ហុងកុង៖ក្រុមអ្នកគាំទ្រប្រជាធិបតេយ្យចូលរួមប្រារព្ធខួប ៥ឆ្នាំនៃចលនាឆត្រកាលពីឆ្នាំ ២០១៤
នៅហុងកុង មានអ្នកគាំទ្រប្រជាធិបតេយ្យជាច្រើនពាន់នាក់បាននាំគ្នាដង្ហែរក្បួនតាមផ្លូវនាយប់ថ្ងៃសៅរ៍ ទី២៨ កញ្ញាដើម្បីប្រារព្ធខួបគម្រប់ ៥ឆ្នាំនៃការផ្តើមចលនាឆត្រក្នុងថ្ងៃទី២៨ កញ្ញា ឆ្នាំ ២០១៤។ កាលពី ៥ឆ្នាំមុន មានសិស្ស និស្សិតជាច្រើនពាន់នាក់បាននាំគ្នាតវ៉ាដោយសន្តិវិធីប្រឆាំងនឹងគម្រោងកំណែទម្រង់របស់ចិនដីគោកស្តីពីការបោះឆ្នោតជ្រើសរើសប្រមុខដឹកនាំហុងកុង។ ក្នុងរយៈពេល ៧៩ថ្ងៃ ចលនាឆត្ររបស់សិស្ស និស្សិតបានបិទផ្លូវ និងបោះទីតាំងនៅតាមទីតាំងសំខាន់ៗមួយចំនួនរហូតដល់មានការវាយបង្រ្កាបយ៉ាងចាស់ដៃពីកម្លាំងប៉ូលិសដោយប្រើគ្រាប់បែកផ្សែងបង្ហូរទឹកភ្នែក។ នៅពេលនោះ បាតុករសិស្ស និស្សិតបានប្រើឆត្រដើម្បីការពារខ្លួន។ ៥ឆ្នាំក្រោយចលនាឆ័ត្រ ក្រុមអ្នកប្រជាធិបតេយ្យកំពុងបន្តទាមទារសេរីភាព ប្រជាធិបតេយ្យ និងសិទ្ធិក្នុងការជ្រើសរើសថ្នាក់ដឹកនាំរបស់ខ្លួន។ លោក Joshua Wong មេដឹកនាំចលនាឆត្រតាំងពីឆ្នាំ ២០១៤ និងដែលសព្វថ្ងៃជាអគ្គលេខាធិការគណបក្ស Demosisto បានប្រកាសឈរឈ្មោះសម្រាប់ការបោះឆ្នោតឃុំ សង្កាត់នៅដំណាច់ខែវិច្ឆិកាខាងមុខ។ តាមលោក Joshua Wong ប្រទេសមួយប្រព័ន្ធពីររបស់ហុងកុងសព្វថ្ងៃកំពុងក្លាយជាប្រទេសមួយ និងប្រព័ន្ធពាក់កណ្តាលនៅក្រោមគំនាបរបស់ចិនប៉េកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
« ចលនាឆត្រជាសញ្ញាសម្គាល់មួយយ៉ាងសំខាន់នៃចលនាប្រឆាំងនៅហុងកុង។ អ្វីដែលសំខាន់បំផុតសម្រាប់យើង គឺប្រជាជនហុងកុងបន្តការខិតខំប្រឹងប្រែងរបស់ខ្លួនដើម្បីលទ្ធិប្រជាធិបតេយ្យ។ កាលពី ៥ឆ្នាំមុនយើងបាននិយាយថា យើងនឹងត្រឡប់មកវិញ។ ឃើញទេឥឡូវនេះ យើងបានត្រឡប់មកវិញដោយមានមនុស្សលាននាក់ដើម្បីបន្តការទាមទារ។ យើងសង្ឃឹមថា ប្រជាជនហុងកុងអាចសម្រេចអ្វីៗគ្រប់យ៉ាងដោយខ្លួនឯង សម្រេចពីអធិបតេយ្យ សម្រេចពីរបៀបរស់នៅ និងសម្រេចពីជោគវាសនាអនាគតរបស់ខ្លួន។
ប្រព័ន្ធប្រជាធិបតេយ្យដែលប្រជាជនហុងកុងទាមទារថ្ងៃនេះមានចែងយ៉ាងច្បាស់នៅក្នុងសេចក្តីថ្លែងការណ៍រួមរវាងប្រទេសចិន និងប្រទេសអង់គ្លេសក្នុងឆ្នាំ ១៩៨៤។ ដូច្នេះគេត្រូវតែគោរពពាក្យសន្យានេះ។ អស់លោកដឹងទេថាសព្វថ្ងៃនេះ ប្រជាជនហុងកុងគ្មានសិទ្ធិជ្រើសរើសប្រមុខដឹកនាំរបស់ខ្លួនទេ ហើយរដ្ឋអំណាចហុងកុងស្តាប់ និងធ្វើតាមតែចិនដីគោក។ ប្រទេសមួយប្រព័ន្ធពីររបស់ហុងកុងសព្វថ្ងៃកំពុងក្លាយជាប្រទេសមួយ និងប្រព័ន្ធពាក់កណ្តាលនៅក្រោមគំនាបរបស់ចិនប៉េកាំង។
ការចាប់បញ្ជូនអ្នកតវ៉ាវ័យក្មេងទៅដាក់ពន្ធនាគារ ឬការដកហូតសិទ្ធិអ្នកតំណាងរាស្រ្តរបស់យើងជាសក្ខីកម្មដែលបង្ហាញថា យើងកំពុងប្រឈមនឹងការគាបសង្កត់ឥតឈប់ឈរនៅក្នុងប្រព័ន្ធនយោបាយបច្ចុប្បន្ន។ សំណួរដែលចោទពេលនេះមិនមែនដើម្បីចង់ដឹងថា តើខ្ញុំជាបេក្ខជនចូលរួមនៅក្នុងការបោះឆ្នោតឬអត់ទេ។ តែត្រូវសួរថា តើទីក្រុងប៉េកាំងនឹងធ្វើអ្វីគ្រប់យ៉ាងដើម្បីរារាំងយើងកុំឲ្យចូលរួមនៅក្នុងការបោះឆ្នោតឬអត់។
សម្រាប់យើង វាមានសារៈសំខាន់ខ្លាំងណាស់ក្នុងការស្វែងការគាំទ្រពីប្រជាជននៅតាមសង្កាត់នានាក៏ដូចជាការដង្ហែរក្បួននៅតាមដងផ្លូវ ឬមួយក៏ស្វែងរកការគាំទ្រនៅលើឆាកអន្តរជាតិ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ