ម៉ាឡេស៊ីចាប់ខ្លួនជនសង្ស័យ បង្កអំពើភេរវកម្ម
មនុស្ស១៧នាក់ត្រូវបានប៉ូលិសម៉ាឡេស៊ី ចាប់ខ្លួន កាលពីថ្ងៃអាទិត្យ ពីបទមានគម្រោង ចង់បង្កអំពើភេរវកម្ម ក្នុងរដ្ឋធានី គូឡាឡាំពួរ។ នេះបើតាមការអះអាងរបស់មេប៉ូលិសជាតិម៉ាឡេស៊ី។ នៅប៉ុន្មានឆ្នាំចុងក្រោយនេះ ម៉ាឡេស៊ី ដែលមានអ្នកកាន់សាសនា អ៊ីស្លាម មិនជ្រុលនិយម កំពុងប្រឈមនឹងចលនាជ្រុលនិយមរបស់ពួកសកម្មជនអ៊ីស្លាម ដែលបានភ្ជាប់ខ្លួនទៅនឹងក្រុមជីហាត នៃអង្គការរដ្ឋអ៊ីស្លាម ក្នុងប្រទេសស៊ីរី និងអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ក្នុងចំណោមមនុស្សទាំង ១៧នាក់ ដែលប៉ូលិសម៉ាឡេស៊ីបានចាប់ខ្លួន មាន២នាក់ ទើបត្រលប់មកពីប្រទេសស៊ីរី កាលពីពេលថ្មីៗ។ យោងតាមមេប៉ូលិសម៉ាឡេស៊ី ជនសង្ស័យបានរៀបចំគម្រោងធ្វើសកម្មភាពភេរវកម្មនៅ គូឡា ឡាំពួរ។
នៅក្នុងប្រទេសដែលមានប្រពៃណី គោរពសាសនាអ៊ីស្លាម អាជ្ញាធរ ម៉ាឡេស៊ីតាមដានជាប់ជានិច្ចលើក្រុមជ្រុលនិយមអ៊ីស្លាម។ កាលពីខែមករា ដើមឆ្នាំនេះ ប៉ូលិសម៉ាឡេស៊ីបានចាប់ខ្លួន មនុស្ស ១២០នាក់ ដែលមួយចំនួន ត្រូវជាប់សង្ស័យថា មានទំនោរ គាំទ្រមនោគមវិជ្ជារបស់ពួកជីហាត ឬខ្លះទៀត ទើបត្រលប់មកពីប្រទេស ស៊ីរី។ រដ្ឋាភិបាលម៉ាឡេស៊ីធ្លាប់បានព្រមានរួចហើយ ពីគ្រោះថ្នាក់របស់ក្រុមអ៊ីស្លាមដែលទើបត្រលប់ពីប្រយុទ្ធក្នុងប្រទេសស៊ីរី ដើម្បីបុព្វហេតុក្រុមជីហាត។ នៅខែសីហាឆ្នាំមុន ប៉ូលិសម៉ាឡេស៊ីបានទប់ស្កាត់ទាន់ ផែនការធ្វើភេរវកម្ម របស់ក្រុមអ៊ីស្លាមទៅលើរង្គសាល និងក្រុមហ៊ុនផលិតស្រាបៀរដ៏ធំមួយ (Carlsberg)។ គឺចាប់ពីពេលនោះហើយ ដែលប៉ូលិស បានស្រាវចាប់ រកឃើញមានក្រុមនិយមពួកជីហាត នៅក្នុងប្រទេសម៉ាឡេស៊ី។
ប៉ូលិសម៉ាឡេស៊ី ដឹងថា រហូតមកដល់ថ្ងៃនេះ មានជនជាតិម៉ាឡេស៊ី ៦៧នាក់ ដែលបានចេញទៅប្រយុទ្ធកៀកស្មា ជាមួយក្រុមជីហាត នៅស៊ីរី។ ហើយ៥នាក់បានស្លាប់ នៅក្នុងសមរភូមិ។ នៅអាស៊ី ម៉ាឡេស៊ី ជាប្រទេសអ៊ីស្លាមទី២ បន្ទាប់ពីឥណ្ឌូណេស៊ី ដែលត្រូវប្រឈមនឹងការរីកធំឡើង នៃចលនាអ៊ីស្លាម ជ្រុលនិយម ដែលភ្ជាប់ខ្លួនទៅនឹងក្រុមជីហាត។
កាលពីសប្តាហ៍មុន នៅក្នុងគោលដៅ ប្រយុទ្ធប្រឆាំងនឹងអំពើភេរវកម្ម រដ្ឋាភិបាលម៉ាឡេស៊ី ទើបបានស្នើច្បាប់ថ្មី ស្តីពីភេរវកម្ម ទៅឲ្យសភា បោះឆ្នោត អនុម័ត។ ច្បាប់ថ្មី នឹងអនុញ្ញាតឲ្យអាជ្ញាធរម៉ាឡេស៊ី ចាប់ឃុំខ្លួនជនសង្ស័យពីបទធ្វើភេរវកម្ម ក្នុងអំឡុងពេលមួយមិនកំណត់ និងមិនចាំបាច់មានសវនាការជំនុំជម្រះ។
អង្គការការពារសិទ្ធិមនុស្ស ដូចជាHuman rights Watchបានទាមទារឲ្យរដ្ឋាភិបាលម៉ាឡេស៊ី ដកសេចក្តីស្នើច្បាប់ពីសភា មកវិញ ព្រោះថាសេចក្តីព្រាងច្បាប់មានលក្ខណៈតឹងតែងជ្រុលហួសហេតុ។ ច្បាប់ស្តីពីសន្តិសុខក្នុងស្រុក ឧស្សាហ៍បង្កភាពចម្រូងចម្រាស នៅក្នុងសង្គមម៉ាឡេស៊ី ជាទីដែលរដ្ឋាភិបាលបានយកលេសអនុវត្តច្បាប់រក្សាសន្តិសុខ ក្នុងស្រុក ដើម្បីបង្រ្កាបគណបក្សប្រឆាំង។ កាលពីឆ្នាំ ២០១២ ច្បាប់សន្តិសុខផ្ទៃក្នុង ដែលរដ្ឋាភិបាលតែងប្រើសម្រាប់ប្រឆាំងនឹងក្រុមគណបក្សប្រឆាំង ត្រូវបានលុបចោល បន្ទាប់ពីមានបាតុកម្មតវ៉ា ដាក់គំនាបពីសាធារណជនឲ្យធ្វើកំណែទម្រង់ នយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ