លោកខៀកាញារីទ្ធ៖កម្ពុជាចាស់ទុំជាងថៃក្នុងដំណោះស្រាយព្រំដែន
មន្ត្រីជាន់ខ្ពស់រដ្ឋាភិបាលកម្ពុជាបានអត្ថាធិប្បាយរិះគន់ថៃថា ថៃនៅមានភាពចាស់ទុំតិចជាងកម្ពុជាក្នុងដំណោះស្រាយកិច្ចការព្រំដែន។ ពិសេសការកេងចំណេញនយោបាយលើបញ្ហាព្រំដែននោះ។ អ្នកនាំពាក្យរដ្ឋាភិបាលកម្ពុជាលោកខៀវ កាញារីទ្ធបានបញ្ចេញប្រតិកម្មយ៉ាងនេះក្រោយដែលក្រុមជនថៃអាវលឿងនៃគណបក្សប្រជាធិបតេយ្យរបស់់លោកអាប់ភីស៊ីតបានចេញតវ៉ាទាមទារអោយរដ្ឋាភិបាលលោកស្រីយីងឡាក់បញ្ជាក់អំពីជំហររបស់ខ្លួនលើបញ្ហាក្តីក្តាំដីជុំវិញប្រសាទព្រះវិហារដែលកម្ពុជាស្នើសុំការបកស្រាយពីតុលាការយុត្តិធម៌អន្តរជាតិនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
អ្នកនាំពាក្យរដ្ឋាភិបាលភ្នំពេញលោកខៀវ កាញារីទ្ធបានចាត់ទុកការតវ៉ារបស់ក្រុមថៃអាវលឿងក្នុងរយៈពេលប៉ុន្មានថ្ងៃចុងក្រោយនេះ ថាជាសកម្មភាពដដែលៗ ដែលអ្នកនយោបាយថៃប្រើប្រាស់បញ្ហាព្រំដែនដើម្បីកេងចំណេញផ្នែកនយោបាយនោះ។ ហើយថា នេះគឺជាចំនុចអន់ថយរបស់អ្នកនយោបាយថៃ។
ការអត្ថាធិប្បាយរបស់មន្ត្រីជាន់ខ្ពស់រដ្ឋាភិបាលកម្ពុជាកំពុងបាញ់ឆ្ពោះទៅគណបក្សប្រជាធិបតេយ្យរបស់ថៃដែលដឹកនាំដោយលោកអាប់ភីស៊ីត វេចាជីវ៉ា។ តាំងពីថ្ងៃសៅរ៍ ក្រុមជនថៃអាវលឿងដែលគាំទ្រគណបក្សប្រជាធិបតេយ្យស្រាប់តែបានលើកយកបញ្ហាព្រំដែនប្រសាទព្រះវិហារមកធ្វើជាគំនាបដាក់លើរដ្ឋាភិបាលរបស់លោកស្រីយីងឡាក់ ស៊ីណាវ៉ាត់។
ក្រុមជនថៃអាវលឿងបានតវ៉ាទាមទារអោយរដ្ឋាភិបាលលោកស្រីយីងឡាក់បង្ហាញជំហររបស់ខ្លួនចំពោះបញ្ហាប្រាសាទព្រះវិហារ ហើយអោយច្រានចោលសេចក្តីសម្រេចណាមួយរបស់តុលាការយុត្តិធម៌អន្តរជាតិដែល ពួកគេអះអាងថា ធ្វើអោយប៉ះពាល់ ឬបាត់បង់បូរណភាពដែនដីរបស់ថៃនោះ។
ក្រុមជនថៃអាវលឿងបានប្រមូលផ្តុំគ្នាតវ៉ានេះ នៅពេលដែលតុលាការយុត្តិធម៌អន្តរជាតិនឹងបើកសវនាការលើបណ្តឹងរបស់កម្ពុជានៅខែមេសាខាងមុខនេះ។ កម្ពុជា បានស្នើអោយតុលាការយុត្តិធម៌អន្តរជាតិបកស្រាយសាលដីកាឆ្នាំ១៩៦២ដែលបានបង្គាប់អោយថៃប្រគល់ប្រាសាទព្រះវិហារមកអោយកម្ពុជាវិញនោះ។ កម្ពុជាបានស្នើអោយមានការបកស្រាយសាលដីកានេះឡើងវិញ ដោយសារតែរដ្ឋាភិបាលថៃ ក្នុងអណត្តិរបស់លោកអាប់ភីស៊ីតបានទាមទារថាដីនៅជុំវិញប្រាសាទព្រះវិហារគឺជារបស់ថៃ។
ចំពោះលោកខៀវ កាញារីទ្ធ កម្ពុជាបានបង្ហាញភាពចាស់ទុំច្រើនជាងថៃនៅក្នុងការដោះស្រាយបញ្ហាព្រំដែន។ អ្នកនាំពាក្យរដ្ឋាភិបាលរូបនេះបានពន្យល់ថា កម្ពុជាបានប្រើប្រាស់ក្រុមការងារតែមួយជារៀងរហូតមកសម្រាប់ធ្វើកិច្ចការងារព្រំដែននេះ ខណៈដែលថៃបានផ្លាស់ប្តូរក្រុមការងារជិត២០ក្រុមក្នុងរយៈពេលជាង១០ឆ្នាំចុងក្រោយនេះ។ លោកខៀវ កាញារីទ្ធដែលជារដ្ឋមន្ត្រីក្រសួងព័ត៌មានផងនោះបានបន្តថា ជាបច្ច័យ ដោយសារតែថៃមានក្រុមការងារច្រើនយ៉ាងដូច្នេះ ពួកគេបានមានគំនិតមិនស៊ីសង្វាក់គ្នា ហើយមិនបានយល់ស៊ីជម្រៅទៅក្នុងបញ្ហាព្រំដែននេះ។
គួរបញ្ជាក់ផងដែរថា គណបក្សប្រឆាំងក្នុងប្រទេសថៃកំពុងផ្លុំរងើកភ្លើងព្រំដែនប្រាសាទព្រះវិហារឡើងវិញ ខណៈកម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រនៅក្នុងខែកក្កដាខាងមុខនេះ។ បញ្ហាព្រំដែនក៏ជារបៀបវារៈដ៏រសើបនៃការឃោសនាបោះឆ្នោតនៅកម្ពុជាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ