អូស្ត្រាលីនៅតែគិតថា បំណែកយន្តហោះម៉ាឡេស៊ី ស្ថិតក្នុងមហាសមុទ្រឥណ្ឌា
នៅថ្ងៃសុក្រនេះ ប្រធានទីភ្នាក់ងារសន្តិសុខនិងដឹកជញ្ជូនអូស្ត្រាលី លោក Martin Dolanបានបញ្ជាក់ជាថ្មីថា នូវការជឿជាក់របស់អ្នកស៊ើបអង្កេតរកបំណែកយន្តហោះម៉ាឡេស៊ីជើងហោះហើរ MH៣៧០ ដែលបានបាត់ខ្លួនកាលពីថ្ងៃ ៨មិនា កន្លងទៅ។ អ្នកស៊ើបអង្កេតនានាជឿជាក់ថា បំណែកយន្តហោះម៉ាឡេស៊ី នៅតែមានវត្តមានក្នុងមហាសមុទ្រឥណ្ឌា បើទោះជាអាជ្ញាធរអូស្ត្រាលីផ្នែកសម្របសម្រួលប្រតិបត្តិការស្វែងរកយន្តហោះ ទើបតែបានប្រកាសម្សិលមិញថា តំបន់ដែលគេរុករក នៅក្រោមបាតសមុទ្រកន្លងមក មិនមែនជាទីតាំងដែលយន្តហោះធ្លាក់ក្តី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
លោក ម៉ាធីន ដូឡាន់ ប្រធានទីភ្នាក់ងារសន្តិសុខនិងដឹកជញ្ជូនអូស្ត្រាលី បានបញ្ជាក់ជាថ្មីទៀត នូវការជឿជាក់របស់អ្នកស៊ើបអង្កេតនានាដែលគិតថា បំណែកយន្តហោះម៉ាឡេស៊ី ដែលបាត់ខ្លួនកាលពីថ្ងៃ៨មីនា ប្រាកដជាស្ថិតនៅមហាសមុទ្រឥណ្ឌា។
ទីភ្នាក់ងារសន្តិសុខនិងដឹកជញ្ជូនអូស្ត្រាលី នៅតែពឹងផ្អែកលើទិន្នន័យរបស់ផ្កាយរណបក្រុមហ៊ុនអង់គ្លេស Inmarsat។ យោងតាមទិន្នន័យនេះ គេគណនាថា យន្តហោះបូអ៊ីងបានហោះឆ្ពោះទៅទិសខាងត្បូង ហើយត្រូវធ្លាក់នៅមហាសមុទ្រឥណ្ឌា ភាគខាងលិចអូស្ត្រាលី។ អ្នកជំនាញគិតថា នឹងរកឃើញបំណែកយន្តហោះ នៅរាប់រយគីឡូម៉ែត្រពីឆ្នេរអូស្ត្រាលី នៅតាមបណ្តោយទីតាំងមួយ។ ជិតនោះ ជាកន្លែងដែលគេបានចាប់បានសញ្ញាជាច្រើន ក្នុងរយៈពេលចុងក្រោយនេះ។
ប៉ុន្តែ ម្សិលមិញ អ្នកស៊ើបអង្កេតរុករកយន្តហោះបានប្រកាសថា រលកសញ្ញាសម្លេងដែលគេចាប់បាននៅមហាសមុទ្រឥណ្ឌា កាលពីដើមខែមេសា ហើយដែលគេគិតថា វាជាសញ្ញារបស់ប្រអប់ខ្មៅយន្តហោះនោះ ប្រហែលជាសញ្ញាចេញមកពីកប៉ាល់ រឺសញ្ញារបស់ឧបករណ៍ស្ទង់ជម្រៅទឹកផ្សេងៗទៅវិញទេ។ ទោះយ៉ាងនេះក្តី អ្នកជំនាញនៅតែគិតថា បំណែកយន្តហោះនៅតែធ្លាក់មិនឆ្ងាយពីទីកន្លែងរុករកកន្លងមក។ អ្នកជំនាញនឹងធ្វើការវិភាគសារជាថ្មីទៀត ដើម្បីកំណត់ទីតាំងរុករក ដែលមានលក្ខណៈសមហេតុផល។
គួររំលឹកថា យន្តហោះបូអ៊ីងម៉ាឡេស៊ីដែលបាត់ខ្លួនកាលពីថ្ងៃ៨មីនា ដឹកមនុស្ស២៣៩នាក់ ក្នុងនោះ អ្នកដំណើរចិនមានចំនួនច្រើនជាងគេ។ គ្រួសារអ្នកដំណើរបានចោទនិងសង្ស័យថា អាជ្ញាធរម៉ាឡេស៊ីបិទបាំងព័ត៌មាន។ ទីភ្នាក់ងារសន្តិសុខនិងដឹកជញ្ជូនអូស្ត្រាលីបានលើកឡើងថា ការសង្ស័យរបស់គ្រួសារអ្នកដំណើរមិនមែនជាការពិតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ