ប្រធានធិបតីចិនអះអាងថារវាងចិននិងអាមេរិក គ្មានអ្វីគួរឲ្យបារម្ភទេ
ថ្លែងក្នុងពេលជួបពិភាក្សាជាមួយប្រមុខការទូតអាមេរិក លោកចន ឃែរី លោកស៊ី ជីងពីងប្រធានាធិបតីចិន បានបញ្ជាក់ថា ទំនាក់ទំនងរវាងអាមេរិក និងចិន មានភាពរឹងប៉ឹង ល្អប្រសើរ គ្មានអ្វីគួរឲ្យបារម្ភទេ បើទោះណា ជាមានបញ្ហានៅក្នុងការដណ្តើមកាន់កាប់ដែនទឹក ក្នុងសមុទ្រចិនខាងត្បូងក៏ដោយ។ ទោះបីជាយ៉ាងណា ជាមួយនឹងការសន្យារបស់អាមេរិកថា នឹងដាក់នាវាចម្បាំង ឲ្យយាមល្បាត ក្នុងតំបន់ជម្លោះ ដើម្បីប្រឈមមុខជាមួយមហិច្ឆិតារបស់ចិន គេពិបាកនឹងជឿណាស់ ថាទំនាក់ទំនងល្អរវាងមហាយក្សទាំងពីរ នឹងនៅគង់វង្ស បានយូរតទៅទៀត។
ចុះផ្សាយនៅថ្ងៃ៖
ស្តាប់ - ០២:១០
លោកចន ឃែរី ទើបបានបញ្ចប់ទស្សនកិច្ចការទូត នៅប្រទេសចិន ដោយបានចូលជួបជាមួយលោករដ្ឋមន្រ្តីការបរទេសចិន កាលពីថ្ងៃសៅរ៍ ទី ១៦ឧសភា និងបានចូលជួបជាមួយលោក ប្រធានាធិបតីស៊ីជីងពីង នៅថ្ងៃអាទិត្យទី ១៧ឧសភា នេះ។ គ្រប់គ្នាដឹងយ៉ាងច្បាស់ថា កម្មវត្ថុនៃការធ្វើដំណើររបស់លោកចន ឃែរី គឺដើម្បីបញ្ជាក់ពីការព្រួយបារម្ភរបស់អាមេរិក ជុំវិញសកម្មភាពវាតទីរបស់ចិន នៅក្នុងដែនសមុទ្រចិនខាងត្បូង ដែលជាតំបន់ចម្រូងចម្រាស ជាមួយប្រទេសជិតខាង រួមមាន វៀតណាម ម៉ាឡេស៊ី ហ្វីលីពីន ប៊្រុយណេ និងតៃវ៉ាន់ ជាដើម។
វាជារឿងធម្មតាទៅហើយ ដែលគេតែងតែឮប្រសាសន៍ បែបមិនសូវខ្វល់ មិនសូវព្រួយរបស់លោក ប្រធានាធិបតីចិន ដែលថា ទំនាក់ទំនងរវាងចិននិងសហរដ្ឋអាមេរិក មានស្ថិរិភាពល្អប្រសើរណាស់។ នៅថ្ងៃអាទិត្យនេះ លោកថែមទាំងបានបញ្ជាក់ថា លោកប្រាថ្នាចង់ ចាប់ដៃគ្នាធ្វើការ ជាមួយលោកបារ៉ាក់ អូបាម៉ា ដើម្បីឲ្យទំនាក់ទំនងរវាងប្រទេសទាំងពីរ កាន់តែល្អជាងនេះ រាប់រយដង ដើម្បីឲ្យសក្តិ៍សម ជាមហាប្រទេស ដ៏ធំទាំងពីរលើលោក។
យ៉ាងណាមិញ លោកប្រធានាធិបតីចិន ប្រហែលជាភ្លេចថា ពាក្យថាមហាប្រទេស រឺមហាអំណាចសេដ្ឋកិច្ច គឺមានន័យថា ជាប្រទេសដែលមានកិត្តិយស ប្រកបដោយសច្ចៈធម៌ និងមានគេគោរព មិនមានន័យថា ចង់ធ្វើអ្វីមួយ បានតាមចិត្តនោះទេ។ ចិនដែលកំពុងតែមានជម្លោះជាមួយប្រទេសជិតខាង ទាក់ទិននឹងការកាន់កាប់ដែនទឹក ក្នុងសមុទ្រចិនខាងត្បូង បាននិងកំពុងតែកសាងកោះសិប្បនិម្មិត នៅក្នុងតំបន់មានជម្លោះ ហើយដែលស្ថិតក្នុងដែនទឹកអន្តរជាតិ ដែលការនេះ វាផ្ទុយទាំងស្រុង ពីច្បាប់អន្តរជាតិ។ ក្នុងចំណោមផ្ទៃក្រឡាទាំង ៣លាន៥សែន គីឡូម៉ែត្រការ៉េ នៃផ្ទៃសមុទ្រចិនខាងត្បូង ចិនបានទាមទារថាជារបស់ខ្លួន អស់៩០ភាគរយទៅហើយ ដោយកន្លែងខ្លះ ចិនវាស់ទៅដល់ ឆ្នេរដីគោកប្រទេសជិតខាង ក៏មានដែរ។
កាលពីសប្តាហ៍មុន សហរដ្ឋអាមរិក បានសន្យាថា នឹងពិចារណា បញ្ជូននាវាចម្បាំង និងយន្តហោះស៊ើបការណ៍ ទៅយាមល្បាត ក្នុងតំបន់ប្រជុំកោះ Spratleys ដើម្បីកុំឲ្យចិនធ្វើអ្វីបានតាមចិត្ត។ ចិនបានឆ្លើយតបមកវិញថា នេះគ្រាន់តែជាលេសរបស់អាមេរិក ដើម្បីបានបង្កើនកម្លាំងទ័ព លុកលុយក្នុងតំបន់តែប៉ុណ្ណោះ។ កាលពីម្សិលមិញនេះទៀត លោកវ៉ាងយី រដ្ឋមន្រ្តីការបរទេសចិន បានទាំងចំអកថា ចិនមានគោលជំហររឹងដូចថ្ម ក្នុងការការពារទឹកដីរបស់ខ្លួន គ្មាននរណាមករារាំង បានជាដាច់ខាត។
អាមេរិក ប្រហែលជាត្រូវធ្វើការថ្លឹងថ្លែង ម្ខាងចិន ម្ខាងជាសម្ព័ន្ធមិត្តផ្សេងទៀតរបស់ខ្លួន ដែលមានតៃវ៉ាន់ ជប៉ុន កូរ៉េខាងត្បូង និងហ្វីលីពីនជាដើម ថាតើគួរបន្តទ្រំាបិទភ្នែកឲ្យចិនធ្វើផ្គរធ្វើភ្លៀង រឺមួយក៏ជួយរកយុត្តិធម៌ ជូនប្រទេសក្នុងតំបន់ ដើម្បីធានាស្ថិរភាព ក្នុងតំបន់អាស៊ីបូព៌ាទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ