អាស៊ី អាហ្រ្វិកត្រៀមរំលឹកខួប ៦០ឆ្នាំ នៃចលនាមិនចូលបក្សសម្ព័ន្ធក្រុងបានឌុង
ជំនួបកំពូលអាស៊ាន អាហ្វ្រិកបើកធ្វើ នៅថ្ងៃពុធទី ២២មេសា នៅទីក្រុងហ្សាការតា ប្រទេសឥណ្ឌូណេស៊ី។ ថ្នាក់ដឹកនាំកំពូលរបស់ប្រទេសចំនួន២១មកពី ទ្វីបអាស៊ី និងអាហ្វ្រិកបានចូលរួមនៅក្នុងជំនួបកំពូលដែលមានរយៈពេល ២ថ្ងៃ មុននឹងប្រារព្ធខួប ៦០ ឆ្នាំ នៃចលនាអព្យាក្រឹត្យ មិនចូលបក្សសម្ព័ន្ធ នៅថ្ងៃសុក្រ ទី ២៤មេសា។ កាលពី៦០ឆ្នាំមុន គឺនៅក្នុងសន្និសីទ ក្រុងបានឌុង ខែមេសា ឆ្នាំ ១៩៥៥ ដែលក្រុមប្រទេសអាស៊ី និងអាហ្វ្រិកចំនួន ២៩ បានប្រកាសបង្កើតចលនាអព្យាក្រឹត្យ មិនចូលបក្សសម្ព័ន្ធ នៅក្នុងខណៈដែលសង្រ្គាមត្រជាក់បានផ្ទុះឡើង រវាងអាមេរិក និងសហភាពសូវៀត។
ចុះផ្សាយនៅថ្ងៃ៖
ស្តាប់ - ០៦:២៣
សន្និសីទអាស៊ីអាហ្រ្វិកលើកទី១ ត្រូវបានរៀបចំធ្វើ នៅខែមេសា ឆ្នាំ ១៩៥៥ នៅ ទីក្រុងបានឌុង ក្នុងកោះចាវ៉ា ទៅតាមការផ្តួចផ្តើមគំនិតរបស់ប្រទេសឥណ្ឌូណេស៊ី ភូមា ស្រីលង្កានិងប៉ាគីស្ថាន។ សន្និសីទ ដែលកាលណោះ រៀបចំផ្តួចផ្តើមគំនិត ឡើងដោយក្រុមប្រទេសដែលទើបទទួលឯករាជ្យ ចេញពីក្រោមការត្រួតត្រារបស់អាណានិគមនិយមបរទេស។ ទិសដៅ គឺជំរុញសហប្រតិបត្តិការសេដ្ឋកិច្ច និងវប្បធម៌រវាងប្រទេសនៅអាស៊ី និងនៅអាហ្វ្រិក ហើយជាពិសេស គឺរួមគ្នាប្រយុទ្ធប្រឆាំងនឹងការត្រួតត្រារបស់ក្រុមប្រទេសអាណានិគម។ សន្និសីទបានឌុងបានជួយឲ្យប្រទេសនៅ អាស៊ី និងអាហ្រ្វិកជាច្រើន ដូចជា អាល់ហ្សេរីជាដើម បាន រំដោះខ្លួនពីក្រោមនឹមអាណានិគមនិយមបរទេស។
ស្ថិតនៅ នៅក្នុងបរិបទដែលសង្រ្គាមត្រជាក់កំពុងផ្ទុះឡើង រវាងអាមេរិក និងសហភាពសូវៀត សន្និសីទអាស៊ី និងអាហ្រ្វិក នៅ បានឌុងត្រូវបានកត់សំគាល់ ដោយការប្រកាសបង្កើតចលនាមួយដែលគេហៅថា ចលនាអព្យាក្រឹត្យ មិនចូលបក្សសម្ព័ន្ធ ដែលនៅក្នុងនោះក៏មានកម្ពុជា របស់សម្តេចនរោត្តមសីហនុចូលជាសមាជិកផងដែរ។ គោលដៅគឺ ដាក់ប្រទេសឲ្យនៅកណ្តាល មិនចូលកាន់ជើង ភាគីណាទំាងអស់ មិនថា ក្រុមប្រទេសសេរី របស់អាមេរិក ឬប្លុកកុម្មុយនិស្តរបស់សហភាពសូវៀត។ ក្រៅពីនោះ ចលនាមិនចូលបក្សសម្ព័ន្ធនៅបានជួយផងដែរឲ្យប្រទេសអាស៊ី និងនៅអាហ្វ្រិកជាច្រើនឲ្យទាមទារឯករាជ្យរួចផុតពីដែនអាណានិគមអឺរ៉ុប។
ចលនាអព្យាក្រឹត្យមិនចូលបក្សសម្ព័ន្ធបានថយចុះកេរ្តិ៍ឈ្មោះរបស់ខ្លួន ក្រោយចប់សង្រ្គាមត្រជាក់។ ប៉ុន្តែ ប្រទេសសមាជិករបស់ចលនានេះ នៅតែបន្តជួបជុំគ្នា ជារៀងរាល់ឆ្នាំ នៅក្នុងសន្និសីទអាស៊ី អាហ្រ្វិក។ ក្នុងអតីតកាល ប្រទេសនៅអាស៊ី និងអាហ្រ្វិកសហការដើម្បីជួយគ្នាឲ្យងើប រួចផុតពីនឹមអាណានិគមនិយមបរទេសមកទ្វីបអឺរ៉ុប ប៉ុន្តែ ទំនាក់ទំនងសេដ្ឋកិច្ចរវាងទ្វីបទាំងពីរមិនដែលត្រូវគេភ្លេចម្តងណាទេ។ ពីមុន ប្រទេសសមាជិករបស់ចលនាក្រុមប្រទេសមិនចូលបក្សសម្ព័ន្ធ មានធនធានតំណាងឲ្យតែ១ភាគ ៤នៃធនធានសេដ្ឋកិច្ចសរុបក្នុងពិភពលោក។ ប៉ុន្តែនៅប៉ុន្មានទសវត្សរ៍ចុងក្រោយនេះ សេដ្ឋកិច្ចរបស់អាស៊ី និងអាហ្វ្រិក តំណាងឲ្យពាក់កណ្តាលនៃសេដ្ឋកិច្ចពិភពលោកទាំងមូល។
នៅប៉ុន្មានឆ្នាំចុងក្រោយនេះ ទំហំដោះដូរពាណិជ្ជកម្មរវាងអាហ្វ្រិក និងអាស៊ី បានកើនឡើង ដល់ ២២ភាគរយ ក្នុងពេលដែលការដោះដូររបស់អឺរ៉ុបជាមួយ អាហ្វ្រិកមានតែ១៥ភាគរយប៉ុណ្ណោះ។ ចិន បាននាំមុខ ម៉ាឡេស៊ី និងឥណ្ឌា ដែលបានទៅឈរតាំងទី បោះទុនវិនិយោគច្រើន មហាសាលនៅទ្វីបអាហ្រ្វិក។ ពីទ្វីបអាហ្រ្វិក ចិនបាននាំចេញ មួយភាគ បួន នៃរ៉ែ និងប្រេងពីអាហ្រ្វិក ដើម្បី ជំរុញ ឧស្សាហកម្មក្នុងប្រទេសរបស់ខ្លួន។
នៅថ្ងៃនេះ នៅថ្ងៃបើកជំនួបកំពូល ប្រធានាធិបតីឥណ្ឌូណេស៊ី លោកហ្សូកូ វីដូដូ បានអំពាវនាវឲ្យមានការរៀបចំ ប្រព័ន្ធគ្រប់គ្រងពិភពលោកបែបថ្មី ពោល គឺ ក្រុមប្រទេសអ្នកមានត្រូវបើកផ្លូវឲ្យក្រុមប្រទេសដែលទើបមានសេដ្ឋកិច្ចទើបរីកលូតលាស់ថ្មី បានចូលរួមនៅក្នុងក្បាលម៉ាស៊ីនដឹកនាំពិភពលោកផង។
លោកប្រធានាធិបតីឥណ្ឌូណេស៊ី នៅបន្ថែមថា គំនិតដែលថា មានតែធនាគារពិភពលោក និងមូលនិធិរូបិយវត្ថុអន្តរជាតិ ឬធនាគារអភិវឌ្ឍអាស៊ី ដែលជាស្ថាប័នរបស់អាមេរិក និងអឺរ៉ុប ដែលអាចដោះស្រាយបញ្ហាសេដ្ឋកិច្ចពិភពលោក គឺគំនិតដែល”ហួសសម័យ”។
អស់មានអាណានិគមត្រួតត្រា ប៉ុន្តែ ការប្រកួតប្រជែងកើតចេញពីក្នុងរង្វង់សមាជិកគ្នាឯង
អ្នកវិភាគជាច្រើន មើលឃើញថា នៅ៦០ឆ្នាំក្រោយ ជំនួបកំពូលអាស៊ី និងអាហ្រ្វិកនឹង ក្លាយជាទីតាំង ប្រកួតប្រជែង ដណ្តើមអំណាចរៀងៗខ្លួនរបស់ប្រទេសសមាជិក។ នៅក្នុងប្រទេសសមាជិកក្រុមប្រទេសមិនចូលបក្សសម្ព័ន្ធ មានចិន ឥណ្ឌា ជប៉ុន និងប្រទេសសមាជិកអាស៊ាន។ នៅក្នុងរឿងជម្លោះដែនសមុទ្រ ដូចជាសមុទ្រចិនខាងត្បូង និងខាងកើត ចិនកំពុងទាមទារជាម្ចាស់តែម្នាក់ឯង រហូតត្រូវប្រឈមឈ្លោះជាមួយប្រទេសសមាជិកអាស៊ាន និងជប៉ុន។ នេះគេនៅមិនទាន់និយាយពីការប្រជែងគ្នា រវាងចិន និងឥណ្ឌា ដើម្បីដណ្តើមឥទ្ធិពល គ្របដណ្តប់អាស៊ី ផង។
ជាមួយនឹងទុនវិនិយោគរាប់ពាន់លានដុល្លារ ចិនចង់អូសទាញក្រុមប្រទេសអាស៊ី និងអាហ្រ្វិកផ្សេងទៀត ឲ្យមកស្ថិតនៅក្រោមឥទ្ធិពលរបស់ខ្លួន។ ប៉ុន្តែ ជាមួយគ្នានេះ ជំនួបកំពូលអាស៊ី និងអាហ្វ្រិកក៏អាចក្លាយជាកន្លែងដើម្បីបន្ធូរបន្ថយភាពតានតឹងរវាងចិន និងជប៉ុនដែរ។ នៅព្រឹកមិញនេះ នៅក្នុងសុន្ទរកថា បើកជំនួបកំពូល ដែលមានលោកប្រធានាធិបតីចិន ចូលរួមផងដែរនោះ នាយករដ្ឋមន្រ្តីជប៉ុន លោកស្ហ៊ីនហ្សូ អាបេ បានថ្លែងពីការសោកស្តាយរបស់លោក ដែលជប៉ុនបានចូលឈ្លានពានប្រទេសដទៃទៀតនៅក្នុងសង្រ្គាមលោកលើកទីពីរ។ ភាពតានតឹងចិន ជប៉ុននឹងអាចថយមួយកម្រិតព្រោះបើតាម មន្រ្តីរដ្ឋាភិបាលជប៉ុន នាយករដ្ឋមន្រ្តីជប៉ុននឹងជួបលោកប្រធានាធិបតីចិន នៅក្រៅ ក្របខ័ណ្ឌ ជំនួបកំពូលនៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ