ភូមាបំផ្ទុះគ្រាប់បែកសម្លាប់ជនជាតិចិន៤នាក់នៅខេត្តយូណាន
យន្តហោះ១គ្រឿងរបស់ភូមា បានហោះទៅទំលាក់គ្រាប់បែក បណ្តាលឲ្យស្លាប់ជនជាតិចិន៤នាក់ នៅក្នុងខេត្តយូណាន ជាប់ព្រំដែនភាគខាងជើងរបស់ភូមា។ បញ្ហានេះ បានបង្កឲ្យមានប្រតិកម្មភ្លាមៗ ពីរដ្ឋាភិបាលចិន ដែលព្រួយបារម្ភពីបូរណភាពដែនដីរបស់ខ្លួន។ តំបន់ភាគខាងជើងភូមា ដែលជាប់នឹងខេត្តយូណាន ជាសមរភូមិក្តៅ រវាងកងទ័ពរដ្ឋាភិបាលភូមា និងក្រុមឧទ្ទាមផ្តាច់ទឹកដី។ ចិនខ្លាចថា ភូមាឆ្លៀតឱកាសនេះ លួចឆ្លងចូលមកក្នុងទឹកដី ខេត្តយូណាន ហើយនាំអសន្តិសុខ មកក្នុងទឹកដីរបស់ខ្លួន ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
យោងតាមការរាយការណ៍ របស់ទីភ្នាក់ងារព័ត៌មានផ្លូវការរបស់ចិន បានឲ្យដឹងថា មានយន្តហោះមួយគ្រឿងដែលតាមការស្មាន ជាយន្តហោះយោធារបស់ភូមា បានហោះមកទម្លាក់គ្រាប់បែកមួយគ្រាប់ ក្នុងចំការអំពៅមួយ ដែលមានភូមិសាស្ត្រ ក្នុងខេត្តយូណានប្រទេសចិន។ គ្រាប់បែកបានផ្ទុះសម្លាប់ជីវិតមនុស្សជនជាតិចិន ចំនួន៤នាក់ និង៩នាក់ផ្សេងទៀតរងរបួស។
បន្ទាប់ពីបានទទួលដំណឹងនេះលោក អនុរដ្ឋមន្រ្តីក្រសួងការបរទេសចិន លីវ ចិនមិញ បានកោះហៅឯកអគ្គរដ្ឋទូតភូមាប្រចាំក្រុងប៉េកាំង ឲ្យចូលជួបទាំងកណ្តាលយប់ ដើម្បីទទួលបានការពន្យល់ អំពីហេតុការណ៍ដែលបានកើតឡើង។ ចិនបានសម្តែងនូវកំហឹងជាខ្លាំង ចំពោះហេតុការណ៍នេះ ហើយសំណូមពរឲ្យអាជ្ញាធរភូមា ធ្វើការស៊ើបអង្កេតឲ្យបានត្រឹមត្រូវ ដើម្បីចាប់យកក្រុមជនដៃដល់ ដែលបានទំលាក់គ្រាប់បែក។
ភ្លាមៗក្រោយហេតុការណ៍នេះដែរ ចិនបានបញ្ជូន យន្តហោះចម្បាំង និងយន្តហោះស៊ើបការណ៍ ឲ្យបើកក្រវែល នៅតាមតំបន់ព្រំដែន ក្នុងទឹកដីខេត្តយូណាន ដែលជាប់នឹងភាគខាងជើងប្រទេសភូមា។ អ្នកនាំពាក្យយោធាចិនម្នាក់ បានប្រាប់ឲ្យដឹងថា កងទ័ពអាកាសចិន បានត្រៀមខ្លួនរួចជាស្រេច ក្នុងការការពារអធិបតេយ្យភាពរបស់ចិន និងទប់ទល់ជាមួយភូមា បើសិនជាមាន ការវាយប្រហារសាជាថ្មី។
សូមបញ្ជាក់ផងដែរថា តំបន់ភាគខាងជើងភូមា ដែលជាប់នឹងខេត្តយូណានរបស់ចិន ជាតំបន់ព្រៃភ្នំ ហើយជាសមរភូមិក្តៅ ដែលមានការប្រឈមមុខដាក់គ្នា ជាអចិន្ត្រៃយ៍ រវាងកងទ័ពរដ្ឋាភិបាលភូមា និងក្រុមឧទ្ទាម ផ្តាច់ទឹកដី ក្នុងខេត្តពីររបស់ភូមា គឺខេត្តកាឈីន និងខេត្តហ្សាន។ ដោយសារតែភ័យខ្លាច ពីសុវត្ថិភាព និងអាយុជីវិត ប្រជាជនស្លូតត្រង់ភូមា ប្រមាណជា ៣ម៉ឺននាក់ បានរត់ចូលទៅជ្រកកោន ក្នុងខេត្តយូណានរបស់ចិន ដែលបញ្ហានេះ បានធ្វើឲ្យរដ្ឋាភិបាលចិនមានការព្រួយបារម្ភ។ ចិនក៏បារម្ភផងដែរថា ក្រុមឧទ្ទាមភូមា អាចនឹងរត់ចូលមកសម្ងំលាក់ខ្លួន ក្នុងខេត្តយូណាន ហើយការបាញ់ប្រហារគ្នា អាចនឹងឆ្លងចូលមកក្នុងទឹកដីចិន។ ជាក់ស្តែង កាលពីប៉ុន្មានថ្ងៃមុននេះ លោករដ្ឋមន្ត្រីការបរទេសចិន បានប្រាប់ឲ្យដឹងថា ផ្ទះប្រជាជនចិននៅតាមព្រំដែន បានរងការខូចខាត ដោយសារគ្រាប់កាំភ្លើង បាញ់ចេញពីរថក្រោះរបស់ភូមា នៅត្រើយម្ខាងព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ