អ្នកភូមិបឹងកក់ ជំទាស់ការរាយការណ៏ពីបញ្ហាដីធ្លី ទៅអង្គការសហប្រជាជាតិ
អ្នកភួមិបឹងកក់ បុរីកីឡា និងថ្មគោល ប្រមាណជា ១០០នាក់ នៅព្រឹកថ្ងៃចន្ទនេះ បាននាំគ្នាធ្វើសន្និសីទសារព័ត៌មានមួយ នៅតំបន់បឹងកក់ ដើម្បីជំទាស់ទៅនឹងការលើកឡើង របស់លោក ម៉ក់ សម្បត្តិ អនុប្រធានគណៈកម្មាធិការសិទ្ធិមនុស្សកម្ពុជា ដែលបានលើកឡើងពីបញ្ហាដីធ្លី ថាមានការបំប៉ោងទិន្នន័យចំនួនគ្រួសារ ដែលរស់នៅក្នុងតំបន់ដីជម្លោះ។ ជាការលើកឡើង នៅក្នុងកិច្ចពិភាក្សា ស្តីពីសិទ្ធមនុស្សនៅកម្ពុជា ក្នុងទីក្រុងហ្សឺណែវ កាលពីចុងខែមករាកន្លងទៅ ហើយដែលអ្នកភូមិអះអាង ជារឿងមិនពិត។ ប៉ុន្តែ លោក ម៉ក់ សម្បត្តិ បានបកស្រាយថា នេះជាការលើកឡើង ដោយផ្អែកលើការស្រាវជ្រាវពិតប្រាកដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
អ្នកភូមិបឹងកក់ បុរីកីឡា និងថ្មគោល ប្រមាណជា ១០០នាក់ នៅព្រឹកថ្ងៃចន្ទនេះ បានធ្វើសន្និសីទកាសែតមួយ នៅតំបន់បឹងកក់ ដើម្បីឆ្លើយតបទៅនឹងការលើកឡើង របស់លោក ម៉ក់ សម្បត្តិ អនុប្រធានគណៈកម្មាធិការសិទ្ធមនុស្សកម្ពុជា ដែលបានថ្លែងពីបញ្ហាដីធ្លី ប្រាប់អង្គការសហប្រជាជាតិ នៅក្នុងទីក្រុងហ្សឺណែវ ប្រទេសស្វីស កាលពីចុងខែមករាកន្លងទៅ។ លោកម៉ក់ សម្បត្តិ បានលើកឡើងថា រដ្ឋាភិបាលកំពុងដោះស្រាយបញ្ហាដីធ្លីយ៉ាងសកម្ម ប៉ុន្តែអ្វីដែលជាការលំបាកនោះ គឺដោយសារ តែមានការបំប៉ោងទិន្នន័យ ឬទិន្នន័យមិនច្បាស់លាស់ ពីចំនួនគ្រួសារ ដែលរស់នៅលើដីជម្លោះនោះ។
តំណាងអ្នកភូមិបឹងកក់ គឺ អ្នកស្រី សុង ស្រីលាភ បានប្រាប់វិទ្យុបារាំងថា អ្នកភូមិមិនបានបំប៉ោងតួលេខ ដូចការលើកឡើង របស់លោក ម៉ក់ សម្បត្តិនោះទេ។ អ្នកស្រី បានបន្តថា ការកើនឡើងនៃចំនួនទិន្នន័យនេះ ក៏មិនមែនជាកំហុសរបស់អ្នកភូមិដែរ គឺវាជាអសមត្ថភាព របស់អាជ្ញាធរ ដែលទទួលខុសត្រូវក្នុងការដោះស្រាយបញ្ហា ដីធ្លីជូនប្រជាពលរដ្ឋ។
តំណាងអ្នកភូមិបឹងកក់ដដែល បាននិយាយដោយស្នើទៅកាន់រដ្ឋាភិបាលកម្ពុជា មិនអោយមន្ត្រីរបស់ខ្លួននិយាយបំភ្លៃការពិត នៅលើឆាកអន្តរជាតិ ព្រោះអ្នកភូមិយល់ថា ការលើកឡើង ទាំងអស់របស់តំណាងគណៈកម្មាធិការសិទ្ធមនុស្សកម្ពុជា នៅក្នុងកិច្ចពិភាក្សា នាទីក្រុងហ្សឺណែវ កាលពីពេលកន្លងទៅ គឺជារឿងមិនពិត និងមិនបានគោរពតាមឆន្ទៈ ដែលពលរដ្ឋចង់បាន។ លើសពីនេះ អ្នកភូមិ បានអះអាងថា តំណាងរដ្ឋាភិបាល ព្យាយាមរាយការណ៍ តែពីចំនុចល្អមួយចំនួនតូចរបស់ខ្លួនតែប៉ុណ្ណោះ ប៉ុន្តែមិនបាន និយាយពីការរំលោភសិទ្ធមនុស្សធ្ងន់ធ្ងរនៅកម្ពុជា ពិតប្រាកដនោះឡើយ។
យ៉ាងណាមិញ លោក ម៉ក់ សម្បត្តិ បានបានប្រាប់វិទ្យុបារាំងថា រដ្ឋាភិបាលមិនបានចោទប្រកាន់ថាអ្នកភូមិមានការបំប៉ោងតួលេខអ្វីនោះឡើយ ដោយគ្រាន់តែរដ្ឋាភិបាលលើកថា បញ្ហានេះ គឺជាចំនុចដែលធ្វើឲ្យមានការជាប់គាំងការដោះស្រាយបញ្ហាដីធ្លីតែប៉ុណ្ណោះ។
គួររម្លឹកថា នៅក្រោយការសួរសំនួរ និងការផ្តល់អនុសាសន៍អស់រយៈពេលជាង៣ម៉ោង ក្នុងកិច្ចពិភាក្សាសិទ្ធមនុស្សកម្ពុជា ដល់អង្គការសហប្រជាជាតិ លោក ម៉ក់ សម្បត្តិប្រធានគណៈប្រតិភូ បានបកស្រាយបញ្ហាចំនួន៤ចំនុច ក្នុងនោះ គឺភាពមិនប្រក្រតីនៃការបោះឆ្នោត ច្បាប់ប្រឆាំងអំពើពុករលួយ បញ្ហាសាលាក្តីខ្មែរក្រហម និង បញ្ហាទំនាស់ដីធ្លីជាដើម។ យ៉ាងណាក៏ដោយ មុនបិទកិច្ចពិភាក្សា ប្រធានគណៈប្រតិភូកម្ពុជារូបនេះ ក៏បានប្រកាសទទួលយកអនុសាសន៍ ទាំង១៣៨ ពីបណ្តាប្រទេសជាសមាជិកនសក្រុមការងាររបស់ឧត្តមស្នងការអង្គការសហប្រជាជាតិ និងសន្យាខិតខំប្រឹងប្រែងអនុវត្តន៍ឱ្យអស់ពីសមត្ថភាព ដោយដាក់បញ្ចូលបញ្ហាទាំងអស់តាមភាពចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ