ភរិយានាយករដ្ឋមន្ត្រីម៉ាឡេស៊ីត្រូវរងការរិះគន់ពីមតិសាធារណៈលើការចំណាយខ្ជះខ្ជាយរបស់គាត់
ភរិយារបស់លោក Najib Razak នាយករដ្ឋមន្រ្តីម៉ាឡេស៊ី គឺជាបុគ្គលម្នាក់ ប្រកបដោយភាពចម្រូងចម្រាសច្រើននៅក្នុងប្រទេស ដោយលោកស្រីត្រូវបានមតិសាធារណៈរិះគន់ជាញឹកញាប់ថា ជាអ្នកចាយលុយខ្ជះខ្ជាយមិនចេះគិត។ កាលពីប៉ុន្មានថ្ងៃចុងក្រោយនេះ ចលនារិះគន់បានចាប់ផ្ទុះឡើងកាន់តែខ្លាំង ជាពិសេស នៅតាមបណ្តាញសង្គម ក្រោយពីគេដឹងថា លោកស្រីចំណាយលុយរហូតដល់ទៅប្រមាណជិត ៣០០អឺរ៉ូ គ្រាន់តែសម្រាប់ធ្វើសក់ម្តងៗ ដែលជាចំនួនទឹកប្រាក់មួយច្រើនជាងប្រាក់ខែប្រជាជនសាមញ្ញធម្មតាមួយខែទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
ការរិះគន់របស់មតិសាធារណៈ បានចាប់ផ្តើមមានសាជាថ្មីទៀតទៅលើភរិយារបស់នាយករដ្ឋមន្ត្រីម៉ាឡេស៊ីដោយបានវិនិច្ឆ័យថា គាត់ជាបុគ្គលមួយរូបដែលឥតយល់ដឹងអ្វីទាំងអស់ពីកំរិតជីវភាពជាក់ស្តែងរបស់ប្រជាជនម៉ាឡេស៊ីបច្ចុប្បន្ន ដែលជាញឹកញាប់ មានការលំបាកក្នុងជីវភាពរស់នៅ។ កាលពីថ្ងៃចន្ទម្សិលមិញ ភរិយារបស់នាយករដ្ឋមន្ត្រី បានត្អូញត្អែរជាសាធារណៈ ថា « គាត់ត្រូវបង់ប្រាក់អស់ ១២០០ ringgits ឬ ស្មើនឹង ២៩០អឺរ៉ូសំរាប់ជួលអ្នកធ្វើសក់មកដល់ផ្ទះ និងចំណាយលុយផ្សេងទៀតសំរាប់ការកាត់សំលៀកបំពាក់របស់គាត់។
ប្រព័ន្ធព័តមានអ៊ីនធ័រណែត Malaisie មួយឈ្មោះ Insider បានដកស្រង់សម្តីភរិយានាយករដ្ឋមន្ត្រីម៉ាឡេស៊ីដែលបានពោលពាក្យថា « យើងត្រូវតែពាក់សម្លៀកបំពាក់ល្អៗនៅក្នុងក្របខ័ណ្ឌនៃមុខតំណែងរបស់យើង ប៉ុន្តែតម្លៃវាថ្លៃហួសហេតុពេក"។ ចំពោះស្រ្តីដែលនៅផ្ទះ និងគ្មានប្រាក់ចំណូលដូចជាពួកយើង ការចាយវាយច្រើនបែបនេះពុំអាចធ្វើទៅកើតទេ»។
គួររំលឹកថាប្រាក់ខែអប្បបរមានៅម៉ាឡេស៊ី មានចំនួនតែ៩០០ ringgits តែប៉ុណ្ណោះ ។គ្រួសារក្រីក្រខ្លះត្រូវត្រដ រស់នៅជាមួយប្រាក់ចំណូលស្មើនឹងថ្លៃធ្វើសក់របស់ភរិយានាយករដ្ឋមន្ត្រី។ នៅថ្ងៃអង្គារនេះទៀត ក្រុមអ្នកប្រើអ៊ីនធ័រណែត នៅក្នុងប្រទេស បាននាំគ្នាសើចចំអកឲ្យភរិយានាយករដ្ឋមន្ត្រីដោយសរសេរ “ តើលោកស្រីរស់នៅក្នុងពិភពអ្វីទៅ?” ។ អ្នកប្រើប្រាស់ប្រព័ន្ធ Twitter ម្នាក់ទៀត បានដាក់ផ្លែផ្កាឲ្យថា “ ខ្ញុំសង្ឃឹមថា ក្នុងថ្ងៃណាមួយខ្ញុំនឹងបានក្លាយខ្លួនដូចជាលោកស្រី Rosmahដែរ ដែលជាស្ត្រីមេផ្ទះក្រីក្រម្នាក់ និងជាភរិយាមន្ត្រីជាន់ខ្ពស់ម៉ាឡេស៊ី »។
ចាប់តាំងពីស្វាមីរបស់លោកស្រីឡើងកាន់តំណែងជានាយករដ្ឋមន្ត្រីម៉ាឡេស៊ី នៅឆ្នាំ២០០៩ មក លោកស្រី Rosmah បានក្លាយជាផ្ទាំងស៊ីបនៃការវាយប្រហាររិះគន់ទិតៀនជារឿយៗពី សំណាក់មជ្ឈដ្ឋានសាព័ត៌មានដែរ នៅលើការចំណាយទិញដូររបស់គាត់នៅឯបរទេស។
ឧទាហរណ៍ កាសែតអាមេរិក New York Times នាពេលថ្មីៗនេះបានជូនដំណឹងថា “ក្រុមអ្នកជិតដិតលោកនាយករដ្ឋមន្ត្រីម៉ាឡេស៊ី បានធ្វើវិនិយោគទុនជាច្រើននៅក្នុងវិស័យអចលនទ្រព្យដ៏ឆើតឆើយ នៅសហរដ្ឋអាមេរិក”។ New York Times ថែមទាំងបានអះអាងទៀតថា »ខ្លួនមានភ័ស្តុតាង វិក័យប័ត្រដែលបញ្ជាក់ថា លោកស្រីភរិយារបស់នាយករដ្ឋមន្ត្រីម៉ាឡេស៊ី បានទិញគ្រឿងអលង្ការដែលមានតម្លៃ ជាច្រើនលានដុល្លារ។
ពាក់ព័ន្ធនឹងព័ត៌មានខាងលើនេះ ការិយាល័យរបស់នាយករដ្ឋមន្ត្រីម៉ាឡេស៊ី បានបដិសេធ មិនធ្វើអត្ថាធិប្បាយអ្វីទាំងអស់ដោយអះអាងថា « ជាព័ត៌មានបំផ្លើស និងគ្មានមូលដា្ឋន នៅជុំវិញបញ្ហាហិរញ្ញវត្ថុ និងការចំណាយជាឯកជនរបស់នាយករដ្ឋមន្ត្រី និងគ្រួសាររបស់គាត់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ