នៅកិច្ចប្រជុំអាស៊ាន ហ្វីលីពីនបរិហារសំណង់កោះសិប្បនិម្មិតរបស់ចិន នៅសមុទ្រចិនខាងត្បូង
ហ្វីលីពីន កាលពីថ្ងៃអាទិត្យ ទី ២៦មេសា បានព្រមាន និងក្រើនរំលឹកប្រាប់ទៅប្រទេសសមាជិកអាស៊ានដទៃទៀត ថា ប្រទេសចិនកំពុងត្រៀមខ្លួនចូលគ្រប់គ្រងសមុទ្រចិនខាងត្បូង។ នៅថ្ងៃបើក ជំនួបកំពូលអាស៊ាន នៅថ្ងៃអាទិត្យទី ២៦មេសា នៅទីក្រុងគួឡាឡាំពួរ របស់ប្រទេសម៉ាឡេស៊ី ទីក្រុងម៉ានីលបានអំពាវនាវឲ្យអាស៊ានហ៊ានងើបឈរឡើង ដើម្បីតទល់នឹងចិន នៅក្នុងជម្លោះដណ្តើមដីកោះ នៅក្នុងសមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងជំនួបកំពូលអាស៊ាន ដែលចាប់ផ្តើមនៅថ្ងៃនេះ នៅទីក្រុងគួឡាឡាំពួរ ជម្លោះនៅ សមុទ្រចិនខាងត្បូង ជាប្រធានបទសំខាន់មួយ នៅក្នុងកិច្ចពិភាក្សារបស់ថ្នាក់ដឹកនាំកំពូល អាស៊ាន។ ហ្វីលីពីន វៀតណាម ម៉ាឡេស៊ី និងព្រុយណេជាសមាជិកអាស៊ាន ដែលជាប់ឈ្មោះ ក្នុងជម្លោះដណ្តើមដីកោះ ជាមួយប្រទេសចិន នៅសមុទ្រចិនខាងត្បូង។
នៅថ្ងៃបើកដំបូងជំនួបកំពូលអាស៊ាន រដ្ឋមន្រ្តីការបរទេស ហ្វីលីពីនមិនបានរង់ចាំយូរដើម្បីចោទប្រទេសចិន ដែលតាមហ្វីលីពីន កំពុងលួចធ្វើសកម្មភាព ដើម្បីបោះទីតាំងរឹងមាំ សម្រាប់ចូលគ្រប់គ្រងសមុទ្រចិនខាងត្បូងតែម្នាក់ឯង។ តាំងពីដើមខែមេសា មក ទីក្រុងម៉ានីលបានទាញសញ្ញាអាសន្ន បន្ទាប់ពីរូបភាពផ្កាយរណបបានបង្ហាញថា ចិនកំពុងចាក់ខ្សាច់ លើផ្កាថ្ម ដើម្បី បង្កើតកូនកោះសិប្បនិម្មិត នៅក្នុងដែនទឹករបស់ហ្វីលីពីន នៅប្រជុំកោះ Spratleys។ តាមហ្វីលីពីន ដីកោះសិប្បនិម្មិតដែលចិនកំពុងសាងសង់ មានទំហំធំ ដែលអាចទទួលយន្តហោះឲ្យចុះចត ឬបង្កើតមូលដ្ឋានទ័ពជាដើម។
ការគំរាមកំហែងពីសំណាក់ប្រទេសចិន មានរូបរាង ពិតៗ ដែលគេមិនអាចព្រងើយកន្តើយ ឬបដិសេធបានទេ។ នេះជាការអះអាងរបស់រដ្ឋមន្រ្តីការបរទេសហ្វីលីពីន ដែលបានចោទជាសំណួរផងដែរទៅសមាជិកអាស៊ានផ្សេងទៀត ដែលថា តើវាមិនទាន់ដល់ពេលទេ ដែលអាស៊ានត្រូវប្រាប់ទៅប្រទេសជិតខាង នៅប៉ែកខាងជើង ឲ្យឈប់ទាមទារតែម្នាក់ឯងជាម្ចាស់សមុទ្រចិនខាងត្បូង។ តើអាស៊ានត្រូវចាំដល់អង្កាល ដើម្បីងើបឈរ តវ៉ា ការពារនូវអ្វីដែលត្រឹមត្រូវ?
នៅថ្ងៃអាទិត្យ ហ្វីលីពីនបានទាមទារឲ្យកិច្ចប្រជុំអាស៊ាននៅម៉ាឡេស៊ី អាចផលិតចេញសេចក្តីថ្លែងការណ៍មួយ ដែលនឹងអាចបន្ទោសចិន នៅក្នុងជម្លោះសមុទ្រចិនខាងត្បូង។ ប៉ុន្តែ តាមអ្នកជំនាញ ជាច្រើន សេចក្តីថ្លែងការណ៍រិះគន់ ដែលធ្វើឲ្យប៉ះពាល់ដល់ទំនាក់ទំនងពាណិជ្ជកម្ម និងការទូតជាមួយ ចិន មិនមែនជាទម្លាប់របស់អាស៊ានទេ។ ដើម្បីជៀសវាង ជម្លោះ និងការប្រឈមមុខធ្ងន់ធ្ងរ ជាមួយចិន អាស៊ានបានទាមទារឲ្យចិន យល់ព្រមចុះហត្ថលេខាលើក្រមប្រតិបត្តិមួយ ដែលមាននិយាយពីច្បាប់គ្រប់គ្រង ដែនទឹក។ ប៉ុន្តែ ដំណើរការចរចាបានបោះជំហានទៅមុខ ដោយយឺតបំផុត រហូតធ្វើឲ្យអ្នកជំនាញខ្លះគិតថា ចិនកំពុងពន្យារពេល ដើម្បីពង្រឹងវត្តមានរបស់ខ្លួន នៅសមុទ្រចិនខាងត្បូង។ សម្រាប់រដ្ឋមន្រ្តីការបរទេសហ្វីលីពីន ចិនពេលនេះ កំពុងបុកគ្រឹះ មូលដ្ឋាន របស់ខ្លួន ឲ្យរួចរាល់ហើយ នៅក្នុងដែនសមុទ្រមានជម្លោះ មុននឹងចុះហត្ថលេខាលើក្រមប្រតិបត្តិ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ