លោកស្រីគ្រីស្ទីន ឡាហ្កាដ៖កំណើនសេដ្ឋកិច្ចពិភពលោកឆ្នំា ២០១៥បានធ្លាក់ចុះជាងការប្រមើលទុក
លោកស្រីគ្រីស្ទីន ឡាហ្កាដ អគ្គនាយិកាមូលនិធិរូបិយវត្ថុអន្តរជាតិហៅកាត់ថា FMI បានអញ្ជើញទៅបំពេញទស្សនកិច្ចរយៈពេល ២ថ្ងៃនៅក្នុងប្រទេសឥណ្ឌូណេស៊ីដោយចាប់ផ្តើមពីថ្ងៃអង្គារ ទី១ កញ្ញា។ លោកស្រីបានថ្លែងថា កំណើនសេដ្ឋកិច្ចក្នុងលោកសម្រាប់ឆ្នំា ២០១៥ មានការធ្លាក់ចុះជាងការប្រមើលទុក និងបានអំពាវនាវឲ្យបណ្តាប្រទេសដែលកំពុងមានសេដ្ឋកិច្ចរីកលូតលាស់ប្រយ័ត្នប្រយែងចំពោះស្ថានភាពសេដ្ឋកិច្ចចិនដែលកំពុងថយចុះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
គឺនៅក្នុងសាកលវិទ្យាល័យមួយក្នុងទីក្រុងហ្សាការតាដែលលោកស្រីគ្រីស្ទីន ឡាហ្កាដបានបញ្ជាក់ច្បាស់ៗថា កំណើនសេដ្ឋកិច្ចក្នុងលោកសម្រាប់ឆ្នំា ២០១៥ ប្រហែលជាមានប្រមាណតែ ៣,៣% ប៉ុណ្ណោះ ពោលធ្លាក់ចុះបន្តិចបើធៀបនឹងការប្រមើលទុកក្នុងខែកក្កដាដែលមាន ៣,៤%។ កំណើនសេដ្ឋកិច្ចពិភពលោកធ្លាក់ចុះក៏ដោយសារតែស្ថានភាពសុខភាពសេដ្ឋកិច្ចក្នុងប្រទេសចិនមិនសូវល្អ ហើយប្រទេសដែលបានទទួលរងផលប៉ះពាល់ខ្លំាងជាងគេ គឺបណ្តាប្រទេសដែលកំពុងមានសេដ្ឋកិច្ចរីកលូតលាស់ខ្លំាង ដោយចាប់ផ្តើមពីប្រទេសឥណ្ឌូណេស៊ីរហូតដល់ប្រទេសប្រេស៊ីល។
គួរជម្រាបជូនថា ក្នុងនាមជាប្រទេសមហាអំណាចសេដ្ឋកិច្ចទី២ ក្នុងលោក និងនៅពេលដែលកំពុងមានស្ថានភាពសេដ្ឋកិច្ចធ្លាក់ចុះ ចិនបានធ្វើឲ្យសេដ្ឋកិច្ចក្នុងលោករំជើបរំជួលយ៉ាងខ្លំាងនារយៈពេលចុងក្រោយនេះ។ ការកម្ម៉ង់ទិញវត្ថុធាតុដើមរបស់ចិនបានធ្លាក់ចុះដែលជាហេតុនំាឲ្យវិស័យនំាចេញវត្ថុធាតុដើមរបស់ប្រទេសខ្លះទៅកាន់ប្រទេសចិនជួបការលំបាក។ គឺនៅក្នុងន័យនេះហើយបានជាលោកស្រីគ្រីស្ទីន ឡាហ្កាដបានអំពាវនាវឲ្យបណ្តាប្រទេសដែលកំពុងមានសេដ្ឋកិច្ចរីកលូតលាស់ឲ្យប្រយ័ត្នប្រយែងចំពោះការវិវត្តន៍ទៅរបស់សេដ្ឋកិច្ចចិន ក៏ដូចជាគម្រោងរបស់ធនាគារកណ្តាលអាមេរិកដែលចង់ដំឡើងអត្រាការប្រាក់នំាមុខនៅពេលខាងមុខ។
លោកស្រីអគ្គនាយិកា FMI បានយល់ឃើញថា កំណើនសេដ្ឋកិច្ចចិនដើរថយក្រោយមិនមែនជារឿងភ្ញាក់ផ្អើល ហើយក៏មិនមែនជាការធ្លាក់ចុះយ៉ាងគំហុកគួរឲ្យព្រួយបារម្ភទេ។ សម្រាប់លោកស្រីគ្រីស្ទីន ឡាហ្កាដ អ្វីដែលចិនកំពុងជួបប្រទះពេលនេះ គឺជាលទ្ធផលបណ្តោះអាសន្ននៃដំណើរការផ្លាស់ប្តូរឆ្ពោះទៅរកសេដ្ឋកិច្ចទីផ្សារពេញលក្ខណៈរបស់ចិនប៉ុណ្ណោះ និងថា វាជារឿងមួយធម្មតាទេដែលដំណើរការផ្លាស់ប្តូរនោះអាចជួបការលំបាកខ្លះ។ យ៉ាងណាក៏ដោយ នៅក្នុងកិច្ចសន្ទនាជាមួយលោកប្រធានាធិបតីឥណ្ឌូណេស៊ីយ៉ូកូ វីដូដូ លោកស្រីគ្រីស្ទីន ឡាហ្កាដមិនភ្លេចនិយាយសរសើរប្រទេសឥណ្ឌូណេស៊ីក្នុងនាមជាមហាអំណាចសេដ្ឋកិច្ចក្នុងតំបន់អាស៊ីអាគ្នេយ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ