ឥណ្ឌា៖លោកណារ៉េនដ្រា ម៉ូឌីអំពាវនាវឲ្យមានភាពស្អប់ស្ងាត់នៅក្នុងរដ្ឋហ៊្គូយ៉ារ៉ាត
នៅក្នុងប្រទេសឥណ្ឌា លោកនាយករដ្ឋមន្រ្តីណារ៉េនដ្រា ម៉ូឌីបានអំពាវនាវនៅថ្ងៃពុធ ទី២៦ សីហាឲ្យមានភាពស្ងប់ស្ងាត់នៅក្នុងរដ្ឋហ៊្គូយ៉ារ៉ាត (Gujarat)។ ការអំពាវនាវរបស់លោកម៉ូឌីពេលនេះបានធ្វើឡើង មួយថ្ងៃបន្ទាប់ពីមានមហាបាតុកម្មរបស់សហគមន៍ប៉ាទីដា (Patidars) ដែលបានបង្កឲ្យមានការប៉ះទង្គិចគ្នាយ៉ាងហិង្សាជាមួយកម្លំាងប៉ូលិសរហូតបណ្តាលឲ្យមានស្លាប់បាតុករចំនួន ២នាក់។ កម្មវត្ថុនៃបាតុកម្មរបស់សហគមន៍ប៉ាទីដា គឺទាមទារឲ្យរដ្ឋអំណាចយកចិត្តទុកដាក់បន្ថែមចំពោះពួកគេ ពិសេសសិទ្ធិក្នុងការទទួលបានការងារនៅក្នុងវិស័យសាធារណៈ និងសិទ្ធិចូលសិក្សានៅតាមសាកលវិទ្យាល័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ការអំពាវនាវឲ្យមានភាពស្ងប់ស្ងាត់ក្នុងរដ្ឋហ៊្គូយ៉ារ៉ាតពីលោកនាយករដ្ឋមន្រ្តីណារ៉េនដ្រា ម៉ូឌីបានធ្វើឡើង បន្ទាប់ពីចៅហ្វាយរដ្ឋហ៊្គូយ៉ារ៉ាតបានសម្រេចដាក់ពង្រាយកម្លំាងទ័ពជាច្រើនពាន់នាក់ ព្រមទំាងប្រកាសដាក់បំរាមគោចរនៅតាមសង្កាត់មួយចំនួនទៀតផង។ គោលដៅរបស់ចៅហ្វាយរដ្ឋហ៊្គូយ៉ារ៉ាត គឺដើម្បីរក្សាភាពស្ងប់ស្ងាត់ និងរៀបចំឲ្យមានសណ្តាប់ធ្នាប់សង្គមឡើងវិញ។ គួររម្លឹកជូនថា វិធានការចាស់ដៃរបស់រដ្ឋអំណាចក្នុងរដ្ឋហ៊្គូយ៉ារ៉ាតពេលនេះបានធ្វើឡើង មួយថ្ងៃក្រោយពីមានផ្ទុះអំពើហិង្សាយ៉ាងខ្លំាងរវាងហ្វូងបាតុករនៃសហគមន៍ប៉ាទីដា និងកម្លំាងប៉ូលិស។ ប៉ូលិសម្នាក់ដែលមិនឲ្យបញ្ចេញឈ្មោះបានអះអាងថា ការប៉ះទង្គិចគ្នារវាងបាតុករ និងប៉ូលិសបានបណ្តាលឲ្យស្លាប់បាតុករចំនួន ២នាក់ តែនៅមិនទាន់មានប្រភពណាមួយបានបញ្ជាក់ពីព័ត៌មាននេះទេ។
សូមជម្រាបជូនថា ប្រជាជននៃសហគមន៍ប៉ាទីដា (Patidars) ឬអាចហៅម្យ៉ាងទៀតថា ប៉ាតែល (Patel) តំណាងឲ្យជាង ១២% នៃចំនួនប្រជាជនរស់ក្នុងរដ្ឋហ៊្គូយ៉ារ៉ាត។ នៅថ្ងៃអង្គារ ទី២៥ សីហា និងបន្ទាប់ពីប៉ូលិសបានចាប់ខ្លួនមេដឹកនំារបស់ពួកគេនៅក្រោយមហាបាតុកម្មមក ពួកគេក៏បាននំាគ្នាចុះផ្លូវតវ៉ាដោយដុតបំផ្លាញរថយន្ត រថយន្តក្រុង និងប៉ុស្តិ៍ប៉ូលិស។ កម្មវត្ថុនៃក្បួនបាតុកម្មរបស់សហគមន៍ប៉ាទីដា គឺទាមទារឲ្យរដ្ឋអំណាចយកចិត្តទុកដាក់បន្ថែមចំពោះពួកគេ ពិសេសផ្តល់សិទ្ធិឲ្យពួកគេអាចទទួលបានការងារនៅក្នុងវិស័យសាធារណៈ និងសិទ្ធិចូលសិក្សានៅតាមសាកលវិទ្យាល័យ។
ប្រឈមនឹងភាពតានតឹងនេះ លោកណារ៉េនដ្រា ម៉ូឌីបានអំពាវនាវឲ្យមានភាពស្ងប់ស្ងាត់ និងអះអាងថា អំពើហិង្សាមិនមែនជាដំណោះស្រាយល្អចំពោះនរណាម្នាក់ទេ ហើយថា រាល់បញ្ហាទំាងអស់អាចនឹងដោះស្រាយតាមផ្លូវសន្តិវិធី។ គួររម្លឹកជូនថា មុននឹងក្លាយជានាយករដ្ឋមន្រ្តី លោកណារ៉េនដ្រា ម៉ូឌីបានដឹកនំារដ្ឋហ៊្គូយ៉ារ៉ាតអស់រយៈពេលជាង ១០ឆ្នំា។ ម្យ៉ាងទៀត គិតតំាងពីក្រោយព្រឹត្តិការណ៍សម្លាប់រង្គាលក្នុងឆ្នំា ២០០២ ដែលបណ្តាលឲ្យស្លាប់មនុស្សយ៉ាងតិច ១ ០០០នាក់ ភាគច្រើនជាអ្នកកាន់សាសនាអ៊ីស្លាមមក នេះជាលើកទី១ ដែលរដ្ឋហ៊្គូយ៉ារ៉ាតបានស្ថិតក្រោមបំរាមគោចរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ