ចិនកោះហៅទូតអាមេរិក ក្រោយព្រឹទ្ធសភាអនុម័តច្បាប់គាំទ្របាតុករហុងកុង
ព្រឹទ្ធសភាអាមេរិក បានអនុម័តជាឯកច្ឆ័ន្ទ សេចក្តីសម្រេចចិត្តគាំទ្រ “សិទ្ធិមនុស្សនិងលទ្ធិប្រជាធិបតេយ្យរបស់បាតុករហុងកុង”។ ជាសេចក្តីសម្រេចដែលបានធ្វើឱ្យចិនបញ្ចេញប្រតិកម្មក្តៅក្រហាយយ៉ាងខ្លាំង ជាពាក្យព្រមានផង និង ដោយការកោះហៅតំណាងជាន់ខ្ពស់អាមេរិកឱ្យចូលបំភ្លឺផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
នៅល្ងាចថ្ងៃអង្គារម្សិលមិញ ព្រឹទ្ធសភាអាមេរិក បានអនុម័តជាឯកច្ឆ័ន្ទ សេចក្តីសម្រេចចិត្តគាំទ្របាតុករហុងកុងក្នុងបុព្វហេតុសិទ្ធិមនុស្សនិងប្រជាធិបតេយ្យផង និងបានអនុម័តលើវិធានការហាមឃាត់មិនឱ្យមានការលក់ទៅឱ្យប៉ូលិសហុងកុង នូវឧស្ម័នបង្ហូរទឹកភ្នែក គ្រាប់ជ័រ និងសម្ភារៈបរិក្ខារផ្សេងៗសម្រាប់យកទៅបង្ក្រាបបាតុករ។
ប៉ុន្តែ ដោយមិនបង្អង់ ចិនបានបញ្ចេញប្រតិកម្មប្រឆាំងយ៉ាងខ្លាំង។ ប៉េកាំងបានប្រកាសព្រមានថានឹងចាត់វិធានការសងសឹក នៅពេលណាច្បាប់នោះត្រូវអនុម័តមែនទែន និងបានកោះហៅឯកអគ្គរដ្ឋទូតអាមេរិកស្តីទី ឱ្យជួបនៅព្រឹកថ្ងៃពុធនេះ ដើម្បីសម្តែងកំហឹងនិងការតវ៉ាប្រឆាំងជាផ្លូវការ។ ឆ្លើយតបនឹងការកោះហៅ អាមេរិកក៏បានបញ្ជាក់ទៀតអំពីការព្រួយបារម្ភយ៉ាងខ្លាំងរបស់វ៉ាស៊ីនតោន ចំពោះស្ថានភាពហុងកុង។
សម្រាប់ប៉េកាំង ទង្វើរបស់អាមេរិកគឺជាគាំទ្រជនជ្រុលនិយម និងក្រុមប្រឆាំងរដ្ឋអំណាចចិនដែលចង់សាបព្រោះភាពវឹកវរនៅហុងកុង ឆ្លៀតយកចំណេញពីស្ថានភាពនៅហុងកុង ដើម្បីធ្វើយ៉ាងណារារាំងការអភិវឌ្ឍប្រទេសចិន។ គ្រប់ការប៉ុនប៉ងបំផ្លាញភាពរុងរឿងនិងស្ថិរភាពហុងកុងត្រូវតែបរាជ័យ។ នេះជាបើតាមប្រសាសន៍របស់អនុរដ្ឋមន្ត្រីក្រសួងការបរទេសចិន។
ចិនធ្លាប់បានធ្វើការតវ៉ាម្តងហើយកាលពីខែតុលា នៅពេលសភាអាមេរិកបានអនុម័តច្បាប់ប្រហាក់ប្រហែលនឹងសេចក្តីសម្រេចរបស់ព្រឹទ្ធសភាម្សិលមិញ។ គម្រោងច្បាប់ទាំងពីរនេះ នឹងត្រូវបញ្ជូនទៅសភាដើម្បីធ្វើការកែសម្រួលឱ្យស៊ីគ្នាមុននឹងអនុម័តសម្រេចជាចុងក្រោយ ហើយអាចនឹងត្រូវបញ្ជូនទៅឱ្យប្រធានាធិបតីចុះហត្ថលេខាផ្តល់សុពលភាព។
ប្រឈមនឹងស្ថានភាពកាន់តែដុនដាបនៅហុងកុង ព្រឹទ្ធសភាអាមេរិកចង់ផ្តល់សារដ៏ច្បាស់លាស់មួយទៅចិនថា អាមេរិកមិនអាចឈរស្ងៀមអោបដៃមើលប៉េកាំងបំផ្លាញស្វ័យតភាពហុងកុងទេ។ ហុងកុងបានចងភ្ជាប់នឹងវ៉ាស៊ីនតោនដោយលក្ខន្តិកៈសេដ្ឋកិច្ចពិសេស ដែលអនុញ្ញតឱ្យដែនដីនេះបានរួចពីបម្រាមមួយចំនួនដែលអាមេរិកដាក់លើចិន។ លក្ខខណ្ឌពិសេសនេះត្រូវកំណត់សុពលភាពជារៀងរាល់ឆ្នាំ ដោយភ្ជាប់ជាមួយនឹងស្វ័យតភាពនៃការសម្រេចចិត្តរបស់រដ្ឋាភិបាលហុងកុង លើវិស័យសិទ្ធិមនុស្ស គោរពច្បាប់និងសំណើបត្យាប័ន ការបោះឆ្នោតជាសកល ឯករាជភាពតុលាការ-ប៉ូលិស-កងកម្លាំងសន្តិសុខ និងការត្រួតពិនិត្យការនាំចេញ ព្រមទាំងទណ្ឌកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ