វ៉ានូអាទូត្រូវប្រកាសដាក់ក្នុងស្ថានភាពអាសន្ន ក្រោយរងខ្យល់ព្យុះ ប៉ាម
ក្រោយរងបំផ្លាញដោយខ្យល់ព្យុះ សង្ឃរា ប៉ាម រដ្ឋាភិបាលរបស់ប្រជុំកោះវ៉ានូអាទូ បានប្រកាស នៅថ្ងៃអាទិត្យទី ១៥ មីនា ដាក់ប្រទេសស្ថិតនៅក្នុងស្ថានភាពប្រកាសអាសន្ន។ អង្គការអន្តរជាតិជាច្រើនបានឡើងពីគ្រោះមហន្តរាយធម្មជាតិ ជាប្រវត្តិសាស្រ្ត ដែលគេមិនធ្លាប់ជួបប្រទះ នៅ ប៉ែកខាងត្បូង មហាសមុទ្រ ប៉ាស៊ីហ្វិក។ នៅថ្ងៃអាទិត្យនេះដែរ ជំនួយមនុស្សធម៌របស់បរទេសបានចូលជាបន្តបន្ទាប់ ទៅដល់ ប្រជុំកោះ វ៉ានូអាទូ។
ចុះផ្សាយនៅថ្ងៃ៖
ស្តាប់ - ០១:៥១
ប្រជុំកោះ វ៉ានូអាទូ ត្រូវស្ថិតនៅក្នុងស្ថានភាពប្រកាសអាសន្ន បន្ទាប់ពីរងវាយបោកបក់ ដោយខ្យល់ព្យុះសង្ឃរា ប៉ាម កាលពីយប់ថ្ងៃសុក្រ។ ខ្យល់ព្យុះ ប៉ាម កម្រិតទី ៥ ដែលរត់ក្នុងល្បឿន ជាង ៣០០គីឡូម៉ែត្រក្នុងមួយម៉ោង បានបក់ រំលើង ខ្ទេចខ្ទីរ ផ្ទះសម្បែងរបស់ប្រជាជន។ ការិយាល័យជាតិស្តីពីគ្រោះមហន្តរាយរបស់វ៉ានូអាទូ បានបញ្ជាក់ពីចំនួនមនុស្សស្លាប់ ៦នាក់នៅទីក្រុងPort Vila ក្នុងពេលដែលមន្រ្តីរបស់អង្គការសហប្រជាជាតិបានរាប់ឃើញមានមនុស្សស្លាប់ និងបាត់ខ្លួន ជាង៤០នាក់។ តាមអង្គការOxfam វិញ ផ្ទះសម្បែង ប្រមាណ ៩០ភាគរយ នៅទីក្រុងPort Vila ត្រូវបានបំផ្លាញទាំងស្រុង។
កាលពីថ្ងៃសៅរ៍ នៅចំពោះមុខអ្នកតំណាងប្រទេសទាំង១៩០របស់អង្គការសហប្រជាជាតិ ដែលចូលរួមនៅក្នុងសន្និសីទ អន្តរជាតិ របស់អង្គការសហប្រជាជាតិ ដើម្បីកាត់បន្ថយគ្រោះមហន្តរាយធម្មជាតិ ដែលធ្វើឡើងនៅប្រទេសជប៉ុន ប្រធានាធិបតី របស់វ៉ានូអាទូបានឆ្លៀតអំពាវនាវសុំជំនួយជាបន្ទាន់សម្រាប់វ៉ានូអាទូ។ វ៉ានូអាទូ ដែលប្រជុំដោយកោះ តូចៗចំនួន ៨០ និងមានប្រជាជនរស់នៅ ប្រមាណ២៧០ ០០០នាក់ ស្ថិតក្នុងចំណោមប្រទេសប្រទេសដែលក្រីក្រ ជាងគេនៅក្នុងពិភពលោក។
នៅថ្ងៃម្សិលមិញ ប្រទេសអង់គ្លេសបានប្រកាសផ្តល់ជំនួយប្រមាណ ២លាន ៨សែនអឺរ៉ូ សម្រាប់បន្ថែមពីលើជំនួយ១លានអឺរ៉ូ របស់សហភាពអឺរ៉ុប។ អូស្ត្រាលីដែលប្រកាសផ្តល់ជំនួយ ៣លាន ៦សែនអឺរ៉ូ បានចូលរួមជាមួយនូវែលហ្សេឡង់ បញ្ជូនយន្តហោះដឹក ស្បៀងទៅកាន់ទីក្រុងPort Vilaរបស់ប្រទេសវ៉ានូអាទូ។ ចំណែកយន្តហោះរបស់បារាំងបានចេញដំណើរពីកាឡេដូនីថ្មី ដើម្បីធានាផ្នែកជួយសង្រ្គោះប្រជាជន។
ចេញពីវ៉ានូអាទូ ខ្យល់ព្យុះ ប៉ាម កាលពីថ្ងៃសៅរ៍ បានបង្កគ្រោះមហន្តរាយមួយ ទៅលើប្រជុំមួយទៀត នៅប៉ាស៊ីហ្វិក ឈ្មោះ ទូវ៉ាលូ ដែលមានប្រជាជនរស់នៅតិចជាង ១ម៉ឺននាក់។ តាមនាយករដ្ឋមន្រ្តីរបស់ប្រទេសនេះដែលបាននិយាយប្រាប់វិទ្យុនូវែលហ្សេឡង់ ពាក់កណ្តាលនៃប្រជាជនដែលរស់នៅតាមបណ្តាកោះតូចៗ កំពុងរងគ្រោះ ដោយសារខ្យល់កំណាច ប៉ាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ