អូស្រា្តលី៖ទីក្រុងស៊ីដនីគ្របដណ្តប់ដោយផ្សែងពុលដែលកើតចេញពីភ្លើងឆេះព្រៃ
នៅថ្ងៃអង្គារ ទី១៩ វិច្ឆិកា ទីក្រុងស៊ីដនីនៃរដ្ឋ New South Wales ក្នុងប្រទេសអូស្រា្តលីកំពុងគ្របដណ្តប់ដោយផ្សែងពុលយ៉ាងក្រាស់ឃ្មឹកដែលកើតចេញពីភ្លើងឆេះព្រៃនៅជាប់ឆ្នេរសមុទ្រតាំងពីថ្ងៃសុក្រ ទី១៥ វិច្ឆិកា។ តាមតួលេខផ្លូវការ កម្រិតជាតិពុលនៅក្នុងផ្សែងបានឡើងដល់កម្រិតប្រកបដោយគ្រោះថ្នាក់ខ្លាំង ព្រោះអត្រាលំអងល្អិតឆ្មារនៅក្នុងខ្យល់បានកើនខ្ពស់ដូចមាននៅក្នុងទីក្រុងញូដែលី ប្រទេសឥណ្ឌា។ រដ្ឋអំណាចទីក្រុងស៊ីដនីបានផ្តល់អនុសាសន៍ឲ្យពលរដ្ឋចៀសវាងសកម្មភាពនៅខាងក្រៅ។
ចុះផ្សាយនៅថ្ងៃ៖
ស្តាប់ - ០១:៤៧
គេត្រូវរងចាំនៅវេលាថ្ងៃត្រង់ទើបកម្រាស់ផ្សែងចាប់ផ្តើមរំសាយបន្តិចម្តងៗ តែនឹងវិលមកឡើងក្រាស់ឃ្មឹកវិញនាយប់ថ្ងៃអង្គារ ទី១៩ វិច្ឆិកា នេះបើតាមការបញ្ជាក់របស់ការិយាល័យឧតុនិយម។ លោក Richard Broome នាយកសុខភាពបរិស្ថានក្នុងរដ្ឋ News South Wales បានបញ្ជាក់ថា លំអងល្អិតឆ្មារនៅក្នុងខ្យល់អាចធ្វើឲ្យរលកប្រព័ន្ធដង្ហើម និងបង្កឲ្យមានបញ្ហាបេះដូង រួមទាំងសួតធ្ងន់ធ្ងរ។ « ចំពោះមនុស្សភាគច្រើន ផ្សែងបង្កឲ្យមានរោគសញ្ញាស្រាលៗ ដូចយ៉ាងក្រហាយភ្នែក រលាកចម្រុះ និងបំពង់ ក ជាដើម។ តែចំពោះមនុស្សដែលកំពុងមានជំងឺហឺត រលាកសួត និងរលាកបំពង់ ក នឹងទទួលហានិភ័យខ្ពស់ជាមួយនឹងការស្រូបផ្សែង » នេះជាការបន្ថែមរបស់លោក Richard Broome។
គួររម្លឹកថា ផ្សែងដែលកំពុងគ្របដណ្តប់លើទីក្រុងស៊ីដនីពេលនេះបានកើតចេញពីការឆេះព្រៃនៅក្នុងសួនឧទ្យានជាតិចំនួនពីរដែលស្ថិតចម្ងាយប្រមាណជា ១០០គីឡូម៉ែត្រ។ អគ្គីភ័យរយៈពេលប៉ុន្មានថ្ងៃកន្លងទៅបានបំផ្លាញព្រៃឈើជិត ១៤០ ០០០ហិតតា ផ្ទះសម្បែងរាប់រយខ្នង និងសម្លាប់មនុស្សចំនួន ៦នាក់។ ជាមួយនឹងសីតុណ្ហភាពប្រមាណជា ៤០អង្សារ ខ្យល់បោកបក់ខ្លាំង រួមទាំងកម្រិតសំណើមទាបផង ឥទ្ធិពលរបស់អគ្គីភ័យអាចនឹងកើនមួយកម្រិតទៀតនៅថ្ងៃពុធ ទី២០ វិច្ឆិកា។ ជារៀងរាល់ឆ្នាំ អគ្គីភ័យរបៀបនេះឧស្សាហ៍កើតមាននៅអូស្រា្តលីក្នុងនិទាឃរដូវ និងរដូវក្តៅ។
ប៉ុន្តែសម្រាប់ឆ្នាំ ២០១៩ នេះ រដូវភ្លើងឆេះហាក់មានសន្ទុះខ្លាំង ហិង្សា និងអាចចាត់ទុកជាអគ្គីភ័យដ៏អាក្រក់មួយក្នុងចំណោមអគ្គីភ័យដែលអូស្រា្តលីបានជួបប្រទះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ