តំណាងរាស្រ្តអង់គ្លេស៖ វិបត្តិនយោបាយកំពុងតាមលងហុងកុង
គណៈកម្មការសភាអង់គ្លេសបានវាយតម្លៃថា ១៨ឆ្នាំក្រោយអង់គ្លេសប្រគល់ទឹកដីហុងកុងទៅឲ្យចិនកាន់កាប់វិញ ហុងកុងបានក្លាយជាទីក្រុងដ៏រស់រវើក និងស្វាហាប់។ ប៉ុន្តែ ជាមួយគ្នានេះ ហុងកុងក៏អាចរងគំរាមកំហែង ដោយវិបត្តិនយោបាយ ដែលកើតចេញមកពីការបិទខ្ទប់សេចក្តីស្រេកឃ្លាន លទ្ធិប្រជាធិបតេយ្យ របស់ប្រជាជន។ នេះបើតាមរបាយការណ៍របស់គណៈកម្មការសភា អង់គ្លេស ដែលចេញផ្សាយ នៅថ្ងៃសុក្រទី ៦ មីនា។
ចុះផ្សាយនៅថ្ងៃ៖
ស្តាប់ - ០២:១៧
របាយការណ៍សរសេរ និងចេញផ្សាយ នៅថ្ងៃនេះ ដោយគណៈកម្មការសភា អង់គ្លេស ធ្វើឡើង ដើម្បីបូកសរុបឡើងវិញ ពីទំនាក់ទំនង រវាងរាជាណាចក្រអង់គ្លេស និងហុងកុង នៅ១៨ឆ្នាំ ក្រោយ ដែលហុងកុងត្រូវអង់គ្លេស ប្រគល់ទៅឲ្យចិនដីគោក គ្រប់គ្រងវិញ នៅ ឆ្នាំ ១៩៩៧។
នៅក្នុងរបាយការណ៍របស់ខ្លួន អ្នកតំណាងរាស្រ្តអង់គ្លេសវាយតម្លៃថា បើមើលទៅថ្ងៃអនាគត ហុងកុងអាចប្រឈមនឹងវិបត្តិផ្នែកអភិបាលកិច្ច ប្រសិនបើប្រជាជនហុងកុង និងថ្នាក់ដឹកនាំ ហុងកុង រួមទាំងគណបក្សកុម្មុយនិស្តចិន មិនអាចចុះសម្រុងគ្នា នៅក្នុងវិបត្តិធម្មនុញ្ញបច្ចុប្បន្ននេះ។
ស្ថានភាពនយោបាយនៅហុងកុងនៅតែតានតឹង នៅក្រោយក្រុមបាតុករក្រុមនិស្សិត និងប្រជាជនហុងកុងកាន់កាប់ផ្លូវ និងទីតាំងសាធារណៈអស់រយៈពេល ២ខែ កាលពីចុងឆ្នាំមុន។ ពួកគេទាមទារឲ្យមានការបោះឆ្នោតសេរី ដើម្បីជ្រើសរើសមេដឹកនាំ ហុងកុង នៅឆ្នាំ ២០១៧។ ជាលើកទីមួយ ក្នុងប្រវត្តិសាស្រ្ត ទីក្រុងប៉េកាំង បានយល់ព្រមគោលការណ៍បោះឆ្នោត ជាសកល ប៉ុន្តែ ប៉េកាំងតម្រូវឲ្យមានបេក្ខជនឈរឈ្មោះតែពីរ ឬបីនាក់ ហើយរាល់បេក្ខជនត្រូវតែបានទទួលការបោះឆ្នោតយល់ព្រមពីបក្សកុម្មុយនិស្តជាមុនសិន។ សម្រាប់បាតុករ បើគេធ្វើដូច្នេះ ថ្នាក់ដឹកនាំហុងកុងនឹងក្លាយជាអ្នកបម្រើនយោបាយឲ្យទីក្រុងប៉េកាំង។
សម្រាប់អ្នកតំណាងរាស្រ្តអង់គ្លេស ការទាមទារលទ្ធិប្រជាធិបតេយ្យរបស់ប្រជាជនហុងកុងមិនមែនជារឿងស្រមើស្រម៉ៃទេ ប៉ុន្តែ វាបានឆ្លុះបញ្ចាំងឲ្យឃើញថា ប្រជាជនហុងកុងចង់បានថ្នាក់ដឹកនាំមួយ ដែលអាចឆ្លើយតបនឹងតម្រូវការ ការចង់បានរបស់ពួកគេ។ នៅក្នុងរឿងនេះ អ្នកតំណាងរាស្រ្តអង់គ្លេសបានធ្វើអនុសាសន៍សុំឲ្យរដ្ឋាភិបាលអង់គ្លេសដើរតួរឲ្យបានច្បាស់ៗ ដើម្បីជៀសវាងកុំឲ្យអង់គ្លេស បាក់មុខ នៅក្នុងឆាកអន្តរជាតិ។ “យើងគាំទ្រ ជំហររបស់រដ្ឋាភិបាលអង់គ្លេសដែលនិយាយថា គឺចិន និងហុងកុង ដែលត្រូវសម្រេចជាមួយប្រជាជនហុងកុង ដើម្បីសើរើរដ្ឋធម្មនុញ្ញ។ ប៉ុន្តែ យើងមិនយល់ស្របជាមួយរដ្ឋាភិបាលអង់គ្លេស ទេដែលថា ការបោះឆ្នោត ឆ្នាំ ២០១៧ នឹងផ្តល់ជម្រើសពិតប្រាកដដល់ប្រជាជនហុងកុងនោះ”។ នេះជាកំណត់សំគាល់របស់សមាជិកសភាអង់គ្លេស។
នៅក្នុងរបាយការណ៍ គណៈកម្មការសភាអង់គ្លេស ឆ្លៀតផងដែរ រិះគន់ ការសម្រេចរបស់ទីក្រុងប៉េកាំង ដែលបានបដិសេធមិនឲ្យអ្នកតំណាងរាស្រ្តអង់គ្លេសធ្វើដំណើរទៅធ្វើការស្រាវជ្រាវ រកព័ត៌មាននៅទីក្រុងហុងកុងកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ