អង្គរសង្ក្រាន្តដែលមានវត្តមានមេដឹកនាំគណបក្សទាំងពីរដូចឆ្នាំទៅមិនចាំបាច់ទេនៅឆ្នាំនេះ
ចុះផ្សាយនៅថ្ងៃ៖
ស្តាប់ - ០៤:២៣
ដោយសារតែនយោបាយខ្វែងគំនិតគ្នា មេដឹកនាំនយោបាយជាន់ខ្ពស់ របស់ប្រទេសកម្ពុជា មិនបានបង្ហាញមុខរួមគ្នា នៅក្នុងឱកាសបុណ្យចូលឆ្នាំខ្មែរនៅឆ្នាំនេះ ដូចជាឆ្នាំមុននោះទេ។ ទិដ្ឋភាពនេះ ត្រូវគេមើលឃើញថាស្ថានភាពនយោបាយ នៅក្នុងអំឡុងបុណ្យចូលឆ្នាំខ្មែរ អាចប៉ះពាល់ដល់អារម្មណ៍ និងការសង្ឃឹមទុករបស់ប្រជាពលរដ្ឋ ដែលចង់បាននូវភាពស្ងប់ស្ងាត់ ការសាមគ្គីគ្នារវាងខ្មែរ និងការទទួលទេវតាឆ្នាំថ្មីជុំគ្នាពីគ្រប់ភាគី។
ការមើលមុខគ្នាចំៗ លាយឡំនឹងស្នាមញញឹម ការបណ្តើរគ្នាដើរត្រសងពីកន្លែងមួយ ទៅកន្លែងមួយ រវាងលោកនាយករដ្ឋមន្ត្រី ហ៊ុន សែន និងលោក សម រង្សី ប្រធានគណបក្សសង្គ្រោះជាតិ នៅក្នុងព្រឹត្តិការណ៍អង្គរសង្រ្កាន្តកាលពីខែមេសាឆ្នាំ២០១៥ នៅខេត្តសៀមរាប នឹងលែងបានឃើញទៀតហើយ។
កាលណោះប្រជាពលរដ្ឋខ្មែរភាគច្រើន បានបង្ហាញពីអារម្មណ៍ចូលឆ្នាំមួយប្រកបដោយរីករាយ និងមានភាពកក់ក្តៅ។ កក់ក្តៅដោយសារតែស្ថានភាពនយោបាយចំពេលចូលឆ្នាំត្រជាក់ស្រេប តាមរយៈការចូលឆ្នាំថ្មីរួមគ្នា របស់មេដឹកនាំទាំងពីរ ដែលមាននិន្នាការផ្ទុយគ្នា។ វប្បធម៌សន្ទនា ក៏ត្រូវបានលើកឡើងនៅពេលនោះច្បាស់ៗដែរ ដោយលោកនាយករដ្ឋមន្ត្រីហ៊ុន សែន ហើយនិងការទទួលយកពីដៃគូប្រជែងនយោបាយគឺលោក សម រង្សី។ មួយវិញទៀត មេដឹកនាំគណបក្សទាំងពីរ ក៏បានអំពាវនាវឲ្យខ្មែររួបរួមគ្នា សាមគ្គីគ្នាដើម្បីខ្មែរខ្លាំង និងបញ្ឈប់នូវនយោបាយ «ទឹកឡើងត្រីស៊ីស្រមោច ទឹកហោចស្រមោចស៊ីត្រី»។
ផ្ទុយទៅវិញមកទល់ថ្ងៃនេះ រយៈពេល ១ឆ្នាំគត់ ដែលព្រឹត្តិការណ៍ដ៏រីករាយនេះ បានរលាយបាត់ពីអារម្មណ៍របស់ប្រជាពលរដ្ឋ ហើយជំនួសមកវិញដោយអារម្មណ៍តានតឹង និងកំដៅ នយោបាយ ដែលគេមើលឃើញថាតាមរយៈនៃការចាប់ខ្លួនលោកអ៊ុំ សំអាន តំណាងរាស្ត្រគណបក្សសង្គ្រោះជាតិមណ្ឌលសៀមរាប កាលពីប៉ុន្មានថ្ងៃកន្លងទៅនេះ។ ការចាប់ខ្លួនតំណាងរាស្ត្រពាក់ព័ន្ធទៅនឹងការប្រើប្រាស់ផែនទីក្លែងក្លាយ ត្រូវបានធ្វើឡើងក្រោមបទចោទចំនួន ២គឺបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង តាមមាត្រា៤៩៥ និងមាត្រា៤៩៦ នៃក្រមព្រហ្មទណ្ឌកម្ពុជា។
ជាការពិត ភាពតានតឹងផ្នែកនយោបាយ ត្រូវគេសម្គាល់ឃើញបន្ទាប់ពីក្រោយចូលឆ្នាំខ្មែរ កន្លងទៅ ជាពិសេសចាប់តាំងពីក្រោយការពិសារអាហាររួមគ្នា រវាងក្រុមគ្រួសារមេដឹកនាំកំពូលទាំងពីរ កាលពីខែកក្កដាឆ្នាំទៅ ដោយសារក្រោយមក មានការចោទប្រកាន់គ្នាពីការកេងចំណេញនយោបាយ។
ជាបន្តបន្ទាប់ ព្រឹត្តិការណ៍សំខាន់ៗ ដូចជាការចាប់ខ្លួនព្រឹទ្ធសមាជិកគណបក្ស សម រង្សី លោកហុង សុខហួរ ការបញ្ចប់តំណែងអនុប្រធានទី១នៃរដ្ឋសភាពីលោក កឹម សុខា តុលាការចេញដីការចាប់ខ្លួនលោកសម រង្សី និងការវាយតំណាងរាស្ត្រគណបក្សប្រឆាំងពីររូបនៅខាងក្រៅរដ្ឋសភា ការប្រឈមរបស់លោក កឹម សុខា ទៅនឹងខ្សែអាត់សន្ទនាស្នេហាជាមួយនឹងស្ត្រីវ័យក្មេងម្នាក់បំរើការងារ នៅក្នុងហាងកាត់សក់ ហើយចុងក្រោយនេះ គឺការចាប់ខ្លួនលោកអ៊ុំ សំអាន។
តាមរយៈនៃព្រឹត្តិការណ៍ទាំងអស់នេះ បង្ហាញថានយោបាយកម្ពុជា ចាប់ពីពេលនេះ រហូតដល់ការបោះឆ្នោតជាបន្តបន្ទាប់ គឺការបោះឆ្នោតក្រុមប្រឹក្សាឃុំ សង្កាត់ឆ្នាំ២០១៧ និងការបោះឆ្នោតសកល នៅឆ្នាំ២០១៨ នឹងមានភាពតឹងតែង។ តឹងតែងដោយសារអ្នកនយោបាយនៃគណបក្សជាប់ឆ្នោតទាំងពីរ បានដកឃ្លាទៅឈរម្ខាងម្នាក់ និងមានការអះអាងជាបណ្តើរៗ ពីភាពជោគជ័យរបស់ខ្លួន នៅក្នុងការបោះឆ្នោតខាងមុខនេះ។
ដូច្នេះ ពិធីបុណ្យចូលឆ្នាំថ្មី អដ្ឋស័ក ព.ស ២៥៦០ ដែលចាប់ផ្តើម នៅថ្ងៃពុធនេះ មានរយៈពេលដល់ទៅ៤ថ្ងៃ ថ្វីត្បិតតែមានព្រឹត្តិការណ៍អង្គរសង្រ្កាន្ត និងការកម្សាន្តផ្សេងៗនៅដដែលមែន ក៏ប៉ុន្តែនៅក្នុងក្រសែភ្នែកអ្នកតាមដានសភាពការណ៍នយោបាយកម្ពុជាមួយចំនួន យល់ថា ជាពិធីបុណ្យមួយដែលមើលទៅហាក់សោះកក្រោះជាងឆ្នាំទៅ។ សោះកក្រោះ គឺគ្មានអ្វីក្រៅពី ការចង់ឃើញស្ថានភាពអ្នកនយោបាយខ្មែរ រួមគ្នាធ្វើបុណ្យជាតិជាមួយគ្នា ដូចកាលពីឆ្នាំមុន មិនត្រូវបានឃើញម្តងទៀតនៅឆ្នាំនេះ។
តែជារឿងធម្មតាទេ របត់នយោបាយអាចមានការប្រែប្រួល អ្វីៗក៏អាចកើតឡើងមួយពព្រិចភ្នែក ជាពិសេសនៅមុនកាលៈទេសៈមួយដែលត្រៀមរៀបចំបោះឆ្នោត។ ការប្រកួតប្រជែងគ្រប់រូបភាពនយោបាយ ត្រូវបានធ្វើឡើង នៅក្នុងប្រទេសមួយដែលកំពុងតែដើរឆ្ពោះទៅរកលទ្ធិប្រជាធិបតេយ្យមួយរឹងមាំ។ ដូច្នេះ វត្តមានរបស់មេបក្សប្រឆាំង រូបភាពល្អូកល្អើនរបស់អ្នកនយោបាយ នៅក្នុងឱកាសអង្គរសង្ក្រាន្តចូលឆ្នាំខ្មែរឆ្នាំនេះ អាចមិនមែនជាការចាំបាច់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ