តួលេខដ៏គួរឲ្យបារម្ភជុំវិញស្ថានភាពសេដ្ឋកិច្ចចិន
នៅថ្ងៃអង្គារនេះ អាជ្ញាធរចិនបានឲ្យដឹងថា វិស័យនាំចេញនាំចូលរបស់ចិននៅតែបន្តធ្លាក់ចុះ នៅក្នុងខែសីហាកន្លងទៅនេះ។ តួលេខស្តីពីការធ្លាក់ចុះក្នុងវិស័យពាណិជ្ជកម្មក្រៅប្រទេសនេះ មកបន្ថែមពីលើតួលេខចេញផ្សាយកាលពីថ្ងៃចន្ទម្សិលមិញ ដែលបង្ហាញថា អត្រាកំណើនសេដ្ឋកិច្ចរបស់ចិន កាលពីឆ្នាំ២០១៤កន្លងទៅនេះ មានកម្រិតទាបជាងអ្វីដែលរដ្ឋាភិបាលចិនបានប្រកាស កាលពីពេលកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
យោងតាមតួលេខចេញផ្សាយដោយអាជ្ញាធរចិន នៅថ្ងៃអង្គារនេះ វិស័យនាំចូលរបស់ចិន នៅក្នុងខែសីហាកន្លងទៅមានការធ្លាក់ចុះ ១៣,៨% (បើគិតជាដុល្លារអាមេរិក) ចំណែកឯវិស័យនាំចេញវិញធ្លាក់ចុះ ៥,៥%។ ការធ្លាក់ចុះនេះថ្វីដ្បិតតែមានកម្រិតទាបជាងកាលពីខែកក្កដាកន្លងទៅ ក៏ប៉ុន្តែ វាជាការធ្លាក់ចុះក្នុងរយៈពេលជាច្រើនខែជាប់ៗគ្នាគួរឲ្យព្រួយបារម្ភ ហើយអ្នកវិភាគជាច្រើនគិតថា គោលដៅបង្កើនវិស័យពាណិជ្ជកម្មឲ្យបាន ៦% នៅចុងឆ្នាំ២០១៥ ដែលដាក់ចេញដោយរដ្ឋាភិបាលក្រុងប៉េកាំង ទំនងជាពិបាកនឹងអាចសម្រេចទៅបាន។
គួរបញ្ជាក់ថា កាលពីថ្ងៃចន្ទម្សិលមិញនេះ រដ្ឋាភិបាលចិនទើបនឹងបានចេញផ្សាយតួលេខដ៏គួរឲ្យព្រួយបារម្ភមួយទៀត ដែលបង្ហាញថា អត្រាកំណើនសេដ្ឋកិច្ចចិនកាលពីឆ្នាំ២០១៤ មានត្រឹមតែ ៧,៣%ប៉ុណ្ណោះ ពោលគឺទាបជាងអត្រាដែលរដ្ឋាភិបាលបានប្រកាសឲ្យដឹង កាលពីខែមករា។
តួលេខអវិជ្ជមានជាប់ៗគ្នានេះកំពុងតែបង្កឲ្យមានក្តីបារម្ភជាទូទៅ ខ្លាចការធ្លាក់ចុះនៃស្ថានភាពសេដ្ឋកិច្ចចិននេះ ប៉ះពាល់ទៅដល់សេដ្ឋកិច្ចពិភពលោកទាំងមូល។
ជាការពិតថា អត្រាកំណើនសេដ្ឋកិច្ចរបស់ចិន ថ្វីដ្បិតតែធ្លាក់ចុះ ប៉ុន្តែ នៅតែមានកម្រិតខ្ពស់ជាងបណ្តាប្រទេសភាគច្រើនផ្សេងទៀត។ ចំណែកឯការធ្លាក់ចុះក្នុងវិស័យនាំចេញនាំចូលវិញ ក៏មិនមែនកើតមានតែចំពោះចិនមួយនោះដែរ បណ្តាប្រទេសជាច្រើនផ្សេងទៀតក៏កំពុងតែប្រឈមមុខនឹងបញ្ហាដូចគ្នានេះដែរ។ ក៏ប៉ុន្តែ អ្វីដែលខុសគ្នា គឺនៅត្រង់ថា ចិនគឺជាមហាអំណាចសេដ្ឋកិច្ច ដែលជាកម្លាំងចលករដ៏ធំជាងគេ នៅក្នុងការជំរុញកំណើនសេដ្ឋកិច្ចរបស់ពិភពលោកទាំងមូល។ ដូច្នេះ បញ្ហាសេដ្ឋកិច្ចចិន តិចឬច្រើន គឺអាចនឹងបង្កផលប៉ះពាល់ដល់សេដ្ឋកិច្ចពិភពលោកទាំងមូល។
ហេតុដូច្នេះហើយបានជាគេសង្កេតឃើញថា តួលេខអវិជ្ជមាននៃសេដ្ឋកិច្ចចិនកំពុងតែធ្វើឲ្យទីផ្សារមូលបត្រនៅស្ទើរតែគ្រប់កន្លែងនៅទូទាំងពិភពលោកត្រូវរង្គោះរង្គើ ប្រឈមមុខនឹងអស្ថិរភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ