កុនឃោសនាឲ្យរបបសឹកថៃរងការរិះគន់ ដោយសារបង្ហាញរូបភាពហ៊ីត្លែរ
នៅក្នុងប្រទេសថៃ កុនឃោសនាខ្នាតខ្លីរបស់របបសឹកបានបង្កឲ្យមានការខឹងសម្បារ និងខកចិត្តពីសំណាក់អង្គការដើម្បីការសិក្សាប្រវត្តិសាស្រ្ត។ នៅក្នុងឈុតមួយនៃកុនឃោសនារបស់របបសឹក ឈុតមួយបានបង្ហាញកុមារថៃម្នាក់បានទទួលការសរសើរ បន្ទាប់ពីបានគូររូបភាពរបស់ហ៊ីត្លែរ ដែលជាមេដឹកនាំក្រុមណាហ្សីអាល្លឺម៉ង់ក្នុងសង្រ្គាមលោកលើកទីពីរ។ ជាថ្មីម្តងទៀត ដោយសារតែរឿងព្រងើយកន្តើយនឹងប្រវត្តិសាស្រ្តពិភពលោក ការអប់រំស្តីពីប្រវត្តិសាស្រ្តក្នុងប្រទេសថៃ ត្រូវគេរិះគន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
តាមរយៈកុនឃោសនាខ្នាតខ្លី ដែលចាក់បញ្ចាំងនៅតាមរោងភាពយន្ត របបសឹកថៃចង់បញ្ចូលតម្លៃទាំង១២ដែលខ្លួនបានកំណត់ឡើង ទៅក្នុងខួរក្បាលរបស់សិស្សសាលាថៃ។ ប៉ុន្តែ ឈុតដំបូងរបស់កុនខ្នាតខ្លីបានបង្កើតឲ្យភាពភ្ញាក់ផ្អើល ដល់ទស្សនិកជនថៃ និងអង្គការដើម្បីការអប់រំប្រវត្តិសាស្រ្ត ដោយសារតែកុនឃោសនាខ្នាតខ្លី បានបង្ហាញសិស្សសាលាថៃម្នាក់គូរ រូបហ៊ីត្លែរ មេដឹកនាំណាហ្ស៊ី នៅពេលដែលសិស្សសាលាម្នាក់ទៀតបានទះដៃ សរសើរស្នាដៃរបស់ម្ចាស់គំនូរ។
វិបសៃតិ៍អាមេរិកាំងមួយ ឈ្មោះ ការទទួលខុសត្រូវដើម្បីការអប់រំប្រវត្តិសាស្រ្ត ដែលមានទីតាំងក្នុងប្រទេសថៃ បានរិះគន់កុនឃោសនាខ្នាតខ្លីរបស់របបសឹក។ សម្រាប់អង្គការមួយនេះ ការផ្តល់តម្លៃ ដល់ហ៊ីត្លែរ ដែលជាមេដឹកនាំផ្តាច់ការ នៅក្នុងកុនឃោសនារបស់រដ្ឋថៃ បានបញ្ជាក់យ៉ាងច្បាស់ថា រដ្ឋាភិបាលថៃដែលអះអាងចង់ពង្រឹងការរៀនប្រវត្តិសាស្រ្ត ក្នុងប្រទេស នៅមិនទាន់យល់ ខ្លួនឯង ច្បាស់ពីប្រវត្តិសាស្រ្តនៅឡើយទេ។ អង្គការអាមេរិកមិនលាក់ទេ ពីការព្រួយបារម្ភរបស់ខ្លួន ចំពោះការធ្វេសប្រហែល និងខ្វះការចេះដឹងផ្នែកប្រវត្តិសាស្រ្តរបស់ប្រជាជនថៃ នៅពេលដែលរូបភាពរបស់ហ៊ីត្លែរ មេដឹកនាំកាប់សម្លាប់ជនជាតិ ជ្វីហ្វ ត្រូវបានគេកោតសរសើរ និងផ្តល់តម្លៃ នៅក្នុងកុនឃោសនា របស់របបសឹកនោះ។
តាមអ្នកដឹកនាំរឿង កុនឃោសនាខ្នាតខ្លី រដ្ឋាភិបាល បានត្រួតពិនិត្យ និងអនុញ្ញាតឲ្យចាក់បញ្ចាំង នៅតាមរោងកុន ដោយគ្មានបញ្ហា។ លោកគល់ កាចារឿក ជាកូនប្រុសរបស់ម្ចាស់ផលិតកម្មកាតាណា ដែលធំជាងគេនៅប្រទេសថៃ បានបញ្ជាក់ថា កុនខ្នាតខ្លីរបស់លោកមានទិសដៅ បង្ហាញពីការរីកចម្រើននៃសីលធម៌របស់ក្មេងថៃ។ ហ៊ីត្លែរធ្លាប់ជាមេដឹកនាំដ៏មានអំណាច នៅក្នុងអតីតកាល ប៉ុន្តែ គាត់បានដើរផ្លូវខុស។ កុមារថៃដែលគូររូបហ៊ីត្លែរក៏ដូច្នោះដែរ គេអាចផ្លូវខុស ប៉ុន្តែ បានរៀនសូត្រ ដើម្បីកែប្រែខ្លួនមកជាមនុស្សល្អវិញ នៅចុងបញ្ចប់។ នេះហើយជាសារសំខាន់របស់កុន។
នេះមិនមែនជាលើកទីមួយទេ ដែលថៃជួបរឿងអាស្រូវប្រភេទនេះ។ កាលពីឆ្នាំ ២០១៣ សកលវិទ្យាល័យ ជូឡាឡុងកនធ្លាប់បានចេញមុខសុំទោស បន្ទាប់ពីនិស្សិតរបស់សាលាដ៏ល្បីមួយនេះ បានដាក់តាំងរូបហ៊ីត្លែរ នៅថ្ងៃទទួលសញ្ញាប័ត្ររបស់ពួកគេ។ ជាញឹកញយ នៅថៃ គេឧស្សាហ៍ឃើញ រូបភាពហ៊ីត្លែរ ឬ មនុស្សពាក់អាវ មានស្លាកសញ្ញាណាហ្ស៊ី នៅតាមផ្លូវ ឬពេលខ្លះ គេឃើញសិស្សសាលាធ្វើគំនាប់តាមរបៀបពួកណាហ្សីទៀតផង។ តាមអ្នកជំនាញ ទាំងនេះបង្ហាញពីការខ្វះចំណេះដឹង របស់ប្រជាជនថៃ ទាក់ទងនឹងប្រវត្តិសាស្រ្តពិភពលោក នៅពេលដែលប្រព័ន្ធអប់រំរបស់រដ្ឋាភិបាលវិញ នៅខ្វះចន្លោះច្រើន ក្នុងរឿងអប់រំប្រវត្តិសាស្រ្តដល់ប្រជាជនរបស់ខ្លួន។
កុនឃោសនាខ្នាតខ្លីមានទិសដៅពង្រឹងតម្លៃ សីលធម៌ទាំង១២ ដែលរបបសឹកបានកំណត់ឡើង សម្រាប់សង្គមថៃ។ សីលធម៌ទាំង១២ ដែលរបបសឹកចង់ឲ្យសិស្សសាលាពីអាយុ ៨ ដល់១៨ឆ្នាំ រៀនចងចាំក្នុងចិត្តនោះ មានលើកនិយាយផងដែរ ពីការគោរព ដាច់ណាត់ ព្រះរាជបល្ល័ង្ករបស់ព្រះចៅភូមិបុល។ ប៉ុន្តែ សម្រាប់និស្សិតថៃ របបសឹកកំពុងប្រើកុនឃោសនាដើម្បីលាងខួរក្បាលយុវវ័យថៃទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ