ជប៉ុននិងហ្វីលីពីនបើកធ្វើសមយុទ្ធទ័ពជើងទឹករួមគ្នាក្នុងពេលកំពុងមានភាពតានតឹងជាមួយចិន
កងទ័ពជើងទឹករបស់ជប៉ុន និងហ្វីលីពីន បើកចាប់បើកធ្វើសមយុទ្ធរួមគ្នា នៅថ្ងៃអង្គារនេះ នៅក្នុងសមុទ្រចិនខាងត្បូង ដែលជាចំណុចក្តៅនៃជម្លោះជាមួយចិន។ សមយុទ្ធជាប្រវត្តិសាស្រ្តនេះ គឺជាការបង្ហាញឲ្យឃើញពីការរឹតចំណងសម្ព័ន្ធភាពយោធា រវាងប្រទេសទាំងពីរ នៅក្នុងពេលដែលពួកគេកំពុងតែប្រឈមមុខនឹងចិន នៅក្នុងជម្លោះដែនសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
សមយុទ្ធទ័ពជើងទឹកជប៉ុន-ហ្វីលីពីន នៅថ្ងៃអង្គារនេះ អាចត្រូវចាត់ទុកជាហេតុការណ៍ប្រវត្តិសាស្រ្ត ពីព្រោះថា នេះជាលើកទី១ ដែលប្រទេសទាំងពីរបើកធ្វើសមយុទ្ធទ័ពជើងទឹករួមគ្នា ចាប់តាំងពីក្រោយសង្រ្គាមលោកលើកទី២។ កាលពីដើមខែឧសភាកន្លងទៅនេះ ជប៉ុន និងហ្វីលីពីន ធ្លាប់បានបើកធ្វើសមយុទ្ធរួមគ្នាម្តងរួចមកហើយ ក៏ប៉ុន្តែ ជាសមយុទ្ធឆ្មាំល្បាតដែនសមុទ្រតែប៉ុណ្ណោះ មិនមែនជាសមយុទ្ធហាត់សមពីការធ្វើសង្រ្គាម ដូចជាពេលនេះទេ។
សមយុទ្ធដែលមានរយៈពេលមួយថ្ងៃ នៅថ្ងៃអង្គារនេះ មានការចូលរួមពីសំណាក់នាវាពិឃាដពីរគ្រឿងរបស់ជប៉ុន និងនាវាចម្បាំងមួយគ្រឿងរបស់ហ្វីលីពីន។ ចំណែកឯទីតាំងនៃសមយុទ្ធ គឺស្ថិតនៅចម្ងាយប្រមាណជាជិត ៣០០គីឡូម៉ែត្រ ពីតំបន់ជាប់ជម្លោះ រវាងចិន និងហ្វីលីពីន នៅក្នុងសមុទ្រចិនខាងត្បូង។
រដ្ឋាភិបាលហ្វីលីពីនបានអះអាងថា សមយុទ្ធទ្វេភាគីជាមួយជប៉ុននេះធ្វើឡើង គ្រាន់តែដើម្បីពង្រឹងសមត្ថភាពយោធារបស់ប្រទេសទាំងពីរតែប៉ុណ្ណោះ ដោយមិនសំដៅប្រឆាំងនឹងប្រទេសណាមួយនោះទេ។ ក៏ប៉ុន្តែ អ្នកជំនាញខាងវិស័យការពារជាតិជាច្រើនសុទ្ធតែយល់ថា គោលដៅពិតប្រាកដនៃសមយុទ្ធនេះ គឺហ្វីលីពីន និងជប៉ុនចង់បង្ហាញឲ្យចិនឃើញពីភាពប្តូរផ្តាច់របស់ខ្លួន ក្នុងការស្រាក់កម្លាំងគ្នាទប់ទល់នឹងមហិច្ឆតាយោធារបស់ចិន នៅក្នុងតំបន់។
គួររំឭកឡើងវិញថា ហ្វីលីពីន គឺជាប្រទេសមួយក្នុងចំណោមប្រទេសទាំង ៤ ក្នុងអាស៊ាន ដែលកំពុងជាប់ជម្លោះជាមួយចិន ក្នុងសមុទ្រចិនខាងត្បូង ដែលជាតំបន់ជាយុទ្ធសាស្រ្តមួយ សម្រាប់វិស័យដឹកជញ្ជួនតាមផ្លូវសមុទ្រជាអន្តរជាតិ និងជាតំបន់ដែលសម្បូរទៅដោយធនធានធម្មជាតិ ជាពិសេស គឺធនធានប្រេង និងឧស្ម័ន។ ចំណែកឯជប៉ុនវិញក៏កំពុងតែមានជម្លោះជាមួយចិនដែរ គឺជម្លោះដណ្តើមប្រជុំកោះ នៅក្នុងសមុទ្រចិនខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ