ចិនដាក់កម្រិតលើការដកសាច់ប្រាក់នៅ បរទេស
ប្រជាជនចិន ដែលធ្វើដំណើរទៅបរទេស នឹងលែងអាចដកប្រាក់របស់ខ្លួន តាមចិត្តចង់ដូចមុន។ យោងតាមកាសែតក្នុងស្រុកចិន ចុះផ្សាយ នៅថ្ងៃ អង្គារ រដ្ឋអំណាចចិននឹងកំណត់ចំនួនសាច់ប្រាក់ ដែលប្រជាជនចិន អាចដកបាន នៅបរទេស។ វិធានការរបស់រដ្ឋអំណាចចិននឹងចូលជាធរមាន ចាប់ពីឆ្នាំ ២០១៦។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
រដ្ឋអំណាចចិន ចង់ដាក់កម្រិត ចាយវាយរបស់ប្រជាជនខ្លួន នៅបរទេស។ យោងតាមវិទ្យុជាតិចិន China UnionPay ឬ Mastercard របស់ចិន នឹងកម្រិតចំនួនសាច់ប្រាក់ដែលអតិថិជនចិនចង់ដកនៅបរទេស។ បច្ចុប្បន្ន អតិថិជន ដែលកាន់កាត China UnionPayអាចដកលុយ ១ម៉ឺនយ័ន ក្នុងមួយថ្ងៃ គឺស្មើនឹង១៤០០ដុល្លារ។ ប៉ុន្តែ ចាប់ពីឆ្នាំ ២០១៦ អថិជននឹងអាចដកលុយរបស់ខ្លួន បានត្រឹមតែ ១សែន យ័ន គឺស្មើនឹង១៤០០០ដុល្លារ ប៉ុណ្ណោះ ក្នុងមួយឆ្នាំ។ តាមស្ថាប័នUnionPay ដែលប្រមូលផ្តុំធនាគារចិនជាង ១៧០ នៅប្រទេសចិន ការបន្ថយកម្រិតសាច់ប្រាក់ដកចេញពីទូរលុយនៅបរទេស ធ្វើឡើង ក្នុងទិសដៅ ប្រយុទ្ធប្រឆាំងនឹងការលាងលុយ និងកាត់បន្ថយហានិភ័យហិរញ្ញវត្ថុ។
វិធានការរបស់រដ្ឋអំណាចចិន ដែលចង់ដាក់ កម្រិត ចាយវាយរបស់ប្រជាជនចិន នៅបរទេស មិនមែនធ្វើឡើងដោយចៃដន្យ។ អាជ្ញាធរចិនរឹតត្បិតមិនចង់ឲ្យប្រជាជន ដកសាច់ប្រាក់ច្រើន នៅបរទេស ព្រោះថា អ្នកជំនាញបានកត់សំគាល់ឃើញមានលំហូរសាច់ប្រាក់ចេញទៅក្រៅប្រទេស កាន់តែច្រើន ពោល គឺ ចាប់តាំង ពីធនាគារកណ្តាលចិន ទម្លាក់តម្លៃ លុយយ័ន ដើម្បីជំរុញការនាំចេញ។ នៅក្នុងខែសីហាតែមួយ តម្លៃលុយយ័នបានធ្លាក់ចុះ អស់ ៥ភាគរយ។ ម្យ៉ាងទៀត និន្នាការបញ្ចេញសាច់ប្រាក់ ទៅដាក់នៅបរទេស កើតឡើង ដោយសារតែគេភ័យបារម្ភនឹងសេដ្ឋកិច្ចចិន ដែលកំពុងនៅទ្រឹង ឬដើរថយ ចាប់តាំងពីមានផ្ទុះ វិបត្តិធ្លាក់ថ្លៃ ភាគហ៊ុន ចិន កាលពីខែសីហា។
រដ្ឋាភិបាលចិនបានរឹតបន្តឹងវិធានការលើចលនាសាច់ប្រាក់នេះម្តងហើយ កាលពីដើមខែកញ្ញា។ រដ្ឋបាលរដ្ឋចិន ដែលគ្រប់គ្រងលើទីផ្សារប្តូរប្រាក់ ធ្លាប់បានសុំទៅស្ថាប័នហិរញ្ញវត្ថុ នៅសៀងហៃ និងនៅកង់តុង តាមដាន ត្រួតពិនិត្យ លើរាល់ការប្តូរ និងលក់រូបិយប័ណ្ណបរទេស។ ទីក្រុងប៉េកាំងបានសម្រេច ដោយតក់ក្រហល់ ទម្លាក់តម្លៃលុយយ័ន ដើម្បីជំរុញការនាំចេញ។ ប៉ុន្តែផ្ទុយទៅវិញ យោងតាមតួលេខផ្លូវការ វិធានការនេះបានធ្វើឲ្យ រដ្ឋចិនខាតបង់លុយប្រមាណ ៩៣ពាន់លានដុល្លារ ពោលគឺបន្ទាប់ពីស្ថាប័នរដ្ឋរបស់ប្រទេសចិនចាប់បញ្ចេញលក់លុយដុល្លារ យ៉ាងច្រើន ដើម្បីយកទៅជួយទប់ការខូចខាត ដោយសារការធ្លាក់តម្លៃលុយយ័ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ