហេតុនិងវិធីសាស្ត្រប្លែកៗពីគ្នា។ បន្ទាប់ពីការសិក្សានិងអង្កេតជាច្រើនមក គេអាចសន្និដ្ឋាននិងកំណត់បានអំពីកម្មវត្ថុនៃការវាយប្រហារថាជាចារកិច្ចឧស្សាហកម្ម។ ភាពសង្ស័យ ផ្តោតខ្លាំងទៅលើក្រុមចោរអ៊ីនធ័រនែតនៅចិន ៖ ប្រភពជាច្រើនបានបង្ហើបថាជាក្រុមចោរអ៊ីនធ័រនែតរបស់ភ្នាក់ងារចារកិច្ចចិន សម្គាល់ដោយលេខសម្ងាត់ APT10 ប្រភពមួយទៀតថាជាក្រុមចោរជំនាញក្នុងវិស័យអាកាសចរណ៍ របស់ក្រសួងសន្តិសុខចិន។ ប៉ុន្តែគេបដិសេធមិនធ្វើការចោទប្រកាន់ជាផ្លូវការនិងចំៗលើភាគីណាទេ។
ខាងចិនវិញ គ្រាន់តែបានឃើញដំណឹងស្តីពីការវាយប្រហារអ៊ីនធ័រនែតលើក្រុមហ៊ុនផលិតយន្តហោះភ្លាម ក្រសួងការបរទេសចិន បានចេញសេចក្តីថ្លែងការណ៍បដិសេធ និងប្រកាសថ្កោលទោសរាល់គ្រប់ទម្រង់នៃការវាយប្រហារព័ត៌មានវិទ្យា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ