សាលាក្តីខ្មែរក្រហមស្តាប់ទឡ្ហីករណ៍ ស្តីពីវិសាលភាពសំណុំរឿង០០២/២ និងករណីលោកខៀវ សំផន
សាលាក្តីខ្មែរក្រហមនឹងបើកសវនាការនៅថ្ងៃអង្គារទី១១កុម្ភៈដើម្បីស្តាប់ទឡ្ហីករណ៍ផ្ទាល់មាត់ស្តីអំពីវិសាលភាពសំណុំរឿង០០២ វគ្គ២ និងករណីរបស់លោកខៀវ សំផន ដែលមេធាវីរបស់លោកស្នើអោយបញ្ចប់សំណុំរឿង០០២ វគ្គ១សិន មុនចាប់ផ្តើមស៊ើបអង្កេតលើលោកខៀវ សំផនក្នុងវគ្គ២នេះ។ សវនាការនៅថ្ងៃអង្គារនោះ គឺជាសវនាការសាធារណៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ភាគីសហព្រះរាជអាជ្ញា មេធាវីដើមបណ្តឹងរដ្ឋប្បវេណី និងមេធាវីការពារជនជាប់ចោទនឹងត្រូវជួបគ្នានៅថ្ងៃអង្គារទី១១កុម្ភៈនេះ នៅសាលាក្តីខ្មែរក្រហមក្នុងក្របខណ្ឌនៃសវនាការស្តាប់ទឡ្ហីករណ៍ផ្ទាល់មាត់ មុនការបើកសវនាការលើភស្តុតាងក្នុងសំណុំរឿង០០២ វគ្គ២។
អ្នកនាំពាក្យសាលាក្តីខ្មែរក្រហមលោកនេត្រ ភក្ត្រា បានបញ្ជាក់វិទ្យុបារាំងថា នៅក្នុងសវនាការជាសាធារណៈនោះ មានរបៀបវារៈសំខាន់២ ដែលភាគីត្រូវពិភាក្សា។ របៀបវារៈទីមួយ គឺជាវិសាលភាពនៃសំណុំរឿង០០២ វគ្គ២ និងរបៀបវារៈទី២ គឺទាក់ទងនឹងករណីរបស់លោកខៀវ សំផន។ លោកខៀវ សំផនបានស្នើអោយតុលាការបញ្ចប់សំណុំរឿង០០២ វគ្គ១ ចប់សព្វគ្រប់សិន ពោលគឺការប្រកាសសាលក្រមសំណុំរឿង ០០២វគ្គ១ និងបណ្តឹងសារទុក្ខទៅតុលាការកំពូល ព្រមទាំងការប្រកាសសាលដីកា មុននឹងបន្តស៊ើបអង្កេតករណីលោកក្នុងសំណុំរឿង០០២ វគ្គ២ទៀតនោះ។
ទាក់ទងនឹងវិសាលភាពសំណុំរឿង០០២ វគ្គ២វិញ ភាគីទាំងអស់នឹងត្រូវបញ្ចេញទស្សនៈ និងអំណះអំណាងរបស់ពួកគេរៀងៗខ្លួន មុននឹងសាលាដំបូងប្រកាសសម្រេចយ៉ាងណានោះ។ ក៏ប៉ុន្តែ គេនៅចាំបានថា តុលាការកំពូលធ្លាប់បានប្រកាសសម្រេចអោយសំណុំរឿង០០២ វគ្គ២ ត្រូវផ្តោតទៅលើអង្គហេតុដែលបានកើតឡើង នៅក្នុងមន្ទីរឃុំឃាំងស ២១ ការបង្កើតការដ្ឋានការងារ សហករ និងការកាប់សម្លាប់ជនជាតិចាម និងវៀតណាម។
គួររម្លឹកផងដែរ តុលាការកំពូលនៃសាលាក្តីខ្មែរក្រហម និងអង្គការក្រៅរដ្ឋាភិបាលនានាដែលតាមដានដំណើរការនៃសាលាក្តីពិសេសនេះ បានជំរុញអោយសាលាដំបូងនៃសាលាក្តីខ្មែរក្រហម ពន្លឿនការបន្តបើកសវនាការសំណុំរឿង០០២ វគ្គ២ ដោយសារតែវ័យជរានៃជនជាប់ចោទដែលនៅសល់តែ២នាក់ គឺលោកខៀវ សំផន និងលោន នួន ជា។
យោងតាមការបញ្ជាក់របស់មន្ត្រីជាន់ខ្ពស់នៃតុលាការខ្មែរក្រហមក្នុងពេលកន្លងមក សាលាដំបូងនៃសាលាក្តីពិសេស នឹងអាចចាប់ផ្តើមសវនាការសំណុំរឿង០០២ វគ្គ២ នៅមុនការប្រកាសសាលក្រមសំណុំរឿង០០២ វគ្គ១ ដែលគ្រោងធ្វើនៅពាក់កណ្តាលឆ្នាំ២០១៤នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ