តាលីបង់កំពុងបោកបាចព្យុះភេរវកម្មនៅអាហ្វហ្កានីស្ថាន ពេលសម្ព័ន្ធមិត្តជិតចប់បេសកកម្ម
នៅថ្ងៃសៅរ៍ទី ១៣ធ្នូ ២០១៤នេះ អាហ្វហា្កនីស្ថានបានស្គាល់រលកភេរវកម្មបីផ្ទួនៗគ្នា ពីរនៅក្រុងកាប៊ូល និងមួយទៀតនៅភាគខាងត្បូងប្រទេស។ មានស្លាប់យ៉ាងហោចណាស់ ១៣នាក់ ក្នុងភេរវកម្មពីរដំបូង និងយ៉ាងហោចទាហាន៦នាក់ ក្នុងភេរវកម្មអត្តឃាតប្រឆាំងរថយន្តដឹកជញ្ជូនទាហានជាតិ។ នេះបើតាមតុល្យការបណ្តោះអាសន្នបឋម។ ពួកតាលីបង់ ហាក់បានបង្កើនប្រតិបត្តិការថ្មីៗវាយប្រហារភេរវកម្មកាន់តែច្រើនឡើងមកលើអាហ្វហ្កានីស្ថាន ខណៈដែលកងទ័ពសម្ព័ន្ធមិត្តនឹងត្រូវបិទបញ្ចប់បេសកម្មប្រយុទ្ធក្នុងក្របខ័ណ្ឌអូតង់ នៅចុងឆ្នាំ។
ចុះផ្សាយនៅថ្ងៃ៖
ស្តាប់ - ០២:១៤
តាលីបង់បានប្រកាសទទួលស្គាល់ភា្លមថាជាអ្នកបង្កភេរវកម្មនៅក្នុងថ្ងៃសៅរ៍នេះ។ ភេរវកម្មទីមួយ នៅពេលព្រឹក ជាការវាយប្រហារធ្វើឃាតមន្ត្រីជាន់ខ្ពស់នៃតុលាការកំពូល ពេលលោកចាកចេញពីផ្ទះសំដៅការិយាល័យធ្វើការ។ ភេរវកម្មទីពីរបានផ្ទុះឡើងនៅខេត្ត Helmand ភាគខាងត្បូង ប្រឆាំងនឹងក្រុមដោះមីន បណ្តាលឱ្យស្លាប់បុគ្គលិកដោះមីនយ៉ាងហោច១២នាក់ និងការបាញ់ប្រយុទ្ធទល់មុខគ្នារវាងទាហានអាហ្វហ្កានីស្ថាន និងកងប្រដាប់អាវុធតាលីបង់។ នៅពេលល្ងាច រថយន្តក្រុងរបស់កងទ័ពអាហ្វហ្កានីស្ថានបានក្លាយជាចំណុចស៊ីបនៃការវាយប្រហារអត្តឃាតរបស់ពួកតាលីបង់។ អ្នកនាំពាក្យក្រសួងការពារជាតិអាហ្វហ្កានីស្ថាន បដិសេធមិនផ្តល់តុល្យការនៃចំនួនជនគ្រោះភ្លាមទេ។
ការវាយប្រហារភេរវកម្មតាលីបង់ ហាក់មានសន្ធឹកកាន់តែខ្លាំងឡើង ខណៈដែលបេសកកម្មប្រយុទ្ធរបស់កងទ័ពសម្ព័ន្ធមិត្តអូតង់ ដឹកនាំដោយសហរដ្ឋអាមេរិក ត្រូវបិទបញ្ចប់នៅរវាងពីរសប្តាហ៍ទៀតខាងមុខនេះ និងក្រោយពេលព្រឹទ្ធសភាអាមេរិកបើកកកាយអំពើការប្រព្រឹត្តអំពើធ្វើទារុណកម្មរបស់ភ្នាក់ងារស៊ើបការណ៍សម្ងាត់សេអ៊ីអា ទៅលើជនសង្ស័យទាក់ទងនឹងការធ្វើភេរវកម្មថ្ងៃទី ១១កញ្ញា ២០០១។ កាលពីសប្តាហ៍មុន អាហ្វហ្កានីស្ថានបានស្គាល់ភេរវកម្មបង្ហូរឈាមជាច្រើនកន្លែង ស្ទើរពេញផ្ទៃប្រទេស ក្នុងនោះមានមួយផ្ទុះឡើងនៅកណ្តាលក្រុងកាប៊ូល ក្នុងថ្ងៃព្រហស្បតិ៍ ប្រឆាំងនឹងមជ្ឈមណ្ឌលវប្បធម៌បារាំង ដោយអត្តឃាតជនវ័យជំទង់អាយុប្រមាណពី១៥ទៅ១៧ឆ្នាំ។
កងកម្លាំងសម្ព័ន្ធមិត្តអូតង់ ១៣០០០០នាក់ដែលប្រចាំការនៅសមរភូមិអាហ្វហ្កានីស្ថានតាំងពីឆ្នាំ២០១០មក នឹងត្រូវចាកចេញអស់ពីប្រទេសនេះ នៅចុងខែធ្នូ២០១៤។ ចាប់ពីថ្ងៃទី ១មករា ២០១៥ទៅ បេសកកម្មប្រយុទ្ធត្រូវចប់ អូតង់មានភារៈបន្តផ្នែកជំនួយការ បំពាក់បំប៉នទាហាន និងប៉ូលិស ជាហេតុធ្វើឱ្យសមរភូមិជួរមុខហាក់ទន់ខ្សោយ។ ពួកតាលីបង់ដៅការវាយប្រហារលើយោធាដើម្បីបំបាក់ទឹកចិត្តទាហានប្រចាំតំបន់។
ក្នុងក្តីសង្ឃឹមស្វែងរកស្ថិរភាពឱ្យអាហ្វហ្កានីស្ថាន ពេលអូតង់ដល់កម្លាំងប្រយុទ្ធអស់ ប្រធានាធិបតីអាហ្វហ្កានីស្ថានថ្មី បានអំពាវនាវសុំចរចាជាមួយពួកតាលីបង់។ តែមកទល់ម៉ោងនេះ តាលីបង់បានបដិសេធមិនត្រូវការនិយាយផ្ទាល់ជាមួយកាប៊ូលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ